విజయ్ సేలం సభలో విషాదం: కరూర్ ఘటనను మరవకముందే మళ్లీ అదే సీన్!

తమిళనాడు అసెంబ్లీ ఎన్నికలు సమీపిస్తున్న వేళ ప్రముఖ నటుడు విజయ్ నేతృత్వంలోని టీవీకే(తమిళగ వెట్రి కళగం) పార్టీ రాజకీయంగా దూసుకుపోతోంది. ఈ క్రమంలో సేలంలోని సీల నాయకన్‌పట్టిలో ఫిబ్రవరి 13, 2026న నిర్వహించిన పార్టీ కార్యకర్తల సమావేశం ఓ విషాదంతో ముగిసింది. విజయ్‌ను చూసేందుకు మహారాష్ట్ర నుంచి వచ్చిన సూరజ్ (37) అనే అభిమాని సభా ప్రాంగణంలోనే ఫిట్స్ వచ్చి స్పృహ తప్పి పడిపోయారు. వెంటనే ఆసుపత్రికి తరలించినప్పటికీ.. మార్గమధ్యంలోనే ఆయన మరణించడం పార్టీ శ్రేణుల్లో తీవ్ర విషాదాన్ని నింపింది. ప్రాథమిక సమాచారం ప్రకారం, విపరీతమైన ఎండ, రద్దీ కారణంగా వచ్చిన గుండెపోటు సూరజ్ మరణానికి కారణమని తెలుస్తోంది.

కరూర్ ఘటనను మరువకమేందే.. విమర్శల వెల్లువ
గతేడాది సెప్టెంబర్‌లో కరూర్‌లో జరిగిన విజయ్ ప్రచార సభలో తొక్కిసలాట జరిగి సుమారు 41 మంది ప్రాణాలు కోల్పోయిన ఘటన దేశవ్యాప్తంగా సంచలనం సృష్టించింది. ఆ చేదు జ్ఞాపకాలు ఇంకా పచ్చిగానే ఉండగా.. సేలం సభలో మరో ప్రాణం పోవడంపై తీవ్ర విమర్శలు వెల్లువెత్తుతున్నాయి. కరూర్‌లో జరిగిన పొరపాట్ల నుంచి నిర్వాహకులు ఎటువంటి పాఠాలు నేర్చుకోలేదని.. కనీస భద్రతా ప్రమాణాలు పాటించడంలో పార్టీ విఫలమైందని రాజకీయ విశ్లేషకులు, ప్రత్యర్థులు మండిపడుతున్నారు.

వసతుల లేమి, నిర్వాహక లోపం
సేలం సభలో సుమారు 5,000 మందికి మాత్రమే అనుమతి ఉండగా.. దానికి రెట్టింపు సంఖ్యలో జనం తరలివచ్చారు. మండుతున్న ఎండలో నిలబడటానికి కనీసం నీడ లేదా కూర్చునేందుకు కుర్చీలు కూడా ఏర్పాటు చేయలేదని కార్యకర్తలు ఆవేదన వ్యక్తం చేస్తున్నారు. తగినంత తాగునీటి వసతి లేకపోవడంతో మహిళలు, వృద్ధులు తీవ్ర అస్వస్థతకు గురయ్యారు. వేదికపై విజయ్ ప్రసంగిస్తున్న సమయంలో కింద అభిమానులు ఊపిరి ఆడక ఇబ్బంది పడుతున్నా.. ప్రసంగాన్ని కొనసాగించడం నిర్లక్ష్యానికి పరాకాష్ట అని విమర్శలు వస్తున్నాయి.

రాజకీయ దుమారం, భద్రతపై ప్రశ్నలు:
ఈ ఘటనపై తమిళనాడు అధికార పక్షం (DMK), ఇతర ప్రతిపక్షాలు తీవ్రంగా స్పందిస్తున్నాయి. టీవీకే పార్టీకి రాజకీయ అనుభవం లేకపోవడం, కేవలం ప్రచారంపైనే దృష్టి పెట్టి కార్యకర్తల ప్రాణాలను పణంగా పెడుతున్నారని ఆరోపిస్తున్నారు. వేల సంఖ్యలో పోలీసులను మోహరించినప్పటికీ.. సభా ప్రాంగణం లోపల ఏర్పాట్లను పర్యవేక్షించడంలో పార్టీ వాలంటీర్లు విఫలమయ్యారని పోలీసులు కూడా పేర్కొంటున్నారు. భవిష్యత్తులో జరగబోయే సభల విషయంలో కఠినమైన నిబంధనలు అమలు చేయాల్సిన అవసరం ఉందని ఈ ఘటన మరోసారి గుర్తుచేస్తోంది.

English summary

Tragedy struck Vijay TVK Salem Rally as Suraj, a 37-year-old fan from Maharashtra, died after collapsing. This incident recalls the fatal Karur stampede that claimed 41 lives.