రూ. 3 కోట్లు పెట్టి హీరోయిన్‌కు ఇల్లు కట్టించిన దొంగ..చివరకు ఏమైందంటే..?

దొంగల యందు ఈ దొంగ వేరే లేవల్ అయ్యా. అవును మీరు వింటుంది నిజమే. ఓ దొంగ ఏకంగా రూ.3 కోట్లు పెట్టి ఇల్లు కట్టడం, ఆ ఇల్లును హీరోయిన్‌కు గిఫ్ట్‌గా ఇవ్వడం సంచలనంగా మారింది. ఈ ఘటన బెంగుళూరులో చోటు చేసుకుంది.పోలీసు వర్గాల సమాచారం ప్రకారం..మహారాష్ట్రలోని సోలాపూర్‌కు చెందిన పంచాక్షరి స్వామి అనే వ్యక్తి మొదట నుంచి కూడా నేర ప్రవృత్తిగా జీవనం కొనసాగిస్తున్నాడు. చిన్నతనం నుంచే దొంగతనాలు చేస్తూ వచ్చాడు.ఇతనికి పెళ్లై ఒక బిడ్డ కూడా ఉన్నాడు. మొదట్లో చిన్న చిన్న దొంగతనాలు చేసేవాడు.

అయితే 2014-15 సంవత్సరాల్లో ఒక ప్రముఖ సినీ నటితో పరిచయం ఏర్పడి, ఆమెతో ప్రేమ సంబంధం ఏర్పరుచుకున్నాడు.ఆమెకు ఖరీదైన గిఫ్టులు ఇవ్వడానికి భారీ దొంగతనాలు చేయడం మొదలుపెట్టాడు.అలా వచ్చిన డబ్బుతో సదరు నటికి గిఫ్టులు ఇస్తూ ఎంజాయ్ చేసేవాడు. ఆమె కోసం ఏకంగా కోల్‌కతాలో రూ.3 కోట్ల విలువైన ఇల్లు కూడా కట్టించాడు.అంతేకాకుండా, రూ.22 లక్షల విలువైన అక్వేరియంను కూడా బహుమతిగా ఇచ్చాడు. వరుసగా సమాజంలో పెద్దలకు చెందిన ఇళ్లలో దొంగతనాలు జరుగుతుండటంతో, దీనిపై పోలీసులు ప్రత్యేక దృష్టిని సారించారు.

ఇలా దొంగతనం చేస్తూ 2016లో గుజరాత్ పోలీసులకు చిక్కాడు. దీంతో అసలు విషయం బయటపడింది.ఈ కేసులో స్వామికి ఆరు సంవత్సరాల జైలు శిక్ష విధించారు. అహ్మదాబాద్‌లోని సబర్మతి సెంట్రల్ జైలు నుండి విడుదలైన తర్వాత, అతను తిరిగి దొంగతనాలు చేయడం ప్రారంభించాడు. 2024లో విడుదలైన తర్వాత బెంగళూరుకు మకాం మార్చాడు.జనవరి 9న బెంగళూరులోని మడివాలా ప్రాంతంలో ఒక ఇంట్లో దొంగతనం చేశాడు. పోలీసులు అతన్ని అరెస్టు చేసి, 181 గ్రాముల బంగారు బిస్కెట్లు, 333 గ్రాముల వెండి, ఇతర ఆభరణాలను స్వాధీనం చేసుకున్నారు.

దొంగిలించబడిన ఆభరణాలతో తయారు చేసిన బంగారం , వెండి బిస్కెట్లన్నింటినీ మహారాష్ట్రలోని సోలాపూర్‌లోని తన నివాసంలో నిల్వ చేసినట్లు స్వామి వెల్లడించారు. నేరాలు చేసిన తర్వాత, అనుమానం రాకుండా ఉండటానికి స్వామి రోడ్డుపై బట్టలు మార్చుకునేవాడని కూడా దర్యాప్తు అధికారులు కనుగొన్నారు. అతను కరాటేలో బ్లాక్ బెల్ట్ కలిగి ఉన్నాడు. అతని తండ్రి మరణం తరువాత, అతని తల్లి రైల్వే శాఖలో పరిహార ఉద్యోగం పొందింది. స్వామికి ఒక ఇల్లు ఉందని దర్యాప్తులో వెల్లడైంది, అది అతని తల్లి పేరు మీద ఉంది. అయితే, చెల్లించని రుణాలు కారణంగా ఒక బ్యాంకు వేలం నోటీసు జారీ చేసిందని పోలీసు వర్గాలు తెలిపాయి.

English summary

Thief spent Rs 15 lakh on actress per visit, built Rs 3 crore house for bar dancer girlfriend.