తెలంగాణ రైజింగ్ 2047:మూడంచెల అభివృద్ధి-ఇది సీఎం రేవంత్ విజన్..!!

తెలంగాణ రాష్ట్ర భవిష్యత్తును నిర్దేశిస్తూ, రాబోయే రెండు దశాబ్దాల (2047 వరకు) సమగ్ర, సమ్మిళిత, సుస్థిర అభివృద్ధి కోసం ముఖ్యమంత్రి ఎ. రేవంత్ రెడ్డి ప్రత్యేక చొరవతో "తెలంగాణ రైజింగ్ 2047" విజన్ డాక్యుమెంట్ రూపొందించబడింది. రాబోయే రోజుల్లో ప్రపంచ దేశాలతో పోటీపడేలా తెలంగాణను ఆవిష్కరించే లక్ష్యంతో, నాలుగు కోట్ల ప్రజల ఆకాంక్షలకు అనుగుణంగా ఈ డాక్యుమెంట్ రూపుదిద్దుకుంది.

నిపుణులు, మేధావుల మేథోమథనం
రాష్ట్ర మంత్రులు, అన్ని విభాగాల అధికారులు, మేధావులు, పారిశ్రామికవేత్తలు, నిపుణుల సలహాలతో పాటు నీతి ఆయోగ్ (NITI Aayog),ఇండియన్ స్కూల్ ఆఫ్ బిజినెస్(ISB) ప్రొఫెసర్లు ఈ దార్శనిక పత్రాన్ని తయారు చేయడంలో కీలక భూమిక పోషించారు. ప్రపంచవ్యాప్తంగా విజయవంతమైన విధానాలను అధ్యయనం చేసి, రోజుల తరబడి చర్చలు జరిపి రాష్ట్ర ఉజ్వల భవిత కోసం ఈ రోడ్‌మ్యాప్‌ను ఖరారు చేశారు.

ప్రధాన లక్ష్యం: 3 ట్రిలియన్ డాలర్ల ఆర్థిక వ్యవస్థ
తెలంగాణ రైజింగ్ 2047 విజన్ డాక్యుమెంట్ ప్రధాన లక్ష్యం, 2047 నాటికి రాష్ట్ర ఆర్థిక వ్యవస్థను 3 ట్రిలియన్ డాలర్లకు వృద్ధి చేయడం. ఈ మైలురాయిని చేరుకోవడం ద్వారా తెలంగాణ దేశంలోనే అత్యంత అభివృద్ధి చెందిన రాష్ట్రాల్లో ఒకటిగా, ప్రపంచ దేశాలకు ధీటుగా నిలుస్తుంది.

ఈ ఆర్థిక వృద్ధిని సాధించడానికి మూడు మూల స్తంభాలను,మూడు ఉత్ప్రేరకాలను డాక్యుమెంట్‌లో పొందుపరిచారు:
1.ఆర్థిక వృద్ధి (Economic Growth): 3 ట్రిలియన్ డాలర్ల లక్ష్యం
2.సమ్మిళిత అభివృద్ధి (Inclusive Development): వృద్ధి ఫలాలు అన్ని వర్గాలకు చేరడం.
3.సుస్థిర అభివృద్ధి (Sustainable Development): 2047 నాటికి నెట్-జీరో ఉద్గారాల లక్ష్యం.

1.సాంకేతికత & ఆవిష్కరణ (Technology & Innovation): పాలనలో ఆధునిక సాంకేతిక వినియోగం.
2.సమర్థవంతమైన ఆర్థిక వనరులు (Efficient Financing): ప్రపంచ పెట్టుబడుల ఆకర్షణ.
3. సుపరిపాలన (Good Governance): పారదర్శక, జవాబుదారీ పాలన.

సమతుల్య వృద్ధికి 'CURE-PURE-RARE' త్రి-జోన్ల వ్యూహం
రాష్ట్రంలోని అన్ని ప్రాంతాల మధ్య సమతుల్య అభివృద్ధిని సాధించేందుకు ఈ డాక్యుమెంట్ ఒక ప్రత్యేకమైన మూడు-జోన్ల అభివృద్ధి నమూనాను (CURE-PURE-RARE) ప్రతిపాదించింది. అభివృద్ధి ప్రామాణికంగా రాష్ట్రాన్ని మూడు జోన్‌లుగా విభజించిన ఏకైక రాష్ట్రంగా తెలంగాణ అవతరించింది.

• CURE (కోర్ అర్బన్ రీజియన్ ఎకానమీ): 160 కిలోమీటర్ల ఔటర్ రింగ్ రోడ్ (ORR) లోపల ఉన్న హైదరాబాద్ ప్రాంతం. ఇది సేవల విస్తరణకు ప్రాధాన్యతనిస్తూ, ప్రపంచ స్థాయి నాలెడ్జ్ మరియు ఆవిష్కరణల కేంద్రంగా, నెట్-జీరో సిటీగా అభివృద్ధి చెందుతుంది.
• PURE (పెరి-అర్బన్ రీజియన్ ఎకానమీ): ORR మరియు 360 కిలోమీటర్ల రీజియనల్ రింగ్ రోడ్ (RRR) మధ్య ఉన్న జోన్. ఇది తయారీ రంగానికి కేంద్రంగా, పారిశ్రామిక క్లస్టర్లు మరియు లాజిస్టిక్స్ హబ్‌లతో అభివృద్ధి చెందుతుంది.
• RARE (రూరల్ అగ్రికల్చర్ రీజియన్ ఎకానమీ): RRR దాటి, రాష్ట్ర సరిహద్దుల వరకు విస్తరించి ఉన్న గ్రామీణ ప్రాంతాలు. ఇక్కడ వ్యవసాయం, హరిత ఆర్థిక వ్యవస్థ, మరియు వ్యవసాయ ఆధారిత పరిశ్రమలపై ప్రత్యేక దృష్టి సారిస్తారు.

కీలక వ్యూహాలు- గేమ్-ఛేంజర్ ప్రాజెక్టులు
ఈ దార్శనికతను సాధించడానికి మొత్తం పది కీలక వ్యూహాలను డాక్యుమెంట్‌లో ప్రస్తావించారు. వీటిలో భారత్ ఫ్యూచర్ సిటీ, మూసీ పునరుజ్జీవనం, డ్రై పోర్ట్, బుల్లెట్ రైలు కారిడార్ల వంటి గేమ్-ఛేంజర్ ప్రాజెక్టులు కీలకం కానున్నాయి. పాలనా సామర్థ్యాన్ని పెంచడానికి డిజిటల్ గవర్నమెంట్ మరియు T-ఫైబర్ వంటి కార్యక్రమాలను బలోపేతం చేయాలని డాక్యుమెంట్ సిఫార్సు చేసింది. పెట్టుబడులను ఆకర్షించడానికి మరియు పాలనలో పౌరుల భాగస్వామ్యాన్ని నిర్ధారించడానికి కూడా ప్రత్యేక వ్యూహాలను రూపొందించారు.

2034 నాటికి ఒక ట్రిలియన్ డాలర్ల ఆర్థిక వ్యవస్థను సాధించాలనే మైలురాయిని నిర్దేశిస్తూ, తెలంగాణను పెట్టుబడులకు గమ్యస్థానంగా, ఆవిష్కరణలకు కేంద్రంగా మార్చాలని లక్ష్యంగా పెట్టుకున్నారు.

English summary

Telangana government under CM Revanth Reddy releases 'Telangana Rising 2047' vision document. Key pillars: $3 Trillion economic growth, Inclusive and Sustainable Development. Focus on CURE-PURE-RARE zonal model for balanced growth.