తెలుగు కవిత: తీపి గాయాల యుగళగీతం

తెలుగు కవి నాగరాజు కువ్వారపు తీపి గాయాల యుగళగీతం అనే కవిత రాశారు. జీవితంలో ప్రేమ, స్నేహానికి ఉన్న ప్రాధాన్యతకు అద్దం పట్టేలా ఈ కవిత సాగుతుంది.

Updated: Saturday, February 11, 2017, 15:47 [IST]

*తీపి గాయాల యుగళగీతం*

పరిపూర్ణత్వం కోసం
పరితపించాలో
ఆత్మ సంతృప్తికోసమే
ప్రయత్నించాలో
అంతుచిక్కదు

'జీవనప్రయాణం'
నింగి నేలల మధ్య వివేచన
చీకటి వెలుగుల విశ్వరచన

తన జ్ఞాపకాలను
ఒడిసిపడతాం
కొన్ని గురుతులుగా దాచిపెడతాం
ఎందుకో చెప్పలేము

'స్త్రీ'
దాంపత్య చదరంగంలో గెలిచిన రాజు
జీవిత రణరంగంలో ఓడిన మంత్రి

సరదాలతో కొనసాగే ప్రయాణం
బాధనైనా
ఓర్పుగా భరించే ప్రమాణం
ఎంతకీ విడిపోదు

'స్నేహం'
వస్తువు కాని పుస్తకం
వత్తిడి కానివ్వని వ్యక్తిత్వం

నిశ్శబ్ద యుద్దానికి
కదిలిపోవాలో
నిర్బంధ ప్రేమలో
మునిగిపోవాలో
ఎవ్వరికీ తెలువదు

'ప్రేమ'
ఓ అంతుచిక్కని ప్రయోగం
అంతుచూడలేని రహస్యం

తనొక స్వప్నం
తన సాధనకై తపనపడాలో
తనొక విప్లవం అని పోరాడాలో
అర్థం కాదు

జీవితం
తీపి గాయాల యుగళ గీతం
గెలుపు ఓటముల సంగీతం

-నాగరాజు కువ్వారపు
8688154469