త్వరలో యుద్ధం? టెన్షన్‌లో ప్రపంచ దేశాలు!

అగ్రరాజ్యం అమెరికా, ఇరాన్ దేశాల మధ్య ముదురుతున్న ఉద్రిక్తతలు ఇప్పుడు యుద్ధానికి దారితీసేలా కనిపిస్తున్నాయి. ఇరాన్ అణు కార్యక్రమంపై అమెరికా అధ్యక్షుడు డొనాల్డ్ ట్రంప్ విధించిన గడువు సమీపిస్తుండటంతో పశ్చిమాసియాలో యుద్ధమేఘాలు కమ్ముకున్నాయి.

ముదురుతున్న యుద్ధ మేఘాలు
అమెరికా ప్రెసిడెంట్ డొనాల్డ్ ట్రంప్ తన సోషల్ మీడియా ప్లాట్‌ఫారమ్ 'ట్రూత్ సోషల్' వేదికగా ఇరాన్‌కు గట్టి వార్నింగ్ ఇచ్చారు. "యూఎస్ఎస్ అబ్రహం లింకన్" విమాన వాహక నౌక నేతృత్వంలోని ఓ భారీ సైనిక దళం ఇప్పటికే పశ్చిమాసియాకు చేరుకుంది. అణు ఆయుధాలు లేని న్యాయమైన ఒప్పందం కోసం ఇరాన్ వెంటనే చర్చల టేబుల్ ముందుకు రావాలని.. సమయం మించిపోతోందని ట్రంప్ స్పష్టం చేశారు. ఒకవేళ ఇరాన్ మొండికేస్తే, జూన్ నెలలో జరిగిన దాడుల కంటే ఈసారి దాడి చాలా "భీకరంగా" ఉంటుందని హెచ్చరించారు.

ఇరాన్ ధీటైన సమాధానం
అమెరికా బెదిరింపులకు తాము లొంగే ప్రసక్తి లేదని ఇరాన్ విదేశాంగ మంత్రి అబ్బాస్ అరాగ్చీ తేల్చి చెప్పారు. "మా సైన్యం పూర్తి అప్రమత్తంగా ఉంది. మా వేళ్లు ట్రిగ్గర్‌పై ఉన్నాయి. ఎలాంటి దాడి జరిగినా తక్షణమే, ఊహించని రీతిలో స్పందిస్తాం" అని అబ్బాస్ అరాగ్చీ ప్రకటించారు. సైనిక ఒత్తిడి లేదా బెదిరింపుల నీడలో ఎలాంటి చర్చలు జరగవని, పరస్పర గౌరవం ఉన్నప్పుడే దౌత్యం సాధ్యమని ఇరాన్ స్పష్టం చేసింది.

ఉద్రిక్తతలకు ప్రధాన కారణాలు
ఈ తాజా వివాదం వెనుక మూడు ముఖ్యమైన అంశాలు ఉన్నాయి. 2015 నాటి అణు ఒప్పందం నుంచి అమెరికా వైదొలిగిన తర్వాత, ఇరాన్ తన యురేనియం శుద్ధిని పెంచిందని అమెరికా ఆరోపిస్తోంది. దీనిని అడ్డుకోవడమే ట్రంప్ ప్రధాన లక్ష్యం.ఇరాన్‌లో ప్రభుత్వానికి వ్యతిరేకంగా జరుగుతున్న నిరసనల్లో వేలాది మంది మరణించారు. నిరసనకారులను చంపడం ఆపకపోతే సైనిక చర్య చేపడతామని ట్రంప్ గతంలోనే హెచ్చరించారు.ఇరాన్ అణు కేంద్రాలపై ఇజ్రాయెల్ నిరంతరం నిఘా ఉంచింది. అమెరికా మద్దతుతో ఇజ్రాయెల్ కూడా దాడులకు సిద్ధంగా ఉండటంతో పరిస్థితి మరింత జటిలమైంది.

ప్రపంచ దేశాల ఆందోళన
ఈ యుద్ధం గనుక మొదలైతే దాని ప్రభావం ప్రపంచం మొత్తం మీద పడుతుంది. పశ్చిమాసియా నుంచి చమురు సరఫరా నిలిచిపోతే.. భారత్ వంటి దేశాల్లో పెట్రోల్, డీజిల్ ధరలు ఆకాశాన్ని తాకుతాయి. ఇప్పటికే అంతర్జాతీయ మార్కెట్లు ఒడిదుడుకుల్లో ఉన్నాయి. యుద్ధం సంభవిస్తే ప్రపంచ ఆర్థిక వ్యవస్థ తీవ్రంగా దెబ్బతింటుంది. ఇరాన్, పరిసర ప్రాంతాల్లో నివసిస్తున్న వేలాది మంది భారతీయుల భద్రతపై ఆందోళన నెలకొంది. ఇప్పటికే అమెరికా తన పౌరులను ఇరాన్ విడిచి రావాలని ఆదేశించింది.

English summary

us iran war tensions rise as US President Trump sends a massive armada to the Middle East. Iran responds with a stern warning. Explore the reasons behind the conflict and its impact on oil prices.