గాలిలో విమానం.. మహిళకు డెలివరీ చేసిన పైలట్; తల్లీ, బిడ్డ సేఫ్

తైవాన్: ఓ పైలట్ వైద్యుడిగా మారాడు. విమానంలో పురిటి నొప్పులతో బాధపడుతున్న ఓ గర్భిణికి విమాన పైలట్‌ విజయవంతంగా డెలివరీ చేశారు. దీంతో ఆ తల్లీ, బిడ్డ కూడా క్షేమంగా ఉన్నారు. ఈ అనూహ్య ఘటన తైవాన్ నుంచి బ్యాంకాక్‌​కు వెళ్తున్న వీట్‌జెట్‌కు చెందిన విమానంలో జరిగింది.

ఇందుకు సంబంధించిన వివరాల్లోకి వెళితే.. తైవాన్‌ నుంచి బ్యాంకాక్‌కు వెళ్తున్న విమానంలో ఒక గర్భిణి ప్రయాణిస్తోంది. అయితే, టేకాఫ్‌ అయిన కాసేపటికి ఆమెకు పురిటి నొప్పులు మొదలయ్యాయి. బాత్​రూమ్​‌లో ఆమెను చూసిన సిబ్బంది ఈ విషయాన్ని పైలట్‌ జాకరిన్‌కు తెలియజేశారు. ల్యాండింగ్‌కు ఇంకా సమయం ఉండటంతో గర్భిణికి డెలివరీ చేయాల్సిన పరిస్థితి ఏర్పడింది.

సమయానికి విమానంలో వైద్యులు​ కూడా అందుబాటులో లేకపోవడం వల్ల పైలట్‌ తల్లీబిడ్డలను కాపాడే ప్రయత్నం చేశారు. ముందుగా తన బాధ్యతలను కో-పైలట్‌కు అప్పగించారు. సెల్‌ఫోన్‌ ద్వారా వైద్యులను సంప్రదించిన పైలట్‌, వారి సూచనలతో గర్భిణికి విజయవంతంగా పురుడు పోశారు. దీంతో తల్లీ, బిడ్డ సురక్షితంగా ఉన్నారు.

ఈ నేపథ్యంలో పైలట్‌ జాకరిన్‌పైప్రయాణికులంతా ప్రశంసలు కురిపించారు. విమానంలో జన్మించిన ఈ చిన్నారికి సిబ్బంది ముద్దుగా 'స్కై' అని పేరు పెట్టడం విశేషం. ల్యాండింగ్‌ అనంతరం తల్లీబిడ్డలను వైద్య సిబ్బంది పరీక్షించారు. వారు ఆరోగ్యంగా ఉన్నట్లు తెలిపారు. కాగా, 18 ఏళ్లుగా పైలట్‌గా వ్యవహరిస్తున్న జాకరిన్‌ గతంలో ఎప్పుడు ఈ పరిస్థితిని ఎదుర్కోలేదన్నారు.

కాగా, ఇంటర్నేషనల్‌ సొసైటీ ఆఫ్ ట్రావెల్‌ మెడిసిన్‌ 2020లో చేసిన అధ్యయనం ప్రకారం.. 1929 నుంచి 2018 మధ్య వివిధ విమానాల్లో ఇలాంటి ఘటనలు చోటు చేసుకున్నాయి. మొత్తం విమానంలో 74 మంది చిన్నారులు జన్మించగా అందులో 71 మంది సురక్షితంగా ఉన్నట్లు వెల్లడించింది.

English summary

pilot helps deliver baby mid flight after woman goes in labour.