దేశంలోనే తొలిసారి ఇంటర్ విద్యార్థులకు రేవంత్ సర్కార్ అద్భుత పథకం!
తెలంగాణ రాష్ట్రంలో విద్యార్థుల సమగ్ర అభివృద్ధికి రేవంత్ రెడ్డి ప్రభుత్వం మరో కీలక నిర్ణయం తీసుకుంది. జూన్ 12, 2026 నుంచి ఇంటర్మీడియట్ విద్యార్థులకు బ్రేక్ఫాస్ట్ మరియు మిడ్-డే మీల్ పథకాన్ని అమలు చేయనుంది. ముఖ్యమంత్రి రేవంత్ రెడ్డి చేతుల మీదుగా ఈ పథకం అధికారికంగా ప్రారంభమవుతుంది. ఇది దేశంలోనే తొలి రాష్ట్రంగా తెలంగాణను నిలుపుతుంది.
ఇంటర్ విద్యార్థులకు బ్రేక్ ఫాస్ట్, మిడ్ డే మీల్ పథకం
ఈ పథకం ద్వారా రాష్ట్రంలోని 1.92 లక్షల మంది ఇంటర్ విద్యార్థులు ప్రయోజనం పొందనున్నారు. బ్రేక్ఫాస్ట్కు సంవత్సరానికి రూ.80 కోట్లు, మధ్యాహ్న భోజనానికి రూ.100 కోట్లు కేటాయించి, మొత్తం రూ.180 కోట్లు ప్రభుత్వం ఈ మేరకు ఖర్చు చేయనుంది. తొలి రోజు 64 కాలేజీల్లో 41,250 మంది విద్యార్థులతో ప్రారంభమై, తదనంతరం అన్ని కాలేజీలకు విస్తరించనుంది.
పోషకాహారంపై ప్రత్యేక దృష్టి
15 నుంచి 18 ఏళ్ల మధ్య వయస్సు ఉన్న కౌమార దశలో ఉన్న విద్యార్థుల శారీరక, మానసిక అభివృద్ధికి అవసరమైన పోషకాలు అందించడమే ఈ పథకం లక్ష్యం. జాతీయ పోషకాహార సంస్థ సిఫార్సుల మేరకు రోజుకు 1029 కిలో క్యాలరీలు, 30-32 గ్రాముల ప్రోటీన్ అందేలా మెనూను రూపొందించారు.
వారం వారం రోజుకో వెరైటీ మెనూ
1వ రోజు: దోశ
2వ రోజు: మిల్లెట్ ఇడ్లీ విత్ సాంబార్
3వ రోజు: పూరీ మిక్స్డ్ వెజిటబుల్ కుర్మా
4వ రోజు: బోండా
5వ రోజు: ఇడ్లీ
6వ రోజు: ఉప్మా , చట్నీ, సాంబార్
దేశంలోనే ఇంటర్ విద్యార్థుల కోసం తొలి కార్యక్రమం
రోజు విడిచి రోజు 150 మిల్లీలీటర్ల పాలు కూడా అందించనున్నారు. అన్ని వంటకాలు తాజా, పోషకాలతో కూడినవిగా ఉండేలా ప్రత్యేక జాగ్రత్తలు తీసుకున్నారు. ఇప్పటి వరకు దేశంలో ఎక్కడా ఇంటర్ కాలేజీ విద్యార్థులకు బ్రేక్ఫాస్ట్ లేదా మిడ్-డే మీల్ అమలు చేయలేదు. కేవలం స్కూల్ విద్యార్థులకు మాత్రమే ఉండేది. ఈ నేపథ్యంలో తెలంగాణ ఈ వినూత్న కార్యక్రమం ద్వారా దేశానికే ఆదర్శం అవుతోంది.
ఈ పథకం ద్వారా డ్రాపవుట్స్ తగ్గుతాయని భావిస్తున్న సర్కార్
సీఎం రేవంత్ రెడ్డి ఈ పథకం ద్వారా విద్యార్థులు ఆకలి లేకుండా చదువుకోవడం, ఆరోగ్యంగా ఉండడం, డ్రాపౌట్ రేటు తగ్గడం వంటి అనేక సానుకూల ఫలితాలు కనిపిస్తాయని భావిస్తున్నారు. ఈ కార్యక్రమం తెలంగాణ విద్యా రంగంలో ఒక చారిత్రక మైలురాయిగా నిలుస్తుందని విద్యా శాఖ అధికారులు తెలిపారు. ఈ పథకం అమలు ద్వారా ముఖ్యంగా గ్రామీణ, పేద విద్యార్థులు ఎక్కువ ప్రయోజనం పొందుతారని భావిస్తున్నారు.
Click it and Unblock the Notifications
Sign in with Google