4 నుంచి పార్లమెంటు శీతాకాల సమావేశాలు: కీలక బిల్లుల ఎంట్రీ

న్యూఢిల్లీ: పార్లమెంట్ శీతాకాల సమావేశాల (Parliament's Winter Session)కు ముహూర్తం ఖరారైంది. డిసెంబర్ 4 నుంచి శీతాకాల సమావేశాలు నిర్వహించనున్నట్లు పార్లమెంట్ వ్యవహారాల శాఖ మంత్రి ప్రహ్లాద్ జోషి తెలిపారు. డిసెంబర్ 4 నుంచి డిసెంబర్ 22 వరకు సెలవులు మినహాయించి 15 రోజులపాటు ఉభయసభలు సమావేశమవుతాయన్నారు. ఈ మేరకు ట్విట్టర్(ఎక్స్) వేదికగా వెల్లడించారు.

పార్లమెంట్ వర్షాకాల సమావేశాల్లో తీసుకొచ్చిన భారతీయ న్యాయ సంహిత-2023, భారతీయ నాగరిక్ సురక్ష సంహిత-2023, భారతీయ సాక్ష్య బిల్లు 2023లను తదుపరి పరిశీలన కోసం పార్లమెంటరీ స్థాయీ సంఘానికి పంపిన విషయం తెలిసిందే. దీనికి సంబంధించిన నివేదికలు ఇటీవల హోం మంత్రిత్వశాఖకు అందాయి.

ఈ నేపథ్యంలో శీతాకాల పార్లమెంట్ సమావేశాల్లో వీటిపై చర్చించే అవకాశం ఉంది. ఐపీసీ, సీఆర్పీసీ, ఎవిడెన్స్ చట్టాల స్థానంలో కేంద్రం ఈ బిల్లును తీసుకొచ్చింది. వీటితోపాటు ప్రధాన ఎన్నికల కమిషనర్, ఎన్నికల కమిషనర్ల నియామకాలకు సంబంధించిన బిల్లులు పెండింగ్‌లో ఉన్నాయి. శీతాకాల సమావేశాల్లో వీటిని ఓ కొలిక్కి తీసుకొచ్చేందుకు ప్రభుత్వం సిద్ధమైనట్లు తెలుస్తోంది.

Winter Session, 2023 of Parliament will commence from 4th December and continue till 22nd December having 15 sittings spread over 19 days. Amid Amrit Kaal looking forward to discussions on Legislative Business and other items during the session.#WinterSession2023 pic.twitter.com/KiboOyFxk0

— Pralhad Joshi (@JoshiPralhad) November 9, 2023

మరోవైపు, దేశంలోని ఐదు రాష్ట్రాలు రాజస్థాన్, మధ్యప్రదేశ్, ఛత్తీస్‌గఢ్, తెలంగాణ, మిజోరంలలో అసెంబ్లీ ఎన్నికల ప్రక్రియ కొనసాగుతున్న విషయం తెలిసిందే. నవంబర్ చివరి వరకు ఈ రాష్ట్రాల్లో ఎన్నికలు కొనసాగనున్నాయి. డిసెంబర్ 3 ఓట్ల లెక్కింపు, ఫలితాలు విడుదల కానున్నాయి. ఈ క్రమంలో పార్లమెంటు సమావేశాలు జరగడం ప్రాధాన్యత సంతరించుకుంది.

English summary

Parliament's Winter Session To Begin On December 4: Pralhad Joshi.