తమిళనాడు ఎన్నికలు.. విజయ్ హామీలు ఇవే..

తమిళనాడులో అసెంబ్లీ ఎన్నికల వేళ టీవీకే అధ్యక్షుడు, దళపతి విజయ్ అధికారమే లక్ష్యంగా దూసుకెళ్తున్నారు. తాజాగా ఓటర్లపై హామీల వర్షం కురిపించారు. మహిళల అభివృద్ధి, ఆర్థిక ప్రగతి లక్ష్యంగా హామీలు ప్రకటించారు విజయ్. ఈ మేరకు అన్ని రకాల ప్రభుత్వ బస్సుల్లో మహిళలకు ఉచిత ప్రయాణం, పాఠశాల చిన్నారులకు ఏటా రూ.15 వేలు ఆర్థిక సాయం, అలాగే మహిళల రక్షణ కోసం ప్రత్యేక పోలీసు విభాగం వంటివి విజయ్ ప్రకటించిన హామీల్లో ఉన్నాయి. విజయ్ హామీల నేపథ్యంలో తమిళనాడులో ఎన్నికలు రసవత్తవంగా మారనున్నాయి.

తమిళనాడులో అసెంబ్లీ ఎన్నికలు సమీపిస్తున్నాయి. ఎన్నికల్లో అధికారాన్ని కాపాడుకునేందుకు డీఎంకే పార్టీ ప్రయత్నిస్తోంది. తొలిసారి అధికారాన్ని చేజిక్కించుకునేందుకు విజయ్ అధ్యక్షతన టీవీకే పార్టీ శాయశక్తులా కృషి చేస్తోంది. మరోవైపు అన్నాడీఎంకే- ఎన్డీయే కూటమి.. ఈ సారి అధికారం తమదేనని ధీమా వ్యక్తం చేస్తున్నాయి. ఈ నేపథ్యంలో తమిళనాట ఎన్నికలు రసవత్తరంగా మారాయి. ఎవరు గెలిచినా చరిత్ర సృష్టించే అవకాశం ఉన్నట్లు తెలుస్తోంది.

ఈ నేపథ్యంలో కోలీవుడ్ స్టార్ హీరో, విజయ్ దళపతి టీవీకే పార్టీ పెట్టిన విషయం తెలిసిందే. తొలిసారిగా ఆయన పార్టీ ఎన్నికల బరిలో దిగుతోంది. దాంతో తాజాగా నిర్వహించిన సమావేశంలో విజయ్ హామీల వర్షం కురిపించారు. టీవీకే పార్టీకి ఓటేస్తే అంటూ వరాల జల్లు కురిపించారు. రాష్ట్రంలోని అర్హులైన ప్రతి మహిళకు ప్రతి నెలా రూ. 2,500 అందజేయనున్నట్లు ప్రకటించారు. అలాగే యువతులకు పెళ్లి గిఫ్ట్ కింద బంగారం, చీరను అందించనున్నట్లు తెలిపారు. అలాగే అర్హులైన అన్ని కుటుంబాలకు 6 సిలిండర్లు ఉచితంగా అందజేయనున్నట్లు పేర్కొన్నారు.

అంతర్జాతీయ మహిళా దినోత్సవం సందర్భంగా తమిళనాడులోని మామల్లాపురంలో నిర్వహించిన కార్యక్రమంలో విజయ్ ఈ కీలక హామీలను ప్రకటించారు. అర్హులైన కుటుంబాలకు ప్రతి ఏటా ఆరు సిలిండర్లను అందించనున్నట్లు తెలిపారు. ఈ పథకానికి అన్నపూర్ణి సూపర్ సిక్స్ స్కీమ్ అని పెట్టినట్లు స్పష్టం చేశారు. అలాగే పాఠశాలల్లో డ్రాప్ అవుట్ లను తగ్గించేందుకు చిన్నారులను బడికి పంపే ప్రతి తల్లి లేదా సంరక్షకురాలికి సంవత్సరానికి రూ. 15 వేలు అందజేయనున్నట్లు తెలిపారు. దీనికి కామరాజార్ కల్వి ఉరుత్తి తిత్తమ్ అనే పేరును ఖరారు చేశారు.