ట్రంప్ మాటలు నమ్మొద్దు.. యుద్ధం కొనసాగుతోంది: ఇరాన్ సంచలనం

పశ్చిమాసియాలో 20 రోజులకుపైగా ఉద్రిక్తతలు కొనసాగుతూనే ఉన్నాయి. ఇరాన్ పై ఇజ్రాయెల్- అమెరికా సంయుక్తంగా దాడులకు పాల్పడుతున్నాయి. అటు ఇరాన్ సైతం ఇజ్రాయెల్, అమెరికాపై ప్రతీకార దాడులను కొనసాగిస్తోంది. ఈ పరిణామాల నేపథ్యంలో ట్రంప్ తాజాగా కీలక ప్రకటన చేశారు. ఇరాన్ పై దాడులను 5 రోజులపాటు నిలిపివేయాలని సైన్యానికి కీలక ఆదేశాలు జారీ చేశారు. అలాగే హార్మూజ్ జలసంధిని తెరవాలంటూ ఇరాన్ కు విధించిన 48 గంటల డెడ్ లైన్ ను సైతం ట్రంప్ వాయిదా వేశారు.

అయితే ఇరాన్ తో గత రెండు రోజులుగా జరుగుతున్న చర్చలు విజయవంతం అవుతున్నాయని.. చర్చలు సఫలీకృతం అవుతున్నట్లు ట్రంప్ స్పష్టం చేశారు. అయితే ట్రంప్ వ్యాఖ్యల్ని ఇరాన్ వెంటనే ఖండించింది. ఇరాన్- అమెరికా మధ్య ఎలాంటి చర్చలు జరగలేదని పేర్కొంది. డైరెక్ట్ గానీ ఇండైరెక్ట్ చర్చలు గానీ అమెరికా- ఇరాన్ మధ్య జరగలేదని క్లారిటీ ఇచ్చింది.

ఈ మేరకు అంతర్జాతీయ ఎనర్జీ ఏజెన్సీ(IEA) ఎగ్జిక్యూటివ్ డైరెక్టర్ ఫతీ బిరోల్ కీలక విషయాలను వెల్లడించారు. పశ్చిమాసియాలో ప్రస్తుత పరిస్థితి మరింత దారుణంగా మారిందని అన్నారు. 1970 దశకంలో వచ్చిన రెండు ఎనర్జీ సంక్షోభాల కంటే ఇది మరింత దారుణం అని పేర్కొన్నారు. ప్రస్తుతం ఇరాన్- ఇజ్రాయెల్- అమెరికా మధ్య నెలకొన్న ఉద్రిక్త పరిస్థితులు సద్దుమణగాలంటే హార్మూజ్ జలసంధిని తెరవాల్సిన అవసరం ఉందని అన్నారు.

మరోవైపు ఇటీవల ఇరాన్ కు ట్రంప్ 48 గంటల డెడ్ లైన్ విధించిన విషయం తెలిసిందే. ఇరాన్ 48 గంటల్లో హార్మూజ్ జలసంధిని తెరవకపోతే ఇరాన్ లోని ఎనర్జీ స్థావరాలపై దాడులు చేస్తామని ప్రకటన చేశారు. అయితే తాజాగా ట్రంప్ మరో కీలక ప్రకటన చేసిన విషయం తెలిసిందే. ఇరాన్ పై దాడులను 5 రోజులపాటు నిలిపివేయాలని సైన్యానికి కీలక ఆదేశాలు జారీ చేశారు ట్రంప్.

ఇదిలాఉంటే ట్రంప్ మాటలను ఏమాత్రం లెక్కచేయని ఇజ్రాయెల్.. మరోసారి ఇరాన్ పై దాడులు చేపట్టింది. ఇరాన్ లోని మౌలిక సదుపాయాల కల్పనపై దాడులు చేసినట్లు ఇజ్రాయెల్ కు చెందిన ఐడీఎఫ్ స్పష్టం చేసింది. ఈ రాత్రికి దాడులను మరింత పెంచే అవకాశం ఉన్నట్లు ఇజ్రాయెల్ హింట్ ఇచ్చింది. ఈ పరిణామాల నేపథ్యంలో రానున్న ఐదు రోజులు ఇరాన్- ఇజ్రాయెల్- అమెరికా మధ్య యుద్ధం కీలక మలుపులు తిరిగే అవకాశం ఉన్నట్లు తెలుస్తోంది.