కోహ్లీ 18 ఏళ్ల కల: ఐపీఎల్ ట్రోఫీని ఈ సారైనా ముద్దాడేనా..!!
Virat Kohli:ఐపీఎల్ 2025 టోర్నమెంట్ చివరి దశకు చేరుకుంది. రాయల్ ఛాలెంజర్స్ బెంగళూరు (ఆర్సీబీ) ఇప్పటికే ఫైనల్స్లో తమ స్థానాన్ని ఖాయం చేసుకోగా, మిగిలిన రెండు జట్లు రెండో ఫైనల్ బెర్త్ కోసం హోరాహోరీగా తలపడుతున్నాయి. ఈ సీజన్ ఆద్యంతం అద్భుత ప్రదర్శన కనబరిచిన ఆర్సీబీ, ఈసారి టైటిల్ గెలుచుకునే ఫేవరెట్ జట్టుగా బరిలోకి దిగుతోంది. అభిమానుల 18 ఏళ్ల సుదీర్ఘ నిరీక్షణ ఈసారైనా ఫలించాలని వారు ఆకాంక్షిస్తున్నారు.
భారత క్రికెట్ దిగ్గజం విరాట్ కోహ్లీ సాధించని ఘనతలు లేవు. వన్డే ప్రపంచకప్, టీ20 ప్రపంచకప్, ఛాంపియన్స్ ట్రోఫీ, ఆసియా కప్ వంటి మేజర్ టోర్నీలన్నీ గెలిచాడు. కానీ 17 ఏళ్లుగా అతడిని ఊరిస్తున్న ఏకైక ట్రోఫీ ఐపీఎల్ మాత్రమే.మూడుసార్లు ఫైనల్ చేరినా, రెండుసార్లు ఆర్సీబీ వెంట్రుకవాసిలో టైటిల్ను కోల్పోయింది. ముఖ్యంగా 2016 సీజన్లో విరాట్ కోహ్లీ సారథ్యంలోని ఆర్సీబీ అద్భుత ప్రదర్శనతో ఫైనల్ చేరింది. అయితే, ఫైనల్లో గెలుపు అంచుల వరకు వచ్చి కేవలం 8 పరుగుల తేడాతో ఓటమిపాలైంది. ఆ ఓటమి తర్వాత 9 ఏళ్లకు ఇప్పుడు మళ్లీ ఆర్సీబీ ఫైనల్కు దూసుకొచ్చింది.
18 ఏళ్ల సుదీర్ఘ ప్రస్థానం
విరాట్ కోహ్లీ 2008లో అండర్-19 ప్రపంచకప్ గెలిచిన తర్వాత, ఐపీఎల్ తొలి సీజన్లో రాయల్ ఛాలెంజర్స్ బెంగళూరు (ఆర్సీబీ) జట్టులో చేరాడు. వరుసగా 18 ఏళ్లు ఒకే ఫ్రాంచైజీకి ఆడిన ఏకైక ఆటగాడిగా చరిత్ర సృష్టించాడు. ఆర్సీబీ ఫ్రాంచైజీపై కోహ్లీకి ఎంత అభిమానం ఉందో, ఆర్సీబీ అభిమానులకు విరాట్ కోహ్లీపై అంతకుమించిన ప్రేమ ఉంది.
కోహ్లీ ఆర్సీబీ జట్టుకు కొండంత బలం. అతను మైదానంలో ఉంటే చాలు, ప్రేక్షకులకు పరుగుల విందు ఖాయం. 2016లో ఒకే సీజన్లో 4 సెంచరీలు సహా 973 పరుగులు సాధించడం ఇప్పటికీ ఒక రికార్డు. ఆర్సీబీ తరఫున ఇప్పటివరకు 9000 పరుగులు పూర్తి చేసిన కోహ్లీ, ఒకే ఫ్రాంచైజీకి ఇన్ని పరుగులు చేసిన ప్రపంచంలోని ఏకైక బ్యాటర్గా నిలిచాడు. 2013 నుంచి 2021 వరకు ఆర్సీబీకి కెప్టెన్గా వ్యవహరించిన కోహ్లీ, ఆ తర్వాత కెప్టెన్సీ నుంచి తప్పుకున్నాడు. ప్రస్తుతం రజత్ పటీదార్ నాయకత్వంలో జట్టు అద్భుతంగా రాణిస్తుండగా, కోహ్లీ సీనియర్ ఆటగాడిగా జట్టుకు మార్గనిర్దేశం చేస్తూ, ఎప్పటిలాగే అద్భుతమైన ఫామ్లో కొనసాగుతున్నాడు.
36 ఏళ్ల వయసులోనూ విజయాన్ని పసిపిల్లాడిలా ఆస్వాదించే, మైదానంలో చిరుతపులిలా కదిలే విరాట్ కోహ్లీ ఎంతో మంది యువ ఆటగాళ్లకు స్ఫూర్తి. అన్నీ సాధించినా ఐపీఎల్ కప్ లోటు మాత్రం అతడిని వెన్నాడుతూనే ఉంది. ఈ ఏడాది ఆ లోటు తీరాలని, కోహ్లీ కప్ ఎత్తి పట్టుకోవడాన్ని చూడాలని కోట్లాది మంది అభిమానులు ఉత్కంఠగా ఎదురుచూస్తున్నారు.
Click it and Unblock the Notifications
Sign in with Google