ఆకాశంలో మొదలైన ప్రేమ కథ. ఆయన్ని మైమరిపించిన సారా!

ప్రపంచ రాజకీయ యవనికపై ఇజ్రాయెల్ ప్రధాని బెంజమిన్ నెతన్యాహు ఒక తిరుగులేని యోధుడు. కానీ ఆ పవర్‌ఫుల్ లీడర్‌ను నడిపించే ఒక అదృశ్య శక్తి.. దేశ అధికారిక నిర్ణయాలను ప్రభావితం చేయగల ఒక 'షాడో పవర్' ఆమె! ఆకాశంలో ఎయిర్ హోస్టెస్‌గా ప్రయాణం మొదలుపెట్టి, ఇజ్రాయెల్ దేశపు ఫస్ట్ లేడీగా ఎదిగిన సారా నెతన్యాహు (Sara Netanyahu) ప్రస్థానం ఒక సంచలనం. భారత ప్రధాని మోడీకి ప్రోటోకాల్ పక్కన పెట్టి స్వాగతం పలికిన ఆత్మీయత ఒకవైపు.. అవినీతి ఆరోపణలు, క్రిమినల్ విచారణలతో అట్టుడుకుతున్న వివాదాలు మరోవైపు.

ఒకవైపు పిల్లల సైకాలజిస్ట్ గా చిన్నారుల మనసులను చదివే సారా, మరోవైపు దేశ రాజకీయాలనే తన కనుసన్నలతో శాసిస్తోందన్న ఆరోపణలు ఆమె చుట్టూ ఉన్నాయి. ఇంతకీ ఎవరీ సారా నెతన్యాహు? ఆమె ఇజ్రాయెల్ రాజకీయాల్లో ఎందుకు అంత పవర్‌ఫుల్? నెతన్యాహు ఎందుకు ఆమెను 'వీరవనిత' అని కొనియాడుతారు?

సారా నెతన్యాహు జీవితం ఒక సినిమా కథను తలపిస్తుంది. 1958లో ఒక విద్యావేత్త కూతురుగా జన్మించిన సారా, విద్యాభ్యాసం తర్వాత ఇజ్రాయెల్ జాతీయ విమానయాన సంస్థ 'ఎల్ అల్' (El Al) లో ఎయిర్ స్టీవార్డెస్‌గా పనిచేశారు. అక్కడే ఆమెకు బెంజమిన్ నెతన్యాహుతో పరిచయం ఏర్పడింది. అది కాస్తా ప్రేమగా మారి 1991లో పెళ్లికి దారితీసింది. నెతన్యాహుకు ఇది మూడవ వివాహం.

Sara Netanyahu వృత్తి సైకాలజిస్ట్.. ప్రవృత్తి పాలిటిషియన్!

సారా కేవలం గృహిణి మాత్రమే కాదు. ఆమె జెరూసలేం మున్సిపాలిటీలో బాలల మనస్తత్వవేత్తగా (Child Psychologist) పనిచేస్తున్నారు. అయితే, వృత్తి సైకాలజిస్ట్ అయినా.. ఆమె ప్రవృత్తి మాత్రం రాజకీయాలే అని ఇజ్రాయెల్ మీడియా కోడై కూస్తుంది. ప్రభుత్వంలో ఎలాంటి అధికారిక పదవి లేకపోయినా, కీలక నియామకాల్లోనూ, భర్త తీసుకునే రాజకీయ నిర్ణయాల్లోనూ ఆమె జోక్యం ఉంటుందనే ఆరోపణలు ఎప్పుడూ వినిపిస్తూనే ఉంటాయి.

Welcome to Israel my dear friend @narendramodi 🇮🇱🙏🇮🇳 pic.twitter.com/AnRtceD9Ci

— Benjamin Netanyahu - בנימין נתניהו (@netanyahu) February 25, 2026

"నా భార్య.. నేను": నెతన్యాహు వెనక అసలు శక్తి

నెతన్యాహు తన ప్రతి అధికారిక ప్రకటనలోనూ "నా భార్య, నేను" అనే పదాన్ని తరచుగా వాడుతుంటారు. ఇది ఇజ్రాయెల్ ప్రజల్లో చర్చనీయాంశంగా మారింది. విమర్శకులు ఆమెను రాజకీయ జోక్యదారు అని పిలిస్తే, నెతన్యాహు మాత్రం ఆమెను ఒక "వీరవనిత" అని, మీడియా తన భార్యను కావాలనే "బలిపశువు" చేస్తోందని వెనకేసుకొస్తారు.

వివాదాలు.. విచారణలు.. క్రిమినల్ కేసులు

సారా నెతన్యాహు పేరు వినగానే వివాదాలు కూడా వెన్నంటే వస్తాయి. అవినీతి, మోసం, నమ్మకద్రోహం వంటి తీవ్రమైన ఆరోపణలు ఆమెపై ఉన్నాయి. ప్రభుత్వ నిధులను వ్యక్తిగత ప్రయోజనాల కోసం వాడుకున్నారనే కేసుల్లో ఆమె ఇప్పటికే విచారణను ఎదుర్కొన్నారు. తాజాగా తన భర్తపై ఉన్న అవినీతి కేసులో సాక్షులను బెదిరించడానికి ప్రయత్నించారనే ఆరోపణలపై పోలీసులు ఆమెపై క్రిమినల్ విచారణ కూడా ప్రారంభించారు.

ఇంకా..

• కుటుంబ నేపథ్యం: ఆమె తండ్రి షుముయెల్ బెన్-ఆర్ట్జి ఒక ప్రసిద్ధ రచయిత, కవి. ఆమె సోదరులందరూ బైబిల్ క్విజ్ విజేతలు.
• రెండవ వివాహం: నెతన్యాహు కంటే ముందు ఆమె ఒక కిబ్బుట్జ్ సభ్యుడిని వివాహం చేసుకుని విడాకులు తీసుకున్నారు.
• అంతర్జాతీయ గుర్తింపు: నెతన్యాహు చేసే ప్రతి విదేశీ పర్యటనలోనూ సారా ప్రముఖంగా కనిపిస్తారు, ఇది ఆమెకు అంతర్జాతీయ స్థాయిలో గుర్తింపు తెచ్చింది.

English summary

Explore the fascinating and controversial life of Sara Netanyahu, wife of Israel's PM Benjamin Netanyahu. From her career as a child psychologist to her legal battles and political power.