SRH కొంపముంచిన క్లాసెన్ జిడ్డు బ్యాటింగ్

ఐపీఎల్ 2026 సీజన్‌లో సన్‌రైజర్స్ హైదరాబాద్ పరాజయాల పరంపర కొనసాగుతోంది. శనివారం ముల్లాన్‌పూర్ వేదికగా జరిగిన మ్యాచ్‌లో పంజాబ్ కింగ్స్ 6 వికెట్ల తేడాతో సన్‌రైజర్స్ హైదరాబాద్‌ను ఓడించింది. చెత్త బౌలింగ్‌తో పాటు హెన్రీచ్ క్లాసెన్ జిడ్డు బ్యాటింగ్ సన్‌రైజర్స్ హైదరాబాద్ విజయవకాశాలను దెబ్బతీసింది. 220 పరుగుల భారీ లక్ష్యాన్ని సన్‌రైజర్స్ హైదరాబాద్ కాపాడుకోలేకపోయింది.

ఈ మ్యాచ్‌లో ముందుగా బ్యాటింగ్ చేసిన సన్‌రైజర్స్ హైదరాబాద్ 20 ఓవర్లలో 6 వికెట్లకు 219 పరుగుల భారీ స్కోర్ చేసింది. అభిషేక్ శర్మ(28 బంతుల్లో 5 ఫోర్లు, 8 సిక్స్‌లతో 74) విధ్వంసకర బ్యాటింగ్‌తో చెలరేగగా.. ట్రావిస్ హెడ్(23 బంతుల్లో 5 ఫోర్లు, సిక్స్‌తో 38) దూకుడుగా ఆడాడు. పంజాబ్ కింగ్స్ బౌలర్లలో అర్ష్‌దీప్ సింగ్, శశాంక్ సింగ్ రెండేసి వికెట్లు తీయగా.. జేవియర్ బార్ట్‌లెట్‌కు ఒక వికెట్ దక్కింది.

Photo Credit: X(twitter)

అనంతరం పంజాబ్ కింగ్స్ 18.5 ఓవర్లలో 4 వికెట్లకు 223 పరుగులు చేసి గెలుపొందింది. ఓపెనర్లు ప్రియాన్ష్ ఆర్య(20 బంతుల్లో 5 ఫోర్లు, 5 సిక్స్‌లతో 57), ప్రభ్‌సిమ్రాన్ సింగ్(25 బంతుల్లో 4 ఫోర్లు, 4 సిక్స్‌లతో 51), శ్రేయస్ అయ్యర్(33 బంతుల్లో 5 ఫోర్లు, 5 సిక్స్‌లతో69 నాటౌట్) హాఫ్ సెంచరీలతో రాణించారు. సన్‌రైజర్స్ హైదరాబాద్ బౌలర్లలో శివాంగ్ కుమార్(3/33) ఒక్కడే మూడు వికెట్లు పడగొట్టగా.. హర్ష్‌దూబే ఒక వికెట్ తీసాడు.

కొంపముంచిన క్లాసెన్ జిడ్డూ బ్యాటింగ్..

సన్‌రైజర్స్ హైదరాబాద్ బ్యాటింగ్ సందర్భంగా హెన్రీచ్ క్లాసెన్ జిడ్డు బ్యాటింగ్‌తో జట్టుకు నష్టం చేశాడు. 33 బంతుల్లో ఫోర్, సిక్స్‌తో 39 పరుగులే చేశాడు. దాంతో 250 ప్లస్ రన్స్ చేస్తుందనకున్న సన్‌రైజర్స్ హైదరాబాద్ 219 పరుగులకే పరిమితమైంది. అతని జిడ్డు బ్యాటింగ్ కారణంగా స్లాగ్ ఓవర్లలో సన్‌రైజర్స్ 37 పరుగులే చేసింది. క్లాసెన్ కాస్త దూకుడుగా ఆడి ఉంటే జట్టు లక్ష్యానికి 20-30 పరుగుల అదనంగా జతయ్యేవి. అప్పుడు సన్‌రైజర్స్ గెలిచే అవకాశం ఉండేది.

చెత్త బౌలింగ్..

క్లాసెన్ జిడ్డు బ్యాటింగ్‌కు తోడు బౌలర్ల వైఫల్యం సన్‌రైజర్స్ పతనాన్ని శాసించింది. సన్‌రైజర్స్ హైదరాబాద్ బౌలర్లలో శివాంగ్ కుమార్, హర్ష్‌దూబే మినహా మిగతా బౌలర్లు దారుణంగా విఫలమయ్యారు. ముఖ్యంగా హర్షల్ పటేల్(0/39), జయదేవ్ ఉనాద్కత్(0/40), ఎషాన్ మలింగా(0/46) వైఫల్యం సన్‌రైజర్స్ హైదరాబాద్ విజయవకాశాలను దెబ్బతీసింది.

ప్రఫుల్ హింగే‌‌ అరంగేట్రం చేస్తున్నాడని చెప్పిన సన్‌రైజర్స్ హైదరాబాద్.. అనూహ్యంగా అతని స్థానంలో జయదేవ్ ఉనాద్కత్‌ను ఇంపాక్ట్ ప్లేయర్‌గా ఆడించింది. కానీ ఈ వ్యూహం బెడిసికొట్టింది. ఉనాద్కత్ ఏ మాత్రం ప్రభావం చూపలేకపోయాడు. ప్రఫుల్ హింగేను ఆడించినా పరిస్థితి మరోలా ఉండేదేమో. హర్షల్ పటేల్ అయితే ధారళంగా పరుగులిచ్చుకున్నాడు. దాంతో 220 పరుగుల భారీ లక్ష్యం కూడా పంజాబ్ కింగ్స్ ముందు చిన్నబోయింది. ఈ బలహీనమైన బౌలింగ్‌తో సన్‌రైజర్స్ ఈ టోర్నీలో రాణించడం కష్టమనే అభిప్రాయం వ్యక్తమవుతోంది.

English summary

Heinrich Klaasen slow 39(33) and poor bowling cost SRH as Punjab Kings chased 220, overshadowing Abhishek Sharma’s explosive 74-run knock.