జూపల్లికి తెలంగాణ ఎన్నారైల అభినందన

తెలంగాణ రాష్ట్ర సాధన కోసం మంత్రి పదవికి రాజీనామా చేసిన జూపల్లి కృష్ణా రావును తెలంగాణ ఎన్నారైల జెఎసి అభినందించింది. తెలంగాణ రాష్ట్ర సాధన దిశగా సంభవిస్తున్న పరిణామాలను తాము ఆహ్వానిస్తున్నామని తెలంగాణ ఎన్నారైల జెఎసి ప్రతినిధి రవి మేరెడ్డి అన్నారు. పాలమూరు పాదయాత్రకు ముందు తెలంగాణ ఎన్నారైలు జూపల్లి కృష్ణా రావుతో టెలి కాన్ఫరెన్స్ ద్వారా మాట్లాడారని, ఉద్యమాన్ని కొనసాగించడానికి జూపల్లి కృతనిశ్చయంతో ఉన్నారని, తెలంగాణ రాష్ట్ర ఏర్పాటు కోసం ప్రభుత్వంపై ఒత్తిడి పెట్టడానికి సిద్ధంగా ఉన్నారని ఆయన అన్నారు.

తెలంగాణ ప్రజాప్రతినిధులు రాజీనామాలు చేసి తెలంగాణ ఉద్యమంలో వెంటనే చేరిపోవాలని ఆయన విజ్ఞప్తి చేశారు. లేకుంటే వారు తెలంగాణ ద్రోహులుగా మిగిలిపోతారని అన్నారు. రాజీనామాలు చేయని ప్రజాప్రతినిధులకు ప్రజలు తగిన బుద్ధి చెబుతారని అన్నారు. తెలంగాణపై తెలుగుదేశం ద్వంద్వ వైఖరి ఎండగట్టడంలో ముఖ్య భూమిక పోషించిన నాగం జనార్దన్ రెడ్డిని కూడా తెలంగాణ ఎన్నారైలు అభినందిస్తున్నట్లు ఆయన తెలిపారు. తెలంగాణ నాయకులు, సామాజిక సంఘాల ప్రితినిధులు జెఎసి గొడుగు కిందికి వచ్చి తెలంగాణ ఉద్యమాన్ని ఉధృతం చేయాలని ఆయన కోరారు.

English summary

The welcoming developments for the formation of Telangana state in the political circles, are being observed closely by many members of the Telangana NRI Joint Action Committee (TNRI-JAC).