కాంగ్రెస్‌లోకి బీఆర్ఎస్ నేతలను నేనే పంపించా: మల్లారెడ్డి సంచలనం

మేడ్చల్ బీఆర్ఎస్ ఎమ్మెల్యే, మాజీ మంత్రి మల్లారెడ్డి మరోసారి సంచలన వ్యాఖ్యలు చేశారు. బీఆర్ఎస్ నేతలు తనకు తెలిసే కాంగ్రెస్ పార్టీలో చేరారని చెప్పుకొచ్చారు. మేడ్చల్ నియోజకవర్గంలోని జవహర్‌​నగర్, బోడుప్పల్​‌కు చెందిన కార్పొరేటర్లను తానే కాంగ్రెస్​‌లోకి వెళ్లమని చెప్పినట్లు మల్లారెడ్డి మీడియా ఎదుటే వెల్లడించడం ఇప్పుడు రాజకీయంగా చర్చనీయాంశంగా మారింది.

కాంగ్రెస్​‌లో ఉంటూనే బీఆర్​ఎస్‌​కు కోవర్టులుగా పనిచేయాలని వారిని ఆదేశించినట్లు మల్లారెడ్డి తెలిపారు. వారు కాంగ్రెస్‌​లో చేరినప్పటికీ గులాబీ పార్టీకే పని చేస్తున్నట్లు స్పష్టం చేశారు. అంతేగాక, బీఆర్​ఎస్ కార్పొటేర్లు ఆ పార్టీని వీడి కాంగ్రెస్‌​లోకి వెళ్లినప్పటికీ.. అక్కడ సరైన ప్రాధాన్యత లేక ఇబ్బందులు ఎదుర్కొంటున్నారని మల్లారెడ్డి వ్యాఖ్యానించారు.

తిరిగి సొంతగూటికి వచ్చేందుకు వారు ప్రయత్నాలు చేస్తున్నట్లు ఆయన తెలిపారు. పాత కాంగ్రెస్ నాయకులతో తమకు పొసగడం లేదని, తిరిగి బీఆర్​ఎస్​‌లోకి వస్తామంటున్నారని మల్లారెడ్డి చెప్పారు. ఎంపీ ఎన్నికలు పూర్తయ్యే వరకు అక్కడే ఉండాలని తాను చెప్పినట్లు మాజీ మంత్రి మల్లారెడ్డి వెల్లడించారు.

మరోవైపు, మాజీ మంత్రి మల్లారెడ్డి వ్యాఖ్యలను మల్కాజిగిరి బీఆర్​ఎస్​ ఎంపీ అభ్యర్థి రాగిడి లక్ష్మారెడ్డి కూడా సమర్ధించడం గమనార్హం. దీంతో ఈ వీడియో కాస్త సోషల్​ మీడియాలో వైరల్‌గా మారిపోయింది. ఇక, మల్లారెడ్డి వ్యాఖ్యలపై కాంగ్రెస్ నేతలు ఏ విధంగా స్పందిస్తారో వేచిచూడాలి.

ఇది ఇలావుంటే, గత నెలలో కూడా మల్లారెడ్డి చేసిన వ్యాఖ్యలు బీఆర్​ఎస్ నేతలను ఇరుకునపెట్టేవిగా ఉన్నాయి. లోక్‌సభ ఎన్నికల్లో మల్కాజిగిరి బీజేపీ ఎంపీ అభ్యర్థి ఈటల రాజేందర్​‌ గెలుస్తారన్నారు మల్లారెడ్డి. దీంతో ఒక్కసారిగా గులాబీ శ్రేణులు షాకయ్యాయి. ఏప్రిల్ 26న ఓ వేడుకకు వెళ్లిన మాజీ మంత్రి, అక్కడే ఉన్న ఈటల రాజేందర్​‌ను కలిశారు. అనంతరం ఆయనను ఆత్మీయంగా ఆలింగనం చేసుకున్నారు. ఈ సందర్భంగా బీఆర్​ఎస్​ ఎమ్మెల్యే మల్లారెడ్డి.. బీజేపీ ఎంపీ అభ్యర్థి ఈటలతో ఈ ఎన్నికల్లో నువ్వే గెలుస్తావు అని అన్నారు. దీంతో వీరిద్దరూ కలిసి మాట్లాడుకున్న వీడియో వైరల్‌గా మారింది.

English summary

Malla Reddy interesting comments on BRS Leaders joining in Congress.