టీమిండియా ఖాతాలో మరో విక్టరీ

IND vs ZIM: అయిదు మ్యాచ్‌ల టీ20 ఇంటర్నేషనల్స్ సిరీస్‌లో భాగంగా జింబాబ్వేతో జరిగిన మూడో మ్యాచ్‌లో టీమిండియా ఘన విజయాన్ని సాధించింది. 23 పరుగుల తేడాతో ప్రత్యర్థిని మట్టికరిపించింది. ఈ విజయంతో ఈ సిరీస్‌లో 2-1 తేడాతో ఆధిక్యతను సాధించింది. నాలుగో మ్యాచ్ ఈ నెల13వ తేదీన షెడ్యూల్ అయింది.

తొలుత బ్యాటింగ్‌కు దిగిన టీమిండియా నిర్ణీత 20 ఓవర్లల్లో నాలుగు వికెట్ల నష్టానికి 182 పరుగులు చేసింది. కేప్టెన్ శుభ్‌మన్ గిల్ 66 పరుగులతో కదం తొక్కాడు. 49 బంతుల్లో మూడు సిక్సర్లు, ఏడు ఫోర్లతో చెలరేగాడు. మిడిలార్డర్‌లో రుతురాజ్ గైక్వాడ్ మెరుపు ఇన్నింగ్ ఆడాడు. 28 బంతుల్లో మూడు సిక్సర్లు, నాలుగు ఫోర్లతో 49 పరుగులు చేశాడు.

ఓపెనర్ యశస్వి జైస్వాల్- 36, టాప్ ఆర్డర్ బ్యాటర్ అభిషేక్ శర్మ- 10 పరుగులు చేశారు. సంజు శాంసన్- 12, రింకూ సింగ్ ఒక పరుగుతో నాటౌట్‌గా నిలిచారు. 183 పరుగుల లక్ష్యంతో బరిలోకి దిగిన జింబాబ్వే పోరాడి ఓడింది. నిర్ణీత 20 ఓవర్లల్లో ఆరు వికెట్ల నష్టానికి 159 పరుగులు చేయగలిగింది.

ఓపెనర్లు వెస్లీ మధెవెరె- 1, టడివనషె మరుమని- 13, బ్రియాన్ బెన్నెట్- 4 పరుగులు విఫలం అయినప్పటికీ.. మిడిలార్డర్‌లో డియాన్ మేయర్స్ జట్టును ఆదుకున్నాడు. 49 బంతుల్లో ఒక సిక్సర్, ఏడు ఫోర్లతో 65 పరుగులతో నాటౌట్‌గా నిలిచాడు. కేప్టెన్ సికందర్ రజా- 15 పరుగులతో మరోసారి విఫలం కాగా.. లోయర్ ఆర్డర్ బ్యాటర్ క్లైవ్ మడండె రెచ్చిపోయి ఆడాడు. 37 పరుగులు చేశాడు.

వారికి సహకరించే బ్యాటర్లు లేకపోవడంతో 159 పరుగుల వద్ద జింబాబ్వే జట్టు ప్రస్థానం ఆగిపోయింది. టీమిండియా బౌలర్లల్లో వాషింగ్టన్ సుందర్ మూడు వికెట్లతో సత్తా చాటాడు. నాలుగు ఓవర్ల కోటాలో 15 పరుగులు మాత్రమే ఇచ్చి సికందర్ రజా, జొనాథన్ క్యాంప్‌బెల్, క్లైవ్ మడండే వికెట్లను తీసుకున్నాడు. అవేష్ ఖాన్- 2, ఖలీల్ అహ్మద్ ఒక వికెట్ తీసుకున్నారు.

English summary

India beat Zimbabwe by 23 runs in Harare, in the 3rd T20 match and take 2-1 lead in the 5-match series.