దారుణం: ప్రేయసితో పెళ్లికి ఒప్పుకోలేదని తల్లిని చంపేశాడు

హైదరాబాద్: తన ప్రియురాలితో వివాహానికి అడ్డుపడుతుందనే కారణంగా కన్న తల్లినే హతమార్చాడో ప్రబుద్ధుడు. ఈ దారుణ ఘటన నగరంలోని దబీర్‌పురాలో ఆదివారం చోటు చేసుకుంది. ఘటనపై కేసు నమోదు చేసుకున్న పోలీసులు.. దర్యాప్తు చేస్తున్నారు.

పోలీసులు తెలిపిన వివరాల ప్రకారం.. నిందితుడు అక్రమ్ బిన్ ఇస్మాయిల్(23) తన తల్లి సజీరా బేగం(60)తో కలిసి దబీర్‌పురాలో నివాసం ఉంటున్నాడు. తన సోదరి, బావ తమ చిన్న ఇంట్లోనే ఉండటం అక్రమ్‌కు నచ్చేది కాదు.

అంతేగాక, తను ప్రేమించిన యువతిని పెళ్లి చేసుకునేందుకు తన తల్లి అంగీకరించకపోవడం కూడా అతడ్ని ఆగ్రహానికి గురిచేసింది. ఈ నేపథ్యంలో ఆదివారం ఉదయం ఇంట్లో ఎవరూ లేని సమయంలో అక్రమ్.. తన తల్లిపై దాడికి దిగాడు. దీంతో ఆమె స్పృహ కోల్పోయి కుప్పకూలిపోయింది.

వెంటనే ఉస్మానియా ఆస్పత్రికి తరలించగా చికిత్స పొందుతూ సజీరా బేగం మృతి చెందింది. నిందితుడిపై హత్యా నేరం కేసు నమోదు చేసి దర్యాప్తు చేస్తున్నట్లు మీర్‌చౌక్ ఏసీపీ గంగాధర్ తెలిపారు.

English summary

A 60-year-old housewife, Sajira Begum, died when she was allegedly assaulted by her son at their house in Dabeerpura on Sunday. The accused is Akram Bin Ismail, 23.