కాకతీయ మెడికల్ కాలేజీలో ర్యాగింగ్: ఏడుగురు సీనియర్లు సస్పెండ్

వరంగల్: డాక్టర్ ప్రీతి ఘటన మరువక ముందే మరోసారి ర్యాగింగ్ ఘటనలు కలకలం రేపుతున్నాయి. తాజాగా, కాకతీయ మెడికల్ కాలేజీలో ర్యాగింగ్ జరిగినట్లు తేలింది. దీంతో విచారణ జరిపిన కాలేజీ యాజమాన్యం ఏడుగురు సీనియర్ విద్యార్థులపై చర్యలు తీసుకున్నారు.

జూనియర్ విద్యార్థిపై సీనియర్ విద్యార్థులు ర్యాగింగ్ తోపాటు దాడి నేపథ్యంలో వైద్య కళాశాలలో యాంటీ ర్యాగింగ్ కమిటీ సమావేశమైంది. దాదాపు ఆరు గంటలపాటు యాంటీ ర్యాగింగ్ సభ్యులు సుదీర్ఘంగా విచారించారు. ఈ క్రమంలో సెప్టెంబర్ 14వ తేదీన హాస్టల్‌లో ర్యాగింగ్ జరిగిందని కమిటీ నిర్ధారించింది.

జూనియర్ విద్యార్థిపై ర్యాగింగ్‌కి పాల్పడిన ఏడుగురు సీనియర్ విద్యార్థులపై చర్యలు తీసుకున్నారు. జూనియర్ విద్యార్థిపై ర్యాగింగ్, దాడి చేసిన ఏడుగురు సీనియర్ విద్యార్థులను మూడు నెలలపాటు కాలేజీ నుంచి, ఏడాదిపాటు హాస్టల్ నుంచి సస్పెండ్ చేసినట్లు కాకతీయ మెడికల్ కాలేజీ ప్రిన్సిపల్ డాక్టర్ మోహన్ దాస్ తెలిపారు.

ఈ ఏడుగురిపై ర్యాగింగ్ కేసు నమోదు చేసినట్లు తెలిపారు. మరో 20 మందికి నోటీసులు జారీ చేసినట్లు చెప్పారు. ర్యాగింగ్ ఘటనలు పునరావృతం కాకుండా చర్యలు తీసుకుంటామని ప్రిన్సిపల్ హామీ ఇచ్చారు. వరంగల్ కాకతీయ మెడికల్ కాలేజీలో ర్యాగింగ్ జరగడం ఇదే తొలిసారని చెప్పారు.

ర్యాగింగ్ ఘటనపై పోలీసుల విచారణ కొనసాగుతోందని కాలేజీ ప్రిన్సిపల్ డాక్టర్ మోహన్ దాస్ తెలిపారు. ఇప్పటికే ర్యాగింగ్‌కు పాల్పడిన ఏడుగురు సీనియర్ విద్యార్థులపై మట్వాడ పోలీస్ స్టేషన్‌లో ఎఫ్ఐఆర్ నమోదైందని తెలిపారు. ఇది ఇలావుండగా, పది రోజుల క్రితం సికింద్రాబాద్ గాంధీ మెడికల్ కాలేజీలోనూ ర్యాగింగ్ ఘటన జరిగింది. ఈ కేసులో ర్యాగింగ్ కు పాల్పడిన పది మంది ఎంబీబీఎస్ విద్యార్థులపై ఏడాదిపాటు సస్పెండ్ చేశారు.

English summary

Ragging in Kakatiya medical college: seven senior students suspended.