భారత పర్యటనకు పుతిన్: అమెరికా ఒత్తిడికి చెక్!

రష్యా అధ్యక్షుడు వ్లాదిమిర్ పుతిన్ భారత పర్యటనకు షెడ్యూల్ ఖరారైంది. డిసెంబర్ 4-5 తేదీలలో ఆయన ఇండియాలో పర్యటించనున్నారు. ఈ మేరకు భారత విదేశాంగ మంత్రిత్వ శాఖ, రష్యా అధ్యక్ష కార్యాలయం క్రెమ్లిన్ శుక్రవారం ప్రకటనను విడుదల చేశాయి. ఉక్రెయిన్ యుద్ధం తర్వాత ఆయనకు ఇది మొదటి పర్యటన కావడంతో ఈ భేటీ ఇండియాకు రక్షణ, ఇంధనం, దౌత్య రంగాలలో అనేక పెద్ద ప్రయోజనాలను అందించనుంది. రష్యా చమురు కొనుగోలు చేస్తోందని అమెరికా భారత్‌పై అదనపు టారిఫ్‌లు అమలు చేస్తోన్న వేళ పుతిన్ రాక ఉత్కంఠను సృష్టిస్తోంది.

ప్రధాని మోదీ ఆహ్వానం వ్లాదిమిర్ పుతిన్ ఇండియాలో రెండు రోజుల పాటు పర్యటించనున్నారు. ఈ సందర్భంగా ప్రధాని మోదీ-పుతిన్ భేటీ కానున్నారు. పుతిన్ గౌరవార్థం భారత రాష్ట్రపతి ద్రౌపదీ ముర్ము ప్రత్యేక విందు ఇవ్వనున్నారు. ఈక్రమంలో ఇరు దేశాల మధ్య పలు ఒప్పందాలు జరిగే అవకాశం ఉంది.

రక్షణ రంగంలో కొత్త శిఖరాలు
వ్లాదిమిర్ పుతిన్ పర్యటనలో అత్యంత కీలకమైన అంశం రక్షణ సహకారం. ఈ ఒప్పందాలు భారతదేశ రక్షణ సామర్థ్యాన్ని, ముఖ్యంగా 'మేక్ ఇన్ ఇండియా'లక్ష్యాలను బలోపేతం చేస్తాయి. రష్యా తన ఐదో తరం అత్యంత ప్రమాదకరమైన స్టీల్త్ ఫైటర్ జైట్ Su-57 సాంకేతికతను ఇండియాకు అప్పగించడానికి అంగీకరించింది. ఈ ఒప్పందం ద్వారా 70 శాతం సాంకేతికతను బదిలీ చేసి జెట్‌ను భారత్‌లోనే తయారు చేస్తారు. ఇది భారత వైమానిక దళం 114 కొత్త ఫైటర్ జెట్ల టెండర్‌లో Su-57ను బలమైన పోటీదారుగా నిలుపుతుంది. భారత్ ఇప్పటికే కొనుగోలు చేసిన S-400 క్షిపణి వ్యవస్థల మిగిలిన స్క్వాడ్రన్‌ల డెలివరీని త్వరితం చేయడంపై ఈ పర్యటనలో నిర్ణయం తీసుకుంటారు. అంతకు మించి రష్యా అత్యంత శక్తివంతమైన S-500 ఎయిర్ డిఫెన్స్ సిస్టమ్‌ను ఇండియాలోనే తయారు చేయడానికి ప్రతిపాదన చేసే అవకాశం ఉంది. ఈ వ్యవస్థ దేశ రక్షణ కవచాన్ని అద్భుతంగా పటిష్టం చేస్తుంది.

ఆర్థిక, ఇంధన భద్రత
అమెరికా ఆంక్షలు, టారిఫ్‌ల ఒత్తిడి మధ్య పుతిన్ పర్యటన ఇండియాకు ఆర్థికంగా భారీ ఉపశమనం ఇవ్వనుంది. రష్యా నేడు భారతదేశానికి అత్యధికంగా ముడి చమురును విక్రయిస్తోంది. అమెరికా విధించిన 25శాతం అదనపు టారిఫ్‌కు జవాబుగా, పుతిన్ భారతదేశానికి మరింత చౌకగా చమురు అందించడానికి కొత్త ఆఫర్ ఇవ్వనున్నారు. ఇది దేశంలో పెట్రోల్, డీజిల్ ధరలు అదుపులో ఉండటానికి సహాయపడుతుంది. రాబోయే కొద్ది సంవత్సరాలలో వాణిజ్యాన్ని 100 బిలియన్ డాలర్లకు తీసుకెళ్లాలనే లక్ష్యాన్ని చేరుకోవడానికి ఈ పర్యటన దోహదపడుతుంది. డాలర్‌పై ఆధారపడటాన్ని తగ్గించడానికి, అమెరికన్ ఆంక్షల ప్రభావాన్ని బలహీనపరచడానికి రూపాయి-రూబుల్‌లో ప్రత్యక్ష లావాదేవీలను మరింత బలోపేతం చేస్తారు. ఎరువులు, బొగ్గు, అణుశక్తి, వ్యవసాయ రంగాలలో కొత్త వాణిజ్య ఒప్పందాలపై సంతకాలు జరిగే అవకాశం ఉంది.

అంతర్జాతీయ దౌత్య విజయం
పుతిన్ పర్యటన భారత్ వ్యూహాత్మక స్వతంత్రతను ప్రపంచానికి చాటిచెబుతుంది. దౌత్యపరంగా కీలకమైన మద్దతును అందిస్తుంది. రష్యా మరోసారి ఐక్యరాజ్యసమితి భద్రతా మండలి (UNSC)లో ఇండియాకు శాశ్వత సభ్యత్వానికి బహిరంగంగా మద్దతు ఇస్తుంది. ఇది భారతదేశ దౌత్యానికి అత్యంత పెద్ద విజయం. ఉక్రెయిన్‌లో కొనసాగుతున్న యుద్ధంపై నాయకులు చర్చించినప్పటికీ, భారత్ శాంతిని కోరుతూనే రష్యాతో తన పాత, కీలకమైన స్నేహాన్ని కాపాడుకుంటుంది.బ్రిక్స్, ఎస్‌సీఓ, జీ-20 వంటి బహుపాక్షిక వేదికలలో రెండు దేశాలు కలిసి పనిచేయడానికి కొత్త ప్రణాళికలు రచిస్తారు.

పుతిన్ ఈ రెండు రోజుల పర్యటన భారత్ కు శక్తి భద్రత, చౌకైన ఇంధనం, అత్యాధునిక రక్షణ సాంకేతికత, బలమైన అంతర్జాతీయ దౌత్య మద్దతును అందిస్తుంది. అమెరికా వంటి దేశాల నుంచి ఎంత ఒత్తిడి ఉన్నప్పటికీ, భారత్-రష్యా సంబంధం అత్యంత నమ్మదగిన వ్యూహాత్మక భాగస్వామ్యం అని ఈ పర్యటన నిరూపిస్తుంది.

English summary

Russian President Vladimir Putin will visit India on December 4–5. The visit is expected to boost India’s defence, energy security and diplomatic strength.