దసరా వేళ రాష్ట్రపతి కీలక పిలుపు! దేశ ప్రజలకు మోదీ శుభాకాంక్షలు
చెడుపై మంచి సాధించిన విజయానికి ప్రతీకగా నిలిచే పవిత్ర విజయదశమి వేడుకలను దేశ ప్రజలుఉత్సాహంగా జరుపుకుంటున్నారు. తొమ్మిది రోజుల పాటు శరన్నవరాత్రి వేడుకలతో భక్తిశ్రద్ధలతో ముగిసిన ఈ పర్వదినం సందర్భంగా దేశ ప్రజలందరికీ ప్రధానమంత్రి నరేంద్ర మోదీ, రాష్ట్రపతి ద్రౌపది ముర్ము హృదయపూర్వక శుభాకాంక్షలు తెలియజేశారు. ప్రతి ఒక్కరి జీవితంలోనూ సుఖసంతోషాలు, అష్టైశ్వర్యాలు, విజయాలు వెల్లివిరియాలని వారు ఆకాంక్షించారు.
ప్రజల జీవితాల్లో ఆనందం నిండాలి: ప్రధాని మోదీ ఆకాంక్ష
విజయదశమి పర్వదినాన్ని పురస్కరించుకుని ప్రధాని నరేంద్ర మోదీ సోషల్ మీడియా వేదికగా దేశ ప్రజలకు ప్రత్యేక సందేశాన్ని పంపారు. ఆనందం, విశ్వాసంతో నిండిన ఈ విజయ పండుగ ప్రతి ఒక్కరి సంకల్పానికి సరికొత్త శక్తిని ఇవ్వాలని కోరుకున్నారు. ప్రజల ప్రతి జీవితం సుఖసంతోషాలు, ఐశ్వర్యం, విజయాలతో వర్ధిల్లాలని తాను హృదయపూర్వకంగా కోరుకుంటున్నట్లు ప్రధాని పేర్కొన్నారు.
నైతికత, ధర్మ మార్గాలను అనుసరించాలి: రాష్ట్రపతి పిలుపు
దేశ విదేశాల్లోని భారతీయులందరికీ రాష్ట్రపతి ద్రౌపది ముర్ము విజయదశమి శుభాకాంక్షలు తెలిపారు. దసరా పండుగ కేవలం ఒక వేడుక మాత్రమే కాదని, అది మనకు లోతైన ఆధ్యాత్మిక, నైతిక విలువలను బోధిస్తుందని పేర్కొన్నారు. రాముడు ధర్మానికి, నైతికతకు ప్రతీక అని.. రావణుడిపై రాముడి విజయం అధర్మంపై ధర్మం సాధించిన విజయానికి నిదర్శనమని రాష్ట్రపతి గుర్తుచేశారు. మన దేశ సంస్కృతి ఎప్పుడూ నైతికత, బాధ్యత అనే పునాదులపైనే నడుస్తుందని తెలిపారు.
వికసిత్ భారత్ నిర్మాణంలో భాగస్వాములు కావాలి
విజయదశమి పవిత్ర సందర్భాన్ని పురస్కరించుకుని అందరూ ఒక మంచి సంకల్పం తీసుకోవాలని రాష్ట్రపతి పిలుపునిచ్చారు. మన సాంప్రదాయాలలోని గొప్ప ఆదర్శాలను కాపాడుకుంటూ, అందరినీ కలుపుపోయే సమాజాన్ని నిర్మించాలని కోరారు. దేశాన్ని అభివృద్ధి పథంలో నడిపించే 'వికసిత్ భారత్' లక్ష్య సాధన కోసం ప్రతి ఒక్కరూ తమ వంతు కృషి చేయాలని పిలుపునిచ్చారు. దేశ ప్రజలందరూ ఆయురారోగ్యాలతో, సుఖశాంతులతో వర్ధిల్లాలని ఆకాంక్షించారు.
సమాజంలోని రుగ్మతలను పారద్రోలే పండుగ
విజయదశమి అనగానే మనకు ఏళ్ల తరబడి వస్తున్న సాంప్రదాయాలు, రావణ దహనం, ప్రార్థనలు, సాంస్కృతిక కార్యక్రమాలు గుర్తుకువస్తాయి. అయితే ఈ పండుగ కేవలం పూజలతోనే సరిపోదని, మనలోని ప్రతికూల ఆలోచనలను తరిమికొట్టాలని ఈ వేడుకలు గుర్తుచేస్తాయి. సమాజంలో వేళ్లూనుకున్న దుర్వ్యసనాలు, కుల వివక్ష, కట్నకానుకల పిచ్చి వంటి సామాజిక పిశాచాలను రూపుమాపేందుకు ప్రతి ఒక్కరూ ఐక్యంగా కృషి చేయాలని ఈ పర్వదినం సందేశం ఇస్తోంది.
Click it and Unblock the Notifications
Sign in with Google
