ఎయిరిండియాకు డీజీసీఏ షాక్: హైదరాబాద్‌లోని సిమ్యులేటర్ ఫెసిలిటీపై నిషేధం

హైదరాబాద్: టాటా కంపెనీ యాజమాన్యంలోని ఎయిర్ ఇండియాకు డైరెక్టరేట్ జనరల్ ఆఫ్ సివిల్ ఏవియేషన్(DGCA) షాకిచ్చే నిర్ణయం తీసుకుంది.హైదరాబాద్‌లోని సిమ్యులేటర్‌ ట్రైనింగ్‌ ఫెసిలిటీ సెంటర్‌పై నిషేధం విధించింది. ముంబై సిమ్యులేటర్‌ సెంటర్‌పై చర్యలు తీసుకున్న 72 గంటల్లోనే హైదరాబాద్‌ సెంటర్‌పై ఆంక్షలు విధించడం గమనార్హం.

అయితే, ఈ కేంద్రంలో పైలెట్లకు ఇచ్చే శిక్షణలో కొన్ని లోపాలున్నట్టు తనిఖీల్లో వెల్లడైంది. దీంతో ఆయా సిమ్యులేటర్‌ ఫెసిలిటీ సెంటర్లలో శిక్షణా కార్యకలాపాలు నిలిపివేయాలని ఆదేశించింది. ఎయిర్‌ ఇండియా ముంబై కేంద్రంలో బోయింగ్‌ 777, బీ787 విమాన పైలెట్లకు, హైదరాబాద్‌లో ఎయిర్‌బస్‌ ఏ-320 విమాన పైలెట్లకు శిక్షణ ఇస్తోంది.

ప్రస్తుతం రెండు కీలకమైన ఫిసిలిటీ సెంటర్లలో కార్యకలాపాలు నిలిపివేయడంతో ఎయిర్‌ ఇండియాకు శిక్షణకు సంబంధించి సవాళ్లు ఎదురయ్యే అవకాశం ఉంది. అయితే, ఈ వ్యవహారంపై ఇప్పటి వరకు ఎయిర్‌ ఇండియా స్పందించలేదు. తనిఖీలకు సంబంధించి డీజీసీఏ ఇచ్చిన సలహాలు, సూచనలు పరిగణలోకి తీసుకొని దిద్దుబాటు చర్యలు చేపడుతామని ఎయిర్‌ ఇండియా సీనియర్‌ అధికారి ఒకరు తెలిపారు.

ఇక, ఎయిర్‌ ఇండియాలో తనిఖీలకు సంబంధించి డీజీసీఏ ఇప్పటి వరకు స్పందించలేదు. ఇటీవల ఇద్దరు సభ్యులు డీజీసీఏ బృందం ఎయిర్‌లైన్‌ అంతర్గత భద్రతా ఆడిట్‌ రిపోర్టులో లోపాలను గుర్తించింది. రెగ్యులేటర్‌ దీన్ని పరిశీలిస్తోంది.

దేశంలోని అన్ని ఎయిర్ ఇండియా సిమ్యులేటర్ సౌకర్యాలను నిలిపివేయడంతో, విమానయాన సంస్థ ఏ పైలట్ లైసెన్స్ పునరుద్ధరణ లేదా ఫ్లైట్ రిఫ్రెషర్ కోర్సులను పొందలేరు. ఫలితంగా, ఈ పైలట్‌ల లైసెన్సులు, ఇతర ధృవీకరణ పత్రాలు రద్దు చేయబడవచ్చు, ఇది వాణిజ్య విమానాలను నడిపే వారి సామర్థ్యాన్ని ప్రభావితం చేస్తుంది.

ఎయిర్‌లైన్ ఆమోదం పొందిన శిక్షణ సంస్థ (ఏటీఓ) లైసెన్స్‌ను తాత్కాలికంగా రద్దు చేసినట్లు డీజీసీఏ అధికారి తెలిపారు. దీనర్థం ముంబై, హైదరాబాద్‌లో ఉన్న దాని సిమ్యులేటర్ సదుపాయాలు ఏవీ ఆపరేట్ చేయలేవు. ముంబైలోని ఎయిర్ ఇండియా బోయింగ్ సిమ్యులేటర్ సదుపాయాన్ని నిలిపివేయడం గురించి మీడియాలో మంగళవారం వార్తలు వచ్చాయి.

English summary

DGCA suspends Air India's simulator facilities in Hyderabad, Mumbai.