H1B visa: భారతీయులకు గుడ్‌న్యూస్‌: ఇకపై అమెరికాలోనే వీసా రెన్యూవల్‌

వాషింగ్టన్/న్యూఢిల్లీ: అమెరికాలో పనిచేస్తున్న భారతీయులకు అగ్రదేశం తీపి కబురు చెప్పింది. యూఎస్​ ప్రభుత్వం హెచ్​1బీ వీసా (H1B Visa) రెన్యువల్​ విధానాన్ని మరింత సరళీకరించేందుకు కీలక నిర్ణయం తీసుకుంది. ఇందులో భాగంగా కొన్ని కేటగిరీల హెచ్​1బీ వీసాలను.. అమెరికాలోనే రెన్యువల్ చేసుకునేందుకు వీలు కల్పించనుంది. ఈ డిసెంబర్​‌లో ఓ పైలట్​ ప్రోగ్రామ్ (డొమెస్టిక్​ వర్క్​ వీసా రెన్యువల్​) ప్రారంభించనున్నట్లు ప్రకటించింది.

కాగా, డిసెంబర్‌​లో ప్రారంభం కానున్న ఈ పైలట్ ప్రోగ్రామ్​ 3 నెలలపాటు అందుబాటులో ఉంటుందని వీసా సర్వీసెస్​ డిప్యూటీ అసిస్టెంట్ సెక్రటరీ జూలీ స్టఫ్ తెలిపారు. ఈ పైలట్ ప్రోగ్రామ్​ కింద తొలత 20 వేల మందికి వీసా రెన్యువల్ చేయనున్నట్లు ఆమె ప్రకటించారు. కాగా, ఈ నిర్ణయం భారతీయులకు ఎంతో మేలు చేయనుంది.

భారత్‌​లో H1B వీసాలకు డిమాండ్ ఎక్కువగా ఉంటుంది. అందుకే భారతీయులకు వీలైనంత త్వరగా వీసా అపాయింట్​మెంట్​లు ఇచ్చేందుకు మేము ప్రయత్నిస్తున్నామని జూలీ తెలిపారు. ఇందులో భాగంగానే.. అమెరికాలోనే H1B వీసా రెన్యువల్ చేసేందుకు ఒక పైలట్ ప్రోగ్రామ్​ ప్రారంభిస్తున్నామన్నారు. డిసెంబర్​ నుంచి 3 నెలలపాటు ఈ ప్రోగ్రామ్ అందుబాటులో ఉంటుందని చెప్పారు.

ఈ క్రమంలో అమెరికాలో ఉన్న హెచ్​1బీ వీసాదారులు తమ స్వదేశాలకు వెళ్లకుండానే.. తమ వీసాలను రెన్యువల్ చేసుకోవచ్చు. తొలుత ఈ పైలట్ ప్రోగ్రామ్​ కింద 20 వేల మందికి వీసాలు పునరుద్ధరిస్తామని.. ఇందులో మెజార్టీ భాగం భారతీయులే ఉంటారని భావిస్తున్నామని తెలిపారు.ఇక, ఈ వీసా రెన్యువల్​ ప్రోగ్రామ్​ను క్రమక్రమంగా విస్తరిస్తామని యూఎస్​ వీసా సర్వీసెస్​ డిప్యూటీ అసిస్టెంట్ సెక్రటరీ జూలీ స్టఫ్ వివరించారు. స్టూడెంట్ వీసాలు కూడా ఈ ఏడాది మరింత పెరగనున్నట్లు తెలిపారు. భారతీయులకు తక్కువ సమయంలోనే వీసాలు వచ్చేలా చర్యలు తీసుకుంటున్నామన్నారు.

English summary

H-1B visas: US to start domestic work visa renewal from this december.