ఉత్సవాలు ఓయూలో చేయండి, ట్యాంక్ బండ్ పై కాదు.. : రేవంత్ డిమాండ్

హైదరాబాద్ : ఫైర్ బ్రాండ్ గా ముద్రపడ్డ టీటీడీపీ వర్కింగ్ ప్రెసిడెంట్ రేవంత్ రెడ్డి మునుపటి ఫైర్ ని చూపించే ప్రయత్నం చేస్తున్నారు. ఈ క్రమంలోనే తెలంగాణ ప్రభుత్వ చర్యలపై మండిపడ్డ ఆయన ఉస్మానియా యూనివర్సిటి విద్యార్థులను, తెలంగాణ అమరులను ఉద్దేశించి పలు ఆసక్తికర వ్యాఖ్యలు చేశారు.

ఉస్మానియా యూనివర్సిటీ కారు చీకట్లలో మగ్గిపోతుందని మండిపడ్డ రేవంత్, ఉద్యమం కోసం పనిచేసిన విద్యార్థులను టీఆర్ఎస్ ప్రభుత్వం నిర్లక్ష్యం చేస్తోందని ఆగ్రహం వ్యక్తం చేశారు. జీవితాలను సైతం పణంగా పెట్టి విద్యార్థులు ఉద్యమంలో పాల్గొన్నారని అలాంటి వారికి ప్రభుత్వం కనీస గుర్తింపు, గౌరవం ఇవ్వడం లేదని ఆరోపించారు.

ఇక తెలంగాణ ద్వితీయ రాష్ట్ర ఆవిర్భావ వేడుకల గురించి ప్రస్తావించిన ఆయన, ప్రభుత్వం ఉత్సవాలు చేయాల్సింది ట్యాంక్ బండ్ పై కాదని, ఉస్మానియా యూనివర్సిటీలో చేయాలని డిమాండ్ చేశారు. రాష్ట్రం ఏర్పడ్డాక జరిగిన తొలి అసెంబ్లీ సమావేశంలోనే తెలంగాణ కోసం అమరులైన వారికి ఐదెకరాల భూమి, ఇల్లు, రూ.10 లక్షల పరిహారం, ఉద్యోగం ఇవ్వాలని తీర్మానించామని కానీ, రెండేళ్లయినా ప్రభుత్వం ఆ తీర్మానాన్ని పట్టించుకోలేదన్నారు.

ఇక త్వరలో రాజ్యసభ ఎన్నిలు జరగనున్నందునా..! అమరవీరుల కుటుంబాలకు రాజ్యసభ అవకాశం ఇవ్వాలని టీఆర్ఎస్ ప్రభుత్వాన్ని డిమాండ్ చేశారు. అలాగే తెలంగాణ విద్యార్థుల డిమాండ్స్ పై టీడీపీ మహానాడులో చర్చించబోతున్నట్టుగా తెలియజేశారు.

బుధవారం ఉదయం రేవంత్ ని కలిసిన ఓయూ జేఏసీ నేతలు జూన్ 2న క్యాంపస్ లో జరగబోయే జనజాతరకు రావాల్సిందిగా ఆహ్వానించారు. ఈ సందర్బంగా మాట్లాడిన రేవంత్ పై వ్యాఖ్యలు చేశారు. జనజాతరకు తన తరపున మద్దతును ప్రకటించారు.

English summary

telangana tdp leader revanth reddy demands for held the state formation celebrations in the osmania university