ఏడ్చారు.. నవ్వారు.. కేరింతలు కొట్టారు

తమిళనాడు రాజకీయాల్లో నవశకం మొదలైంది. తమిళగ వెట్రి కజగం (TVK) అధినేత విజయ్.. తమిళనాడు ముఖ్యమంత్రిగా ప్రమాణ స్వీకారం చేశారు. సీ జోసెఫ్ విజయ్ పేరుతో ప్రమాణం చేశారు. గవర్నర్ రాజేంద్ర విశ్వనాథ్ అర్లేకర్ ఆయనతో ప్రమాణ స్వీకారం చేయించారు. తొలిసారి అసెంబ్లీ ఎన్నికల్లో పోటీ చేసిన టీవీకే అద్భుత విజయం సాధించి ప్రభుత్వాన్ని ఏర్పాటు చేయడం విశేషం. హంగ్ అసెంబ్లీ ఏర్పడిన నేపథ్యంలో కాంగ్రెస్, సీపీఐ, సీపీఎం, వీసీకే, ఏఐయూఎంఎల్ వంటి పార్టీల సహకారంతో ఇక్కడ ప్రభుత్వం కొలువుదీరింది.

ముఖ్యమంత్రిగా విజయ్ తో పాటు మొత్తం తొమ్మిది మంది మంత్రులుగా ప్రమాణ స్వీకారం చేశారు. బస్సీ ఎన్ ఆనంద్- టీనగర్, ఆధవ్ అర్జున (విల్లివాక్కం), కేజీ అరుణ్ రాజ్ (తిరుచెంగోడు), కేఏ సెంగోట్టయ్యన్ (గోబిచెట్టిపాళ్యం), పీ వెంకటరమణన్ (మైలాపూర్), సీటీఆర్ నిర్మల్‌ కుమార్ (తిరుప్పరన్‌కుండ్రం), రాజ్‌మోహన్ (ఎగ్మోర్), టీకే ప్రభు (కారైకుడి), ఎస్ కీర్తన (శివకాశి) ఉన్నారు. వారికి ఈ సాయంత్రానికి శాఖలు కేటాయించవచ్చు.

కాగా- ప్రమాణ స్వీకారోత్సవం నేపథ్యంలో చెన్నై జనసంద్రమైంది. రాష్ట్రవ్యాప్తంగా పలు పట్టణాల నుంచి విజయ్ అభిమానులు చెన్నైకి చేరుకున్నారు. దీంతో కోయంబేడు సహా ఇతర బస్టాండ్లు కిటకిటలాడుతున్నాయి. ఈ తెల్లవారు జాము నుంచీ వారంతా చెన్నైకి చేరుకోవడం మొదలైంది. ప్రమాణ స్వీకార కార్యక్రమం జరిగే నెహ్రూ స్టేడియం పరిసరాల్లో ట్రాఫిక్ ఆంక్షలను విధించారు. మంత్రులుగా ప్రమాణ స్వీకారం చేయనున్న ఎమ్మెల్యేల అనుచరులు, టీవీకే కార్యకర్తలు చెన్నై నిండిపోయింది.

అభిమానులు నేరుగా నెహ్రూ స్టేడియానికి వెళ్లే అవకాశం లేనందున వారికోసం ప్రత్యేక ఏర్పాట్లు చేశారు. విజయ్ ప్రమాణ స్వీకార కార్యక్రమాన్ని ప్రత్యక్షంగా తిలకించడానికి భారీ ఎల్ఈడీ స్క్రీన్లను అమర్చారు. వీటితో పాటు అన్ని నియోజకవర్గాల్లో గల టీవీకే కార్యాలయాల ముందూ ఎల్ఈడీ స్క్రీన్లను అమర్చారు. ఈ చారిత్రక ఘట్టాన్ని వీక్షించడానికి వీలుగా జిల్లా కేంద్రాల్లో పార్కులు, గ్రౌండ్లు, ఇతర బహిరంగ ప్రదేశాల్లోనూ వీటిని అందుబాటులోకి తెచ్చారు.

చెన్నైలో అన్నానగర్ టవర్ పార్క్, మెరీనా బీచ్, కోయంబేడు సీఎం‌బీ‌టీ, చెన్నై సెంట్రల్ రైల్వే స్టేషన్, టీ నగర్ బస్టాండ్, బీసెంట్ నగర్ బీచ్, కథిపారా అర్బన్ స్క్వేర్, సెమోళి పూంజీ, వడపళని బస్ టెర్మినస్, షోలింగనల్లూర్ జంక్షన్, మాధవరం బస్ టెర్మినస్, అంబత్తూర్ ఓటీ బస్ స్టాండ్, తొండియార్‌పేట్ బస్ డిపో ఏరియాల్లో ఎల్ఈడీ స్క్రీన్లను ఏర్పాటు చేశారు.

VIDEO | Chennai: Supporters get teary-eyed as they watch TVK chief Vijay take oath as the Tamil Nadu Chief Minister on an LED screen installed in T Nagar.

(Full video available on PTI Videos - https://t.co/n147TvrpG7) pic.twitter.com/vwp8uWn6HM

— Press Trust of India (@PTI_News) May 10, 2026

విజయ్ ప్రమాణ స్వీకారాన్ని తిలకించడానికి వచ్చిన అభిమానులతో ఆయా ప్రాంతాలన్నీ కూడా క్రిక్కిరిసిపోయాయి. పలుచోట్ల ట్రాఫిక్ జామ్ సైతం ఏర్పడింది. పెద్ద సంఖ్యలో అభిమానులు ఎల్ఈడీ స్క్రీన్ల వద్ద గుమికూడారు. విజయ్ ప్రమాణ స్వీకారం ప్రారంభం కాగానే కేరింతలు కొట్టారు. హర్షధ్వానాలు చేశారు. స్వీట్లను పంచిపెట్టారు. విజయ్ కు జిందాబాద్ కొట్టారు. సీఎం విజయ్ జిందాబాద్ అంటూ నినాదాలతో సందడి చేశారు. టీవీకే జెండాలను ప్రదర్శించారు.

విజయ్ ప్రమాణ స్వీకారం చేసేటప్పుడు అభిమానులు తీవ్ర భావోద్వేగానికి గురయ్యారు. ఆనంద భాష్పాలు రాల్చారు. తమ భావోద్వేగాలను అదుపు చేసుకోలేకపోయారు. కన్నీరు పెట్టారు. అటు నెహ్రూ స్టేడియంలో ఈ ప్రమాణ స్వీకారోత్సవాన్ని ప్రత్యక్షంగా తిలకించిన విజయ్ తల్లిదండ్రులు సైతం భావోద్వేగానికి గురి కావడం కనిపించింది. ముందు వరుసలో కూర్చున్న విజయ్ నాన్న చంద్రశేఖర్ తడికళ్లతో తనయుడి ప్రమాణ స్వీకారాన్ని తిలకించారు.

English summary

Parents and Supporters get teary eyed Watching TVK Chief Vijay Take Oath as Tamil Nadu Chief Minister. Supporters get teary-eyed as they watch TVK chief Vijay take oath as the Tamil Nadu Chief Minister on an LED screen installed in T Nagar. విజయ్ కు జిందాబాద్ కొట్టారు. సీఎం విజయ్ జిందాబాద్ అంటూ నినాదాలతో సందడి చేశారు. టీవీకే జెండాలను ప్రదర్శించారు.