టారిఫ్ గొడవల మధ్య- అమెరికాలో నివసించే భారతీయుల కోసం కొత్తగా..

అమెరికాలో భారతీయుల సంఖ్య భారీగా పెరుగుతోంది. ఈ నేపథ్యంలో విదేశాంగ మంత్రిత్వ శాఖ తన దౌత్య సేవలను మరింత విస్తరించింది. ఈ క్రమంలో- అమెరికా వ్యాప్తంగా కొత్తగా ఎనిమిది ఇండియన్ కాన్సులర్ అప్లికేషన్ సెంటర్లను ఏర్పాటు చేస్తున్నట్లు వెల్లడించింది.

ఈ మేరకు అమెరికాలో భారత రాయబారి వినయ్ క్వాట్రా వెల్లడించారు. దీనికి సంబంధించిన ఓ వీడియోను ఆయన అమెరికాలో భారత రాయబార కార్యాలయం అధికారిక ఎక్స్ అకౌంట్ లో పోస్ట్ చేశారు. నేటి నుండి ఈ కొత్త కాన్సులర్ అప్లికేషన్ సెంటర్లు అందుబాటులోకి వచ్చాయని తెలిపారు.

బోస్టన్, కొలంబస్, డల్లాస్, డెట్రాయిట్, ఆడైసన్, ఒర్లాండో, రాలీ, శాన్ హోసే నగరాలలో ఈ కొత్త భారతీయ కాన్సులర్ అప్లికేషన్ కేంద్రాలు ప్రారంభం అయ్యాయి. ఈ కొత్త కేంద్రాల ఏర్పాటు ద్వారా భారతీయ డయాస్పోరాకు కాన్సులర్ సేవలు మరింత అందుబాటులోకి వస్తాయని, సేవలు సులభతరం, వేగవంతమౌతాయని వినయ్ క్వాట్రా పేర్కొన్నారు.

త్వరలోనే లాస్ ఏంజెల్స్‌లో మరో కేంద్రాన్ని కూడా ప్రారంభించనున్నట్లు ఆయన వెల్లడించారు. ఈ కేంద్రాల ఏర్పాటుతో- అమెరికా వ్యాప్తంగా నివసించే లక్షలాది మంది భారతీయులకు కాన్సులర్ సేవలు మరింత చేరువ చేసినట్టవుతుందని అన్నారు. అప్లికేషన్లు మరింత ప్రాసెస్ అవుతాయని చెప్పారు.

శనివారాల్లో కూడా ఈ కాన్సులర్ అప్లికేషన్ సెంటర్ల కార్యకలాపాలు కొనసాగుతాయని క్వాట్రా తెలిపారు. బోస్టన్, లాస్ ఏంజిల్స్‌లలో కొత్త కాన్సులేట్లను తెరవడం ద్వారా భారత్-అమెరికా భాగస్వామ్యాన్ని.. ముఖ్యంగా ఇరు దేశాల ప్రజల మధ్య సంబంధాలను మరింత బలోపేతం చేయగలమని ఆయన అభిప్రాయపడ్డారు.

భారతీయ డయాస్పోరా సభ్యులు భారత ఎంబసీ వెబ్‌సైట్‌ను క్రమం తప్పకుండా సందర్శించాలని రాయబారి క్వాత్రా కోరారు. ఈ కొత్త కాన్సులర్ అప్లికేషన్ కేంద్రాల ప్రారంభం, వివిధ కాన్సులర్ సేవల లభ్యతకు సంబంధించిన వివరణాత్మక సమాచారం ఆ వెబ్‌సైట్‌లో అందుబాటులో ఉంటుందని ఆయన సూచించారు.

Announcing major expansion of our Consular Services in USA beginning August 01, 2025. Here is a message from Ambassador Vinay Kwatra about this expansion and the positive changes it would bring to our service delivery. pic.twitter.com/w35fakWDTo

— India in USA (@IndianEmbassyUS) July 31, 2025

విదేశాంగ మంత్రిత్వ శాఖ గణాంకాల ప్రకారం, అమెరికాలో సుమారు 5.4 మిలియన్ల భారతీయ మూలాలున్న ప్రజలు నివసిస్తున్నారు. ఇందులో 2.07 మిలియన్ల నాన్-రెసిడెంట్ ఇండియన్స్ (NRIలు) ఉన్నారు. భారతీయ డయాస్పోరా, భారత్-అమెరికా సంబంధాలను పెంపొందించడంలో కీలక పాత్ర పోషిస్తోంది.

English summary

India's Ambassador to the United States, Vinay Kwatra, on Thursday announced the opening of eight new Indian Consular Application Centres across the United States. అమెరికాలో నివసించే భారతీయుల కోసం విదేశాంగ మంత్రిత్వ శాఖ తీపి కబురు వినిపించింది.