ప్రియురాలి అలక: నగరమంతా ‘సారీ’ హోర్డింగ్స్ పెట్టాడు! షాకిచ్చిన పోలీసులు

Updated: Tuesday, August 21, 2018, 0:09 [IST]

ప్రియురాలి కోపాన్ని తగ్గించేందుకు..

ఆ వివరాల్లోకి వెళితే.. పుణెలోని పంప్రి చించ్వాడ్‌ ప్రాంతానికి చెందిన వ్యాపారవేత్త అయిన నీలేశ్‌ ఖేడేకర్‌ అనే వ్యక్తి... తన ప్రేయసితో స్వల్పంగా గొడవ కావడంతో ఆమె అలకబూనింది. ఆమె కోపాన్ని తగ్గించడానికి వినూత్నంగా సారీ చెప్పాలనుకున్నాడు.

..ఐ యామ్ సారీ అంటూ..

ఆమె వెళ్లే దారిలో, ఇతర రద్దీప్రాంతాల్లో ‘.. ఐ యామ్‌ సారీ' అంటూ పెద్ద పెద్ద బ్యానర్లు, ఫ్లెక్సీలు, హోర్డింగ్‌లు కట్టించాడు. గత శుక్రవారం నగరంలో అక్కడక్కడా బ్యానర్లు, హోర్డింగ్‌లను చూసి పోలీసులు షాకయ్యారు. అనుమతి లేకుండా ఈ హోర్డింగులు పెట్టడంతో పింప్రి చించ్వాడ్ మున్సిపల్ కార్పొరేషన్ కూడా అతనిపై చర్యలు తీసుకునేందుకు సిద్ధమైంది.

షాకిచ్చిన పోలీసులు

ఈ క్రమంలో రంగంలోకి దిగిన పోలీసులు ఆ బ్యానర్లు కట్టించిన వ్యక్తి గురించి ఆరా తీయగా అతను నిలేశ్‌ అని తేలింది. అనుమతుల్లేకుండా అక్రమంగా ఇలా బ్యానర్లు కట్టించినందుకు గానూ అతనిపై పోలీసులు కేసు నమోదు చేశారు. ప్రియురాలికి సారీ ఏమో గానీ, నీలేశ్‌కు మాత్రం కేసు నమోదు చేసి భారీ షాకిచ్చారు.

300లకుపైగా హోర్డింగుల ఏర్పాటు

కాగా, తను ప్రేమించిన యువతి శుక్రవారం ముంబై నుంచి ఇక్కడికి వస్తున్న నేపథ్యంలోనే నీలేశ్ ఈ హోర్డింగులు ఏర్పాటు చేశారని పోలీసులు తెలిపారు. అతని స్నేహితుడి ద్వారా నీలేశ్ ఈ పని చేశాడని తెలుసుకున్నామని చెప్పారు. ఆ అమ్మాయి వచ్చే మార్గంలో సుమారు 300కుపైగా హోర్డింగులు ఏర్పాటు చేశారని తెలిపారు.