ట్రంప్ హెచ్చరికల వేళ లింకన్ రాక: ఇరాన్ సరిహద్దుల్లో యుద్ధ వాతావరణం!

America vs Iran: మధ్యప్రాచ్యంలో రాజకీయ పరిణామాలు వేగంగా మారుతున్నాయి. ముఖ్యంగా అమెరికా-ఇరాన్ దేశాల మధ్య పెరుగుతున్న ఉద్రిక్తతల దృష్ట్యా యునైటెడ్ స్టేట్స్ నేవీ కీలక నిర్ణయం తీసుకుంది. ఇరాన్‌తో ఉద్రిక్తతలు పెరుగుతున్న నేపథ్యంలో అమెరికా తన శక్తివంతమైన అణుశక్తి విమానవాహక నౌక 'యూఎస్‌ఎస్ అబ్రహం లింకన్'ను మధ్యప్రాచ్యానికి తరలిస్తోంది.

ఇండో-పసిఫిక్ నుంచి మధ్యప్రాచ్యానికి..
గత వారం వరకు దక్షిణ చైనా సముద్రంలో సాధారణ కార్యకలాపాల్లో నిమగ్నమైన అబ్రహం లింకన్.. అక్కడ లైవ్-ఫైర్ వ్యాయామాలు, సముద్రంలో ఇంధన పునరుద్ధరణ వంటి కీలక విన్యాసాలను నిర్వహించింది. ప్రస్తుతం ఈ యుద్ధనౌక ఇండో-పసిఫిక్ ప్రాంతం నుంచి బయలుదేరింది. ఈ క్యారియర్ స్ట్రైక్ గ్రూప్ మధ్యప్రాచ్యానికి చేరుకోవడానికి సుమారు ఒక వారం సమయం పడుతుందని అంచనా.

అబ్రహం లింకన్ యుద్ధ దళం విశేషాలు
ఈ భారీ నౌకతో పాటు అత్యాధునిక యుద్ధ విమానాలు, రక్షణ నౌకలు కూడా తోడుగా ఉన్నాయి. దీనిని 'క్యారియర్ స్ట్రైక్ గ్రూప్'గా పిలుస్తారు. ఇందులో ఎఫ్/ఏ-18ఈ/ఎఫ్ సూపర్ హార్నెట్స్, ఈఏ-18జి గ్రోలర్స్, ఈ-2డి అడ్వాన్స్‌డ్ హాకీస్, ఎంహెచ్-60ఆర్/ఎస్ సీహాక్ హెలికాప్టర్లు ఉన్నాయి. అబ్రహం లింకన్‌కు రక్షణగా ఆర్లీ బర్క్-క్లాస్ గైడెడ్-మిసైల్ డిస్ట్రాయర్లు అయిన యూఎస్‌ఎస్ స్ప్రూయెన్స్, యూఎస్‌ఎస్ మైఖేల్ మర్ఫీ ఉన్నాయి. ఈ బృందంలో యూఎస్‌ఎస్ ఫ్రాంక్ ఇ. పీటర్సన్ జూనియర్ అనే అణుశక్తితో పనిచేసే వేగవంతమైన దాడి జలాంతర్గామి కూడా ఉంది. ఇదిలా ఉండగా, ఇప్పటికే పర్షియన్ గల్ఫ్ ప్రాంతంలో యూఎస్‌ఎస్ రూజ్‌వెల్ట్ అనే మరో విధ్వంసక నౌక మోహరించి ఉంది.

వ్యూహాత్మక మార్పుకు కారణం
అక్టోబర్ 2023లో ఇజ్రాయెల్-హమాస్ మధ్య యుద్ధం ప్రారంభమైనప్పటి నుంచి అమెరికా మధ్యప్రాచ్యంలో నిరంతరం తన విమానవాహక నౌకల ఉనికిని కొనసాగిస్తూ వచ్చింది. అయితే గత సెప్టెంబర్‌లో యూఎస్‌ఎస్ నిమిట్జ్ ఆ ప్రాంతాన్ని వీడి కరేబియన్ సముద్రం వైపు వెళ్ళింది. అప్పట్లో వెనిజులాలోని నికోలస్ మదురో పాలనకు వ్యతిరేకంగా దృష్టి సారించడం కోసం ఈ మార్పు చేశారు. ప్రస్తుతం ఇరాన్ ప్రభుత్వం ఆ దేశంలోని నిరసనకారులపై కఠినంగా వ్యవహరిస్తుండటం, అమెరికా అధ్యక్షుడు డొనాల్డ్ ట్రంప్ ఇరాన్‌కు హెచ్చరికలు జారీ చేస్తున్న నేపథ్యంలో, ఈ భారీ యుద్ధ నౌకను తిరిగి మధ్యప్రాచ్యానికి పంపడం అంతర్జాతీయంగా చర్చనీయాంశమైంది.

ఇరాన్ తన గగనతలాన్ని తాత్కాలికంగా మూసివేయడం, అమెరికా తన కీలక స్థావరాల నుంచి సిబ్బందిని తరలించడం వంటి పరిణామాలు యుద్ధ వాతావరణాన్ని తలపిస్తున్నాయి. అబ్రహం లింకన్ రాకతో ఈ ప్రాంతంలో అమెరికా సైనిక బలం మరింత పెరగనుంది.

English summary

As US-Iran tensions escalate, the United States deploys its nuclear-powered aircraft carrier USS Abraham Lincoln to the Middle East, signaling heightened military readiness.