మెట్రో అట్లాంటా ఉగాది వేడుకలు

ఇండియానాపోలిస్‌: మెట్రో అట్లాంటా తెలుగు సంఘం (తామా) ఆధ్వర్యంలో నార్‌క్రాస్‌లోని మెడోక్రీక్‌ హైస్కూల్‌లో ఉగాది వేడుకలను ఘనంగా నిర్వహించారు. జి.ఎస్‌.రెడ్డి, మూర్తి కొమండూరు ఈ వేడుకలకు ముఖ్య అతిథులుగా హాజరై జ్యోతి ప్రజ్వలన చేసి కార్యక్రమాన్ని ప్రారంభించారు. తామా అధ్యక్షుడు తాతా మధు ప్రవాసాంధ్రులకు ఉగాది శుభాకాంక్షలు తెలియజేశారు. వెంకట్‌, అనితలు వ్యాఖ్యాతలుగా నిర్వహించిన కవి సమ్మేళనం, జానపద, సాంప్రదాయ నృత్య, సంగీత ప్రదర్శనలు, ఫ్యాషన్‌ షో, పంచాంగ శ్రవణం, కట్టమూరి కళ్యాణ్‌ మిమిక్రీ తదితర కార్యక్రమాల్లో పిల్లలు, పెద్దలు ఉత్సాహంగా పాల్గొన్నారు.

పలు సేవా కార్యక్రమాల్లో చురుగ్గా పాల్గొంటున్న పలువురు ప్రవాసాంధ్రులకు ముఖ్య అతిథిలు జ్ఞాపికలను అందజేశారు. తామా కార్యవర్గ సభ్యులు రవి అల్లల, వెంకట్‌ వీరనేని, శీలం అలువాల్‌ రెడ్డి, యల్లాప్రగడ సంధ్య, కాటేపల్లి సునీల్‌, మహేష్‌ పవార్‌, వై.వరప్రసాద్‌, పెద్ది సురేష్‌ తదితరులు వేడుకల ఏర్పాట్లకు సహకరించిన దాతలకు, వాలంటీర్లకు కృతజ్ఞతలు తెలిపారు.