ఎలాంటి ఆధారాలు లేవు.. మీటూ కేసులో నానాపటేకర్‌కు పోలీసులు క్లీన్‌చిట్..

ముంబై : లైంగిక వేధింపుల ఆరోపణల కేసులో బాలీవుడ్ నటుడు నానా పటేకర్‌కు ముంబై పోలీసులు క్లీన్‌చిట్ దొరికింది. పదేళ్ల క్రితం హారన్ ఓకే ప్లీజ్ సినిమా సెట్‌లో ఆయన తనను వేధించారంటూ నటి తనుశ్రీ దత్తా ఏడాది క్రితం పోలీసులకు ఫిర్యాదు చేశారు. కేసు బుక్ చేసి విచారణ చేపట్టిన పోలీసులు నానా పటేకర్ తప్పు చేశారనడానికి ఎలాంటి సాక్ష్యాలు దొరకలేదని స్థానిక న్యాయస్థానంలో చార్జ్ షీట్ దాఖలు చేశారు. పోలీసులు బీ రిపోర్ట్ సమర్పించడంతో పటేకర్‌కు కోర్టు క్లీన్ చిట్ ఇచ్చే అవకాశముంది.

నానా పటేకర్‌కు పోలీసులు క్లీన్ చిట్ ఇవ్వడంపై తను శ్రీ దత్తా తరఫు న్యాయవాది స్పందించారు. సాక్ష్యాలు లేవన్న కారణంతో కేసును మూసివేశారని, దానిపై తనుశ్రీ ప్రొటెస్ట్ రిపోర్ట్ దాఖలు చేస్తారని చెప్పారు. పోలీసులు కేసు మూసేసినా మరింత లోతైన విచారణ జరిపే అవకాశం ఇవ్వాల్సిందిగా కోర్టును కోరే అవకాశం ఉంటుందని అన్నారు. ఇదిలా ఉంటే నానా పటేకర్‌కు భయపడి కొందరు ప్రత్యక్ష సాక్ష్యులు తమకు మద్దతివ్వడం లేదని తనుశ్రీ ఈ మధ్య ఆరోపించారు. తనుశ్రీ ఆరోపణలపై నానా పటేకర్ గతంలోనే తనుశ్రీ దత్తాకు నోటీసులు పంపారు. రాతపూర్వకంగా క్షమాపణలు కోరాలని డిమాండ్ చేశారు.

English summary

There is no evidence to prosecute actor Nana Patekar of charges of sexually harassing his co-star Tanushree Dutta, the Mumbai Police told a court today. Tanushree Dutta had accused Nana Patekar of misbehaving with her on the sets of their movie Horn OK Pleassss 10 years ago.