భాగ్యనగర్‌ ఎక్స్‌ప్రెస్‌లో సూదిగాడి కలకలం: పలువురికి సూదిగుచ్చి దొరికిపోయాడు

హైదరాబాద్‌: భాగ్యనగర్‌ ఎక్స్‌ప్రెస్‌లో ఓ సూదిగాడు కలకలం సృష్టించాడు. బల్లార్షా నుంచి సికింద్రాబాద్‌ వస్తున్న భాగ్యనగర్‌ ఎక్స్‌ప్రెస్‌ రైలులో సూది ఉన్మాది రవికుమార్‌ హల్‌ చల్‌ చేశాడు. పలువురు ప్రయాణికులను సూదితో గుచ్చి గాయపరిచాడు.

దీంతో ఆగ్రహించిన ప్రయాణికులు సూది ఉన్మాది రవికుమార్‌ను చితకబాది సికింద్రాబాద్‌లో రైల్వే పోలీసులకు అప్పగించారు. ఉన్మాది నుంచి రెండు సిరంజిలు, రెండు సిమ్‌కార్డులు పోలీసులు స్వాధీనం చేసుకున్నారు. ఉన్మాది రవికుమార్‌ వరంగల్‌ జిల్లా స్టేషన్‌ఘన్‌పూర్‌లో రైలు ఎక్కినట్లు ప్రయాణికులు తెలిపారు.

రోడ్డు ప్రమాదంలో ఇద్దరు మృతి

ఆదిలాబాద్ జిల్లాలోని ఖానాపూర్ మండలం పెంబి దగ్గర రోడ్డు ప్రమాదం జరిగింది. బొలేరో వాహనం- బైక్ ఢీకొన్న ఈ ప్రమాదంలో ఇద్దరు అక్కడికక్కడే మృతి చెందారు. పలువురికి గాయాలయ్యాయి.

క్షతగాత్రులను ఖనాపూర్ ఆసుపత్రికి తరలించి చికిత్స అందిస్తున్నారు. స్థానికుల సమాచారం మేరకు ఘటనా స్థలానికి చేరుకున్న పోలీసులు కేసు నమోదు చేసుకుని దర్యాప్తు చేస్తున్నారు.

స్వైన్‌ఫ్లూతో చికిత్స పొందుతూ మహిళ మృతి

మహబూబ్‌నగర్‌ జిల్లా కొత్తకోట రెండో వార్డుకు చెందిన బాలింత అనురాధ(32) స్వైన్‌ఫ్లూతో చికిత్స పొందుతూ శనివారం ఉదయం మృతి చెందింది. ఈ నెల 7న బిడ్డకు జన్మనిచ్చిన అనురాధకు స్వైన్‌ ఫ్లూ ఉన్నట్లు వైద్యులు గుర్తించారు.

మెరుగైన చికిత్స కోసం ఆమెను హైదరాబాద్‌లోని కిమ్స్‌కి తరలించారు. అక్కడ 3 రోజలు చికిత్స పొందిన అనంతరం కేర్‌ ఆసుపత్రికి తరలించినట్లు కుటుంబసభ్యులు తెలిపారు. కేర్‌ ఆసుపత్రిలో చికిత్స పొందుతూ అనురాధ శుక్రవారం అర్ధరాత్రి మృతి చెందింది.

English summary

A Syringe Psycho arrested on Saturday in Bhagyanagar Express train.