Ramzan నెలవంక దర్శనంపై ఉత్కంఠ.. పండుగ ఎప్పుడు?
ముస్లిం సోదరుల అత్యంత పవిత్ర పండుగ 'ఈద్ ఉల్-ఫితర్' (రంజాన్) కోసం ప్రపంచం సిద్ధమైంది. నెల రోజుల పాటు పగలు రేయి తేడా లేకుండా అల్లాహ్ ధ్యానంలో, ఉపవాస దీక్షల్లో గడిపిన భక్తులు.. ఇప్పుడు షవ్వాల్ నెలవంక కోసం ఆకాశం వైపు ఆశగా ఎదురుచూస్తున్నారు. సౌదీ అరేబియా, యూఏఈ, ఖతార్ వంటి గల్ఫ్ దేశాల్లో మార్చి 18 (బుధవారం) సాయంత్రమే నెలవంకను చూసే ప్రయత్నాలు మొదలయ్యాయి. ఖగోళ అంచనాల ప్రకారం ఈ ప్రాంతాల్లో శుక్రవారం ఈద్ జరుపుకునే అవకాశం ఎక్కువగా కనిపిస్తోంది.
భారతదేశం, పాకిస్థాన్, బంగ్లాదేశ్ వంటి ఉపఖండ దేశాల్లో మార్చి 19 (గురువారం) సాయంత్రం నెలవంకను గుర్తించే ప్రక్రియ జరుగుతుంది. గురువారం నెలవంక కనిపిస్తే.. మార్చి 20, శుక్రవారం ఈద్ జరుపుకుంటారు. ఒకవేళ వాతావరణ పరిస్థితుల వల్ల చంద్రదర్శనం కాకపోతే, రంజాన్ 30 రోజులు పూర్తయి మార్చి 21 (శనివారం) నాడు పండుగ వేడుకలు ఘనంగా జరుగుతాయి. అంటే ఈసారి ముస్లిం ప్రపంచమంతా శుక్రవారం నుంచి ఆదివారం వరకు ఒకే వారాంతంలో పండుగ జరుపుకునే అరుదైన అవకాశం కనిపిస్తోంది.
మక్కాలో భక్తి పారవశ్యం.. పెరిగిన భద్రత
రంజాన్ ముగింపు సందర్భంగా మక్కాలోని గ్రాండ్ మసీదులో ఖురాన్ పారాయణం పూర్తయిన దృశ్యాలు భక్తులను మంత్రముగ్ధులను చేస్తున్నాయి. వేలాది మంది భక్తులు ఏకధాటిగా ప్రార్థనలు చేస్తున్న వైమానిక దృశ్యాలు సోషల్ మీడియాలో వైరల్ అవుతున్నాయి. అయితే, ప్రస్తుత ప్రాంతీయ ఉద్రిక్తతల దృష్ట్యా సౌదీ, యూఏఈ ప్రభుత్వాలు మక్కా, మదీనా వంటి పవిత్ర స్థలాల వద్ద భద్రతను కట్టుదిట్టం చేశాయి. ప్రార్థనల సమయంలో రద్దీని నియంత్రించేందుకు ప్రత్యేక మార్గదర్శకాలను జారీ చేశాయి.
Aerial footage of the night of completing the recitation of the Holy Quran at the Prophet's Mosque
— Inside the Haramain (@insharifain) March 17, 2026
pic.twitter.com/2ZYd6JrkSI
Ramzan ఫిత్రానా - దానగుణం
ఈద్ సంబరాల్లో దానధర్మాలకు పెద్దపీట వేస్తారు. ఈ ఏడాది ఫిత్రానా (జకాత్ అల్-ఫితర్) మొత్తాన్ని ఒక్కొక్కరికి 25 దిర్హామ్లు లేదా రియాల్స్ (సుమారు 2.5 కిలోల ధాన్యం) గా నిర్ణయించారు. పండుగ నాడు పేదవాడు కూడా ఆకలితో ఉండకూడదనే ఉద్దేశంతో ఈద్ ప్రార్థనకు ముందే ఈ మొత్తాన్ని పంపిణీ చేయాలని ఇస్లాం పెద్దలు సూచిస్తున్నారు. మరోవైపు, భారత్-యూఏఈల మధ్య ఉన్న బలమైన బంధానికి గుర్తుగా ప్రధాని నరేంద్ర మోడీ యూఏఈ అధ్యక్షుడు మహ్మద్ బిన్ జాయెద్కు ముందస్తు ఈద్ శుభాకాంక్షలు తెలియజేశారు.
Ramzan సంప్రదాయాల సందడి.. సెలవుల వెల్లువ
పండుగ అంటేనే పిండివంటలు, కొత్త బట్టలు, మెహందీ అలంకరణలు. ముఖ్యంగా మహిళలు 'చాంద్ రాత్' (నెలవంక రాత్రి) కోసం మెహందీ డిజైన్లతో సిద్ధమవుతున్నారు. పండుగ సందర్భంగా ఖతార్ ఏడు రోజుల పాటు (మార్చి 17-23) సుదీర్ఘ సెలవును ప్రకటించగా, యూఏఈ, సౌదీలలో కూడా ఐదు రోజుల పాటు ప్రభుత్వ కార్యాలయాలకు సెలవులు ప్రకటించారు. సామాజిక ఐక్యత, కరుణ, త్యాగం వంటి విలువలను చాటిచెప్పే ఈద్ ఉల్-ఫితర్ ప్రపంచానికి శాంతి సందేశాన్ని పంచుతోంది.
Click it and Unblock the Notifications
Sign in with Google