ఇల్లు కట్టే వారికి బంపర్ ఆఫర్: కొత్త బిల్డింగ్ రూల్స్ ఇవే..

తెలంగాణ రాష్ట్రంలో భవన నిర్మాణ రంగాన్ని మరింత సరళీకృతం చేస్తూ ప్రభుత్వం సంచలన నిర్ణయం తీసుకుంది. 'తెలంగాణ బిల్డింగ్ రూల్స్ - 2012'కు కీలక సవరణలు చేస్తూ మున్సిపల్ పరిపాలన శాఖ తాజాగా G.O.Ms.No.95ను విడుదల చేసింది. ఈ కొత్త నిబంధనల వల్ల స్థల యజమానులు తమ ప్లాట్లలో మరిన్ని అదనపు అంతస్తులు నిర్మించుకోవడానికి, సెట్‌బ్యాక్ నిబంధనల్లో సడలింపులు పొందడానికి అవకాశం కలగనుంది.

ఇకపై 21 మీటర్లకు పైగా ఎత్తు ఉన్న భవనాలను మాత్రమే 'హై-రైజ్' (High-rise) భవనాలుగా గుర్తిస్తారు. అయితే, భవనం పైన ఉండే చిమ్నీలు, వాటర్ ట్యాంకులు, లిఫ్ట్ మెషిన్ రూములు, కూలింగ్ టవర్ల ఎత్తును ఈ పరిమితిలోకి లెక్కించరు. దీనివల్ల సాధారణ భవన నిర్మాణదారులకు నిబంధనల పరంగా కొంత వెసులుబాటు లభించనుంది.

టీడీఆర్ (TDR) వాడితే అదనపు అంతస్తులు!

స్థల యజమానులు తమ ప్లాట్ పరిమాణం మరియు రోడ్డు వెడల్పును బట్టి టీడీఆర్ (Transferable Development Rights) ఉపయోగించి అదనపు అంతస్తులు నిర్మించుకోవచ్చు:

• 750 నుండి 2000 చ.మీ. ప్లాట్లు: టీడీఆర్ ద్వారా భవనం ఎత్తు పెంచుకోవడానికి అనుమతి.
• 40 అడుగుల రోడ్డు ఉంటే: 3 అంతస్తులు అదనంగా కట్టుకోవచ్చు.
• 60 అడుగుల రోడ్డు ఉంటే: 4 అంతస్తులు అదనంగా నిర్మించుకోవచ్చు.
• 80 అడుగుల రోడ్డు ఉంటే: ఏకంగా 5 అంతస్తుల వరకు అదనపు నిర్మాణానికి ఛాన్స్.

సెట్‌బ్యాక్ (Setback) నిబంధనల్లో సడలింపు

చాలా మంది ఇళ్లు కట్టుకునేటప్పుడు చుట్టూ వదలాల్సిన స్థలం (Setback) విషయంలో ఇబ్బందులు పడుతుంటారు. కొత్త రూల్స్ ప్రకారం:

• నాన్ హై-రైజ్ భవనాలకు సెట్‌బ్యాక్ నిబంధనల్లో సడలింపు ఇచ్చారు.
• హై-రైజ్ భవనాల్లో 10% వరకు సెట్‌బ్యాక్ రిలాక్సేషన్ పొందే అవకాశం కల్పించారు.
• 2000 చదరపు మీటర్ల కంటే ఎక్కువ స్థలం ఉన్న వారు అదనపు అంతస్తుల కోసం దరఖాస్తు చేసుకోవచ్చు.

టీడీఆర్ సమర్పణ తప్పనిసరి

పెద్ద పెద్ద భవనాలు నిర్మించే వారు టీడీఆర్ సమర్పించడంపై ప్రభుత్వం స్పష్టత ఇచ్చింది:

• 10 నుంచి 20 అంతస్తుల భవనాలు: 3% టీడీఆర్ సమర్పించాలి.
• 20 అంతస్తుల పైన భవనాలు: 5% టీడీఆర్ తప్పనిసరి.
• భవన అనుమతి (Permission) సమయంలో 50 శాతం, ఆక్యుపెన్సీ సర్టిఫికేట్ (OC) తీసుకునే ముందు మిగిలిన 50 శాతం టీడీఆర్ సమర్పించాల్సి ఉంటుంది.

రాష్ట్రవ్యాప్తంగా తక్షణమే అమల్లోకి వచ్చిన ఈ కొత్త ఆదేశాల వల్ల నిర్మాణ రంగం మరింత క్రమబద్ధీకరణ చెందడమే కాకుండా, రియల్ ఎస్టేట్ వ్యాపారానికి కొత్త కళ రానుందని నిపుణులు విశ్లేషిస్తున్నారు.

English summary

Telangana government updates Building Rules 2012 via GO 95. New norms allow extra floors based on road width, TDR usage for high-rises, and 10% setback relaxations for developers.