బుల్లెట్ బండి ఎక్కేస్తవా.. డుగ్గు డుగ్గని.. భారీ డిస్కౌంట్స్!

Royal Enfield: కేంద్ర సర్కారు ఇటీవల ప్రకటించిన జీఎస్టీ సంస్కరణల కారణంగా 350 సీసీ కంటే తక్కువ ఇంజిన్ సామర్థ్యం గల మోటార్ సైకిళ్లపై జీఎస్టీ రేటు 28 శాతం నుంచి 18 శాతానికి తగ్గింది. ఈ నిర్ణయంతో ఇండియాలో అత్యంత ప్రజాదరణ పొందిన రాయల్ ఎన్‌ఫీల్డ్ బైక్‌ల ధరలు గణనీయంగా తగ్గుతున్నాయి. ఈ మార్పులు సెప్టెంబర్ 22, 2025 నుంచి అమలులోకి రానున్నాయి. దీనితో వినియోగదారులకు ముఖ్యంగా పండుగ సీజన్ లో భారీ లబ్ధి చేకూరనుంది.

ఏ బైక్‌పై ఎంత తగ్గింపు?
రాయల్ ఎన్‌ఫీల్డ్ బైక్‌ కొనాలని ఆలోచిస్తున్న వారికి ఇదో సువర్ణావకాశం. జీఎస్టీ తగ్గిన తర్వాత ఏ మోడల్ పై ఎంత లాభం పొందవచ్చో వివరాలు కింద ఇవ్వబడ్డాయి.

రాయల్ ఎన్‌ఫీల్డ్ బుల్లెట్ 350: రాయల్ ఎన్‌ఫీల్డ్ ఐకానిక్ మోడల్ అయిన బుల్లెట్ 350 ధరలో దాదాపు రూ.17,000 వరకు తగ్గింపు లభించనుంది. ప్రస్తుతం ఈ బైక్ ఎక్స్-షోరూమ్ ధర రూ.1,76,625 నుండి ప్రారంభమవుతుండగా.. సెప్టెంబర్ 22 తర్వాత దీని ప్రారంభ ధర రూ.1.58 లక్షలకు తగ్గే అవకాశం ఉంది.

రాయల్ ఎన్‌ఫీల్డ్ క్లాసిక్ 350: యువతలో అత్యధిక క్రేజ్ ఉన్న క్లాసిక్ 350 మోడల్ ధర రూ.20,000 వరకు తగ్గుతుందని అంచనా. ఈ మోడల్ ప్రస్తుత ఎక్స్-షోరూమ్ ధర రూ.1,97,253 కాగా, జీఎస్‌టీ తగ్గింపు తర్వాత ఇది రూ.1.77 లక్షల నుంచి ప్రారంభం కానుంది.

రాయల్ ఎన్‌ఫీల్డ్ హంటర్ 350: రాయల్ ఎన్‌ఫీల్డ్ సిరీస్‌లో అత్యంత సరసమైన బైక్ అయిన హంటర్ 350 ధర కూడా తగ్గుతోంది. దీని ధరలో రూ.17,000 వరకు తగ్గింపు ఉండవచ్చు. ప్రస్తుతం రూ.1,76,750 ఎక్స్-షోరూమ్ ధర ఉన్న హంటర్ 350, సెప్టెంబర్ 22 నుంచి రూ.1.59 లక్షలకు అందుబాటులోకి రావచ్చు.

రాయల్ ఎన్‌ఫీల్డ్ మీటియార్ 350: ఈ మోడల్‌పై కూడా భారీ తగ్గింపులు లభించనున్నాయి. ఇది కూడా రూ.20,000 వరకు తగ్గుతుందని అంచనా.

కొన్ని మోడళ్ల ధరలు పెరిగే అవకాశం
అయితే 350 సీసీ కంటే ఎక్కువ సామర్థ్యం గల బైక్‌లపై జీఎస్‌టీని 40శాతానికి పెంచారు. దీనివల్ల రాయల్ ఎన్‌ఫీల్డ్ హిమాలయన్, ఇంటర్‌సెప్టర్, కాంటినెంటల్ జీటీ, ఇతర 650 సీసీ బైక్‌లు వంటి మోడళ్ల ధరలు పెరిగే అవకాశం ఉంది. వినియోగదారులు తమకు నచ్చిన బైక్‌ను ఎంచుకునే ముందు ధరల మార్పును జాగ్రత్తగా పరిశీలించడం మంచిది.

ఈ జీఎస్‌టీ మార్పులు కేవలం రాయల్ ఎన్‌ఫీల్డ్‌కు మాత్రమే పరిమితం కాకుండా, బజాజ్, టీవీఎస్, జావా, యెజ్దీ వంటి ఇతర కంపెనీల 350 సీసీ లోపు బైక్‌ల ధరలపై కూడా ప్రభావం చూపుతాయి. ఈ మార్పులు సెప్టెంబర్ 22 నుండి అధికారికంగా అమలులోకి వస్తాయి.

English summary

Due to a recent GST reduction from 28% to 18% on motorcycles below 350cc, Royal Enfield's popular models like Bullet, Classic, and Hunter will become significantly cheaper starting September 22, 2025.