చందానగర్‌లో కాల్పుల కలకలం.. ఖజానా జ్యువెలరీలో దోపిడీకి యత్నం !

హైదరాబాద్‌ చందానగర్‌లో కాల్పుల కలకలం రేగింది. స్థానిక ఖజానా జ్యువెలర్స్‌లో దుండగులు దోపిడీకి యత్నం చేయడం హడలెత్తించింది. ఆరుగురు సభ్యుల గ్యాంగ్ ముందుగా షాప్ గేట్ వద్ద ఉన్న సిబ్బందిని గాయపరిచి లోపలికి చొరబడ్డారు. లోపలికి ప్రవేశించిన వెంటనే తుపాకీతో బెదిరించి, లాకర్ కీ ఇవ్వాలని సిబ్బందిని డిమాండ్ చేశారు.

సిబ్బంది కీ ఇవ్వడానికి నిరాకరించడంతో, దుండగులు డిప్యూటీ మేనేజర్‌పై కాల్పులు జరిపారు. అంతే కాకుండా మరికొందరిపై దాడులకు పాల్పడి,.. లోపల బంగారు ఆభరణాలకు సంబంధించిన స్టాల్స్ విరగ్గొట్టి సిబ్బందిపై దాడులకు సైతం పాల్పడ్డారు. రెండు రౌండ్ల ఫైరింగ్ జరిపిన వారు.. తుపాకీతో సీసీ కెమెరాలను కూడా ధ్వంసం చేశారు. ఈ ఘటనలో డిప్యూటీ మేనేజర్‌ కాలికి గాయాలయ్యాయని సమాచారం.

దీంతో భయాందోళనకు గురైన సిబ్బంది వెంటనే పోలీసులకు సమాచారం అందించారు. వెంటనే చందానగర్‌ పోలీసులు సంఘటనా స్థలానికి చేరుకున్నారు. పోలీసులు రాగానే దుండగులు అక్కడి నుంచి పారిపోయారు. కేసు నమోదు చేసిన చందానగర్‌ పోలీసులు.. దుండగుల కోసం గాలిస్తున్నారు. గాయపడిన వారిని చికిత్స కోసం ఆస్పత్రికి తరలించారు.

మొత్తం ఆరుగురు సభ్యులుగా ఉన్న ఈ గ్యాంగ్‌ను పట్టుకునేందుకు పోలీసులు పది ప్రత్యేక బృందాలను ఏర్పాటు చేశారు. కేసు నమోదు చేసి దుండగుల కోసం విస్తృత స్థాయిలో గాలింపు చర్యలు చేపట్టారు. ఈ ఘటనతో చందానగర్‌లో ఒక్కసారిగా కలకలం రేగగా, స్థానికులు తీవ్ర ఆందోళనకు గురయ్యారు. ఘటనకు సంబంధించి పూర్తి వివరాలు ఇంకా వెలువడాల్సి ఉంది. సమీప ప్రాంతాల్లో ప్రజాలు సైతం భయాందోళన వ్యక్తం చేస్తున్నారు.

English summary

A gunfight broke out in Chandanagar, Hyderabad. The incident took place after a gang of six attempted to rob a khajana jewellers. The gang first injured the staff at the shop gate and then entered.