బోనమెత్తిన గోల్కొండ: నాయిని, పద్మారావు పూజలు, పోతరాజుల విన్యాసాలు(పిక్చర్స్)

Published: Monday, July 20, 2015, 16:28 [IST]

హైదరాబాద్: గోల్కొండ బోనాల ఉత్సవాలు అంగరంగా వైభవంగా ఆదివారం మధ్యాహ్నం ప్రారంభమైయ్యాయి. బోనాల ఉత్సవాలలో గోల్కొండ కోటపై ఉన్న శ్రీజగదాంభిక మహంకాళీ (ఎల్లమ్మతల్లి) అమ్మవారికి ప్రత్యేక పూజలు నిర్వహించారు. మంత్రి పద్మారావు రాష్ట్ర ప్రభుత్వం తరఫున అమ్మవారికి పట్టువస్ర్తాలు, బోనం సమర్పించారు.

లంగర్‌హౌస్ చౌరస్తాలో అమ్మవారి భారీ తొట్టెలకు హోంశాఖ మంత్రి నాయిని నర్సింహ్మారెడ్డి, ఎక్సైజ్ శాఖ మంత్రి పద్మారావు, నగర పోలీస్ కమిషనర్ మహేందర్‌రెడ్డి పూజలు నిర్వహించి ఊరేగింపును ప్రారంభించారు.

డప్పు వాయిజ్యాల మధ్య శివసత్తుల పునకం పోతురాజుల నృత్యాలు యువత కేరింతతో అత్యంత వైభవంగా బోనాల ఉత్సవాలు జరుపుకున్నారు. ఆలయ పునర్ నిర్మాణ కమిటీ సభ్యులు గోవింద్‌రాజ్, దైవజ్ఞశర్మతో పాటు దేవాదాయ శాఖ అధికారులు అమ్మవారికి ప్రత్యేక పూజలు నిర్వహించారు. హోంశాఖ మంత్రి నాయిని నర్సింహ్మారెడ్డి మాట్లాడుతూ.. తెలంగాణలో ప్రజలందరు కలిసిమెలసి జరుపుకునే పండుగ బోనాలు అని అన్నారు.

గోల్కొండ బోనాల ఉత్సవాలలో భాగంగా పోతరాజుల నృత్యాలు అలరించాయి. ఆదివారం గోల్కొండ బోనాల ఉత్సవాలలో పోతరాజుల నృత్యాలే ప్రజలను అకట్టుకున్నాయి. పోతురాజులతో పాటు శివసత్తులు పునకం పూనారు. డజన్ మంది పోతరాజలు నృత్యాలు చేశారు. లంగర్‌హౌస్ చౌరస్తా నుంచి గోల్కొండ కోటపై ఉన్న అమ్మవారి దేవాలయం వరకు భారీ ఊరేగింపులో పాల్గొన్నారు.