ఆసియాలోనే సంతోషకరమైన నగరంగా భారతీయ సిటీ..! తాజా సర్వేలో ఎంపిక..!

ప్రపంచవ్యాప్తంగా అత్యంత సంతోషంగా ప్రజలు నివసిస్తున్న నగరాలపై పలు సర్వేలు జరుగుతూనే ఉన్నాయి. అలాగే ఖండాల వారీగా కూడా ప్రజలు ఎక్కడ సంతోషంగా ఉన్నారో తెలుసుకునేందుకు కూడా ఈ సర్వేలు చేస్తున్నారు. ఇందులో భాగంగా తాజాగా టైమ్ అవుట్ అనే సంస్థ నిర్వహించిన సర్వేలో ఆసియాలోనే అత్యంత సంతోషదాయక నగరం భారత్ లోనే ఉందని తేలిందట. దీంతో ఇన్నాళ్లూ ఈ నగరం గొప్పతనం మనకు తెలియలేదా అని దేశంలోని ఇతర నగరాల పౌరులు ఆలోచనలో పడ్డారట.

టైమ్ అవుట్ నిర్వహించిన తాజా సర్వే ప్రకారం 2025 సంవత్సరానికి ఆసియాలోనే అత్యంత సంతోషకరమైన నగరంగా ముంబై సిటీ నిలిచింది. పట్టణ వాసులు తమ పరిసరాలు, జీవనశైలి, సమాజాల గురించి ఎలా భావిస్తున్నారో అంచనా వేయడానికి ఈ వార్షిక సర్వే నిర్వహించారు. ప్రధాన నగరాల్లో 18,000 మందికి పైగా నివాసితులను ఇందులో భాగంగా ప్రశ్నించారు. ఈ సర్వేలో పాల్గొనేవారు సంస్కృతి, ఆహారం, రాత్రి జీవితం, మొత్తం జీవన నాణ్యతతో సహా అనేక అంశాల ఆధారంగా వారి నగరాలకు రేటింగ్ ఇచ్చారు.

ఆసియా ఖండంలోని ఇతర ప్రధాన నగరాలతో పోలిస్తే ముంబైలో నివసిస్తున్న వారిలో 94 శాతం మంది తమ సిటీ తమకు ఆనందాన్ని ఇస్తుందని తెలిపారు. అందుకే ఈ సంవత్సరం ఆసియాలో అగ్రస్థానంలో నిలిచిందని చెప్పారు. 89 శాతం మంది స్థానికులు తాము నివసించిన నగరాల్లో ఇతర నగరాల కంటే ముంబైలో సంతోషంగా ఉన్నట్లు తెలిపారు. 88 శాతం మంది ప్రజలు నగరంలో సంతోషంగా ఉన్నట్లు భావిస్తున్నారు.87 శాతం మంది నగరంలో సంతోష భావన ఇటీవలి కాలంలో పెరిగిందని భావిస్తున్నారు.

ముంబై తర్వాత చైనాలోని బీజింగ్, షాంఘై నగరాలు వరుసగా రెండవ, మూడవ స్థానాలను దక్కించుకున్నాయి. ఈ రెండు చైనా నగరాల్లో 90 శాతం కంటే ఎక్కువ మంది స్థానికులు తమ పరిసరాలలో సంతోషంగా ఉన్నట్లు తెలిపారు. వారి ఆధునిక మౌలిక సదుపాయాలు, సాంస్కృతిక గొప్పతనం, యువతకు అనుకూలమైన వాతావరణాలతో ఇవి ఆసియా వ్యాప్తంగా పర్యాటకుల్ని ఆకర్షిస్తూనే ఉన్నాయి.

థాయిలాండ్‌లోని చియాంగ్ మాయి, తరువాత వియత్నాంలోని హనోయ్, మొదటి ఐదు స్థానాల్లో నిలిచాయి. మొత్తం ఆనందంలో రెండు నగరాలు ఒకే విధంగా స్కోర్ చేసినప్పటికీ, కమ్యూనిటీ సానుకూలత, రోజువారీ అనుభవాలలో ఆనందం వంటి అంశాల్లో హనోయ్ కొద్దిగా ముందుంది. మరోవైపు ఆసియాలోని అత్యంత ప్రజాదరణ పొందిన ప్రపంచ కేంద్రాలుగా ఉన్న సియోల్, సింగపూర్, టోక్యో ఈ సంతోష రేటింగ్స్ స్కేలులో దిగువన ఉన్నాయి. టోక్యో వాసుల్లో 70 శాతం మంది మాత్రమే తమ నగరం తమను సంతోషపరుస్తుందని చెప్పారు.