రాత్రికి వస్తేనే రెమ్యూనరేషన్! కోరిక తీరిస్తేనే సినిమా ఛాన్స్..

చిత్ర పరిశ్రమలో అవకాశాల పేరుతో నటీమణులను లొంగదీసుకోవడం, లైంగికంగా వేధించడం, ఆర్థికంగా మోసం చేయడం వంటి అరాచకాలు నిరంతరాయంగా వెలుగుచూస్తూనే ఉన్నాయి. తాజాగా వెండితెరపై రాణించాలనే ఆకాంక్షతో గత కొన్ని ఏళ్లుగా సినిమా రంగంలో లీడ్ ఆర్టిస్ట్‌గా (నటిగా) కొనసాగుతున్న ఒక యువతికి క్యాస్టింగ్ విభాగంలో తీవ్ర చేదు అనుభవం ఎదురైంది. తన శ్రమకు రావాల్సిన డబ్బులు అడిగినందుకు కారులోనే అసభ్యంగా ప్రవర్తించడమే కాకుండా.. ప్రాణాలతో లేపేస్తానంటూ బెదిరింపులకు దిగిన క్యాస్టింగ్ ఆర్టిస్ట్ ప్రసాద్ అనే వ్యక్తిపై బంజారాహిల్స్ పోలీస్ స్టేషన్‌లో కేసు నమోదైంది. బాధితురాలి ఫిర్యాదుతో పోలీసులు ఎఫ్‌ఐఆర్ నమోదు చేసి దర్యాప్తును వేగవంతం చేశారు.

అసలేం జరిగిందంటే..?

పోలీస్ రికార్డుల ప్రకారం.. ఓ నటి గత కొన్నేళ్లుగా చిత్ర పరిశ్రమలో పనిచేస్తోంది. ఈ క్రమంలోనే సిద్ధు అనే స్నేహితుని ద్వారా ప్రసాద్ అనే క్యాస్టింగ్ ఆర్టిస్ట్ పరిచయమయ్యాడు. 2025 అక్టోబర్‌లో ప్రసాద్ ఆమెకు ఫోన్ చేసి, "ఆకాశంలో ఒక తార" అనే సినిమాలో హీరోయిన్ ఫ్రెండ్ క్యారెక్టర్ ఉందని నమ్మించాడు. ఇందుకు సదరు నటి అంగీకరించడంతో 21.10.2025 నుంచి 09.12.2025 వరకు జరిగిన షూటింగ్ షెడ్యూల్‌లో పాల్గొని తన రోల్ పూర్తి చేసింది. ఇందుకు గానూ ఆమెకు రూ. 90,000 పారితోషికంతో పాటు క్యాబ్ ఖర్చులు రూ. 38,000 (మొత్తం రూ. 1,28,000) చెల్లించాల్సి ఉంది.

నిర్మాత ఆఫీస్ ముందే కారులో అరాచకం!

సినిమా పూర్తయ్యాక తన బకాయిల కోసం నటి సదరు క్యాస్టింగ్ ఆర్టిస్ట్‌ను సంప్రదించగా.. ఇవాళ, రేపు అంటూ కాలయాపన చేస్తూ వచ్చాడు. తీరా ఈ ఏడాది ఫిబ్రవరి 18న బంజారాహిల్స్ లోని ఓ ప్రముఖ నిర్మాత కార్యాలయం వద్దకు డబ్బుల నిమిత్తం రావాలని నటిని ప్రసాద్ పిలిపించాడు. అక్కడికి వెళ్లిన ఆమెను బలవంతంగా కారులోకి ఎక్కించుకుని, కొంతదూరం తీసుకెళ్లి అసభ్యంగా ప్రవర్తించడం మొదలుపెట్టాడు. "నేను చెప్పినట్లు వింటే సినిమాలో ఇంకా మంచి అవకాశాలు ఇప్పిస్తా" అంటూ లొంగదీసుకోవడానికి ప్రయత్నించాడు. ప్రసాద్ వేధింపుల నుంచి ఎలాగోలా తప్పించుకున్న బాధితురాలు, తీవ్ర అవమానంతో ఆ సమయంలో ఇంటికి వచ్చేసింది.

'నైట్ కాల్స్'కు రావాలంటూ ఫోన్లలో వేధింపులు

డబ్బుల విషయంపై బాధితురాలి తల్లి ప్రసాద్‌కు ఫోన్ చేయగా, ఆయన అత్యంత నీచమైన భాష పదజాలంతో బూతులు తిట్టాడు. అంతేకాకుండా, నటిను 'నైట్ కాల్స్' పంపాలంటూ ఒత్తిడి తెచ్చాడు. దీన్ని ప్రశ్నించినందుకు.. "నా వెనుక పెద్ద పెద్ద వాళ్లు ఉన్నారు, నన్నెవరూ ఏమీ చేయలేరు, ఇప్పటికే చాలా మంది అమ్మాయిలను ఇలాగే చేసి రూ. 3 కోట్లు సంపాదించా.. ఎక్కువ మాట్లాడితే తల్లీకూతుళ్లను చంపేస్తా" అంటూ ఫోన్లలోనే తీవ్రంగా బెదిరించాడు.

రంగంలోకి దిగిన బంజారాహిల్స్ పోలీసులు

గత కొన్ని నెలలుగా నిరంతరం ఎదురవుతున్న మానసిక వేధింపులు, బెదిరింపులను భరించలేకపోయిన బాధితురాలు చివరకు ధైర్యం చేసి బంజారాహిల్స్ పోలీసులను ఆశ్రయించింది. బాధితురాలి లిఖితపూర్వక ఫిర్యాదును స్వీకరించిన సబ్-ఇన్‌స్పెక్టర్ కె. సురేంధర్.. నిందితుడైన క్యాస్టింగ్ ఆర్టిస్ట్ ప్రసాద్‌పై క్రైమ్ నెంబర్ 521/2026 కింద భారతీయ న్యాయ సంహిత (BNS) లోని సెక్షన్లు 75 (లైంగిక వేధింపులు), 79 (మహిళల పట్ల అసభ్య ప్రవర్తన/అగౌరవపరచడం), 351(2) (క్రిమినల్ బెదిరింపులు) ల కింద కేసు నమోదు చేశారు. ఈ కేసు తదుపరి దర్యాప్తు బాధ్యతలను ఎస్ఐ కొట్టూరు విజయ్‌కు అప్పగించారు. చిత్ర పరిశ్రమలో మహిళల రక్షణపై మరోసారి చర్చకు దారితీసిన ఈ ఘటనలో పోలీసులు నిందితుడిని పట్టుకునేందుకు గాలింపు చర్యలు చేపట్టారు.

English summary

Banjara Hills police registered a case against casting artist Prasad under sections 75, 79, and 351(2) BNS for sexually harassing, cheating, and threatening a Tollywood actress over her pending movie remuneration.