Jagruthi: ఎన్నికల బరిలోకి జాగృతి, గుర్తు ఖరారు - BRS ఓట్లకు గండి..!?

Jarguthi in Elections: తెలంగాణ రాజకీయాల్లో కీలక పరిణామం. మున్సిపల్ ఎన్నికల వేళ కేసీఆర్ కుమార్తె కీలక ప్రకటన దిశగా అడుగులు వేస్తున్నారు. బీఆర్ఎస్ నుంచి సస్పెండ్ అయిన తరువాత ఎమ్మెల్సీ పదవికి రాజీనామా చేసిన కవిత.. కొద్ది రోజులుగా మద్దతు దారులతో వరుసగా సమావేశాలు నిర్వహిస్తున్నారు. త్వరలో జరిగే మున్సిపల్ ఎన్నికల్లో పోటీకి సిద్దం అవుతున్నారు. పార్టీ గుర్తు విషయంలోనూ ఒక నిర్ణయానికి వచ్చారు. దీంతో.. కవిత బరిలోకి దిగటంతో బీఆర్ఎస్ ఓట్లకు గండి పడటం ఖాయమనే చర్చ మొదలైంది.

తెలంగాణలో ప్రస్తుతం మున్సిపల్ ఎన్నికల సందడి మొదలైంది. ఈ నెల 27న ఎన్నికల షెడ్యూల్ విడుదల అయ్యే అవకాశం ఉంది. ఫిబ్రవరి 11,12 తేదీల్లో పోలింగ్ ఉండే అవకాశం ఉందని సమాచారం. ఇప్పటికే ఓటర్ల జాబితాలు ప్రకటించారు. కాంగ్రెస్ కు ఈ ఎన్నికలు మరింత ప్రతిష్ఠాత్మకంగా మారుతున్నాయి. ప్రతీ జిల్లాకు మంత్రికి బాధ్యతలు అప్పగించారు. సీఎం రేవంత్ జిల్లాల పర్యటనలు చేస్తున్నారు. అటు బీఆర్ఎస్, బీజేపీ సైతం ఈ ఎన్నికల పైన కసరత్తను ప్రారంభించాయి. కాగా.. తెలంగాణ జాగృతి నేతలు స్థానిక సంస్థల ఎన్నికల బరిలోకి దిగాలనే నిర్ణయం సంచలనంగా మారుతోంది. మున్సిపాలిటీలతోపాటు జిల్లా పరిషత్, మండల పరిషత్ ఎన్నికల్లోనూ సింహం గుర్తుతో పోటీ చేయాలని తెలంగాణ జాగృతి నాయకత్వం నిర్ణయించింది. ఆల్ ఇండియా ఫార్వర్డ్ బ్లాక్ పార్టీతో సంప్రదింపులు పూర్తి చేసిన తెలంగాణ జాగృతి నాయకత్వం.. ఆ పార్టీకి చెందిన సింహం గుర్తుతో ఎన్నికల బరిలోకి దిగాలని నిర్ణయించింది.

గుర్తు ఖరారు

కొద్ది రోజులుగా ఇదే అంశం పైన కవిత వరుసగా చర్చలు చేస్తున్నారు. మద్దతు దారులు.. పలువురు ప్రముఖులతో చేసిన చర్చల్లో ఈ మేరకు నిర్ణయం తీసుకున్నట్లు తెలిసింది. తాజాగా ఎన్నికల గుర్తు తో పాటుగా పోటీ పైన ఏఐఎఫ్‌బీ పార్టీ, తెలంగాణ జాగృతి మధ్య సయోధ్య కుదిరింది. కాగా, తెలంగాణ జాగృతి అధ్యక్షురాలు కల్వకుంట్ల కవిత ఇప్పటికే రాజకీయ పార్టీ రిజిస్ట్రేషన్ ప్రక్రియలో వేగం పెంచారు. అయితే, పార్టీ రిజిస్ట్రేషన్ పూర్తి కావడానికి రెండు నుంచి మూడు నెలల సమయం పట్టే అవకాశం ఉందని అంచనా. ఈలోపు రాష్ట్రంలో జరగనున్న మున్సిపల్ ఎన్నికలతోపాటు జిల్లా, మండల పరిషత్ ఎన్నికల్లోనూ ఏఐఎఫ్‌బీ సింహం గుర్తుతో బరిలోకి దిగాలని జాగృతి నాయకత్వం నిర్ణయం తీసుకుంది. తెలంగాణ జాగృతి నిర్ణయం తో బీఆర్ఎస్ కు నష్టం జరుగుతుందనే వాదన ఉంది. అయితే, ఓటర్లు ఏ మేర కవితకు మద్దతుగా నిలుస్తారు.. ఎవరి ఓట్ల పైన కవిత ప్రభావం ఉంటుందనేది ఈ ఎన్నికల్లో స్పష్టత వచ్చే అవకాశం ఉంది.

English summary

Jagruthi likely to contest in Telangana municipal and local body elections with AIFB symbol