తృణమూల్ లో భారీ కుదుపు: మాజీ మంత్రి అరెస్ట్.. !!
పశ్చిమ బెంగాల్ రాజకీయాల్లో మరో భారీ కుదుపు చోటుచేసుకుంది. తృణమూల్ కాంగ్రెస్ చెందిన సీనియర్ నాయకుడు, మాజీ మంత్రి ఉదయన్ గుహ అరెస్ట్ అయ్యారు. ఆయనను పోలీసులు నాటకీయ పరిణామాల మధ్య అరెస్ట్ చేశారు. కోల్కతాలోని ఫూల్బగన్ ప్రాంతంలో ఉన్న ఆయన నివాసంలో కొద్దిసేపటి కిందటే కూచ్ బెహర్ జిల్లా పోలీసులు అదుపులోకి తీసుకున్నారు. పశ్చిమ బెంగాల్లో ఇటీవల కాలంలో అరెస్ట్ అయిన నాలుగో మాజీ మంత్రి ఆయన.
ఈ అరెస్ట్ వ్యవహారం రాజకీయ వర్గాల్లో చర్చనీయాంశమైంది. ఉదయన్ గుహను తదుపరి విచారణ, న్యాయపరమైన ప్రక్రియల నిమిత్తం దిన్హతాకు తరలించేందుకు పోలీసులు అవసరమైన ఏర్పాట్లు చేస్తున్నారు. తన అరెస్టుపై ఉదయన్ గుహ విస్మయం వ్యక్తం చేశారు. పోలీసు వాహనం ఎక్కే సమయంలో ఆయన మీడియాతో మాట్లాడారు. తనను ఏ కారణంతో అరెస్ట్ చేస్తున్నారో అధికారులకు కూడా స్పష్టత లేదని వ్యాఖ్యానించారు. అసలు కారణం తనకు కూడా తెలియట్లేదని పేర్కొన్నారు.
పోలీసు ఉన్నతాధికారుల కథనం ప్రకారం.. గత జూన్ 12 నాటి ఒక బలవంతపు వసూళ్ల కేసు ఆధారంగా ఈ అరెస్ట్ జరిగినట్లు తెలుస్తోంది. దిన్హతా సబ్ డివిజనల్ ఆసుపత్రిలో నూతనంగా నిర్మించిన పీడియాట్రిక్ విభాగానికి సంబంధించిన పనుల విషయంలో ఓ స్వచ్ఛంద సంస్థ ముసుగులో భారీగా సొమ్ము వసూలు చేశారని పోలీసులకు ఫిర్యాదు అందింది. ఈ ఫిర్యాదుపై ప్రాథమిక దర్యాప్తు జరిపిన అనంతరం పోలీసులు ఈ చర్యకు ఉపక్రమించినట్లు తెలుస్తోంది.
ఉదయన్ గుహ.. మంత్రిగానే కాకుండా నిరంతరం వివాదాల ద్వారా వార్తల్లో నిలిచే నాయకుడిగా పేరుపొందారు. సీనియర్ ఫార్వర్డ్ బ్లాక్ అగ్రనేత కమల్ గుహ కుమారుడైన ఆయన, మమతా బెనర్జీ ప్రభుత్వంలో ఉత్తర బెంగాల్ అభివృద్ధి శాఖ మంత్రిగా బాధ్యతలు నిర్వర్తించారు. విపక్ష నాయకులను బహిరంగంగా బెదిరించడం, దాడులకు ఉసిగొల్పడం వంటి ఆరోపణలు ఆయనపై ఉన్నాయి. ప్రస్తుతం ఆయనపై వివిధ పోలీస్ స్టేషన్లలో ఆరుకు పైగా కేసులు నమోదయ్యాయి.
2021 అసెంబ్లీ ఎన్నికల పోలింగ్, 2024 లోక్సభ ఎన్నికల ఫలితాల అనంతరం కూచ్ బెహర్ జిల్లా పరిధిలో జరిగిన హింసాకాండలో ఉదయన్ గుహ కీలక పాత్ర పోషించారనే ఆరోపణలు ఉన్నాయి. ఎన్నికల అనంతర హింస, ప్రత్యర్థుల ఇళ్లపై దాడుల కేసులతో పాటు పలు భూ కబ్జాలు, అవినీతి అక్రమాలకు సంబంధించిన కేసులు కూడా ఆయనను చుట్టుముట్టాయి.
మరోవంక పశ్చిమ బెంగాల్లో అసెంబ్లీ ఎన్నికల ఫలితాలు వెలువడిన అతి కొద్దిరోజుల వ్యవధిలోనే నలుగురు మాజీ మంత్రులు జైలుపాలు కావడం తృణమూల్ కాంగ్రెస్కు రాజకీయంగా గట్టి ఎదురుదెబ్బగా పరిణమించింది. కేంద్ర దర్యాప్తు సంస్థల వ్యూహాత్మక చర్యల వల్ల సుజిత్ బోస్ కస్టడీలోకి వెళ్లగా, పశ్చిమ బెంగాల్ రాష్ట్ర పోలీసుల ఆధ్వర్యంలో దిలీప్ మండల్, ఉజ్జల్ బిశ్వాస్, ఇప్పుడు ఉదయన్ గుహ వరుసగా అరెస్ట్ కావడం ప్రాధాన్యతను సంతరించుకుంది.
Click it and Unblock the Notifications
Sign in with Google