ఈసీ కార్యాలయానికి రాహుల్ ర్యాలీ.. ! మధ్యలోనే నిర్బంధం..! తీవ్ర ఉద్రిక్తత..!

కర్నాటకతో పాటు పలు రాష్ట్రాల్లో గత ఎన్నికల సందర్భంగా భారీ ఎత్తున ఓట్ల చోరీ జరిగిందని ఆరోపిస్తున్న లోక్ సభలో విపక్ష నేత రాహుల్ గాంధీతో పాటు ఇతర ఇండియా కూటమి నేతలు ఇవాళ ఢిల్లీలో భారీ ప్రదర్శన చేపట్టారు. కేంద్ర ఎన్నికల సంఘం కార్యాలయానికి వెళ్లేందుకు ర్యాలీగా బయలుదేరారు. అయితే వారిని పోలీసులు మధ్యలోనే అడ్డుకుని పోలీసు స్టేషన్ కు తరలించారు. ఈ సందర్భంగా ఉద్రిక్తత చోటు చేసుకుంది.

ఉదయం పార్లమెంట్ సమావేశాలకు హాజరైన రాహుల్, ఇతర ఇండియా కూటమి ఎంపీలు అక్కడి నుంచి ఓట్ల చోరీపై నిరసన తెలిపేందుకు ఎన్నికల సంఘం కార్యాలయానికి భారీగా ర్యాలీగా బయలుదేరారు. ఢిల్లీ రోడ్లపై భారీ ఎత్తున తరలివచ్చిన ఇండియా కూటమి పార్టీల కార్యకర్తలు, నేతలు, ఎంపీలతో ఈ ర్యాలీ సాగింది. అయితే ఈసీ కార్యాలయం వద్ద ఎలాంటి అవాంఛనీయ ఘటనలు జరగకుండా ముందు జాగ్రత్త చర్యగా పోలీసులు రాహుల్ సహా ఇతర ఇండియా కూటమి ఎంపీల్ని అదుపులోకి తీసుకున్నారు.

#WATCH | Delhi: Lok Sabha LoP and Congress MP Rahul Gandhi says, "The reality is that they cannot talk. The truth is in front of the country. This fight is not political. This fight is to save the Constitution. This fight is for One Man, One Vote. We want a clean, pure voters… pic.twitter.com/Aj9TvCQs1L

— ANI (@ANI) August 11, 2025

రాహుల్ గాంధీతో పాటు ప్రియాంక గాంధీ వాద్రా, సంజయ్ రౌత్ , సాగరికా ఘోష్ వంటి ఇండియా కూటమి ఎంపీలు పోలీసులు అదుపులోకి తీసుకున్న వారిలో ఉన్నారు. ఈ సందర్భంగా రాహుల్ మీడియాతో మాట్లాడారు. వాస్తవం ఏమిటంటే వారు మాట్లాడలేరని, నిజం దేశం ముందు ఉందని రాహుల్ గాంధీ తెలిపారు. ఈ పోరాటం రాజకీయమైనది కాదని, ఈ పోరాటం రాజ్యాంగాన్ని కాపాడటానికి అన్నారు. ఈ పోరాటం ఒక మనిషి, ఒక ఓటు కోసమే అన్నారు. తమకు స్వచ్ఛమైన, స్వచ్ఛమైన ఓటర్ల జాబితా కావాలన్నారు.