సన్నీ సార్ నేను రెడీ.. మీరు సిద్ధమా?
Sunil Gavaskar-Gemimah Rodrigues: భారత మహిళా క్రికెట్ జట్టు స్టార్ బ్యాటర్ జెమీమా రోడ్రిగ్స్ దేశం గర్వంచదగ్గ వన్డే ప్రపంచ కప్ విజయం తర్వాత క్రికెట్ లెజెండ్ సునీల్ గవాస్కర్ను ఉద్దేశించి చేసిన ఓ సరదా వీడియో ఇప్పుడు సోషల్ మీడియాలో వైరల్ అవుతోంది. వరల్డ్ కప్ ఫైనల్కు ముందు గవాస్కర్ ఇచ్చిన ఓ పాత వాగ్దానాన్ని జెమీమా గుర్తు చేశారు.
విజయోత్సవ వేళ.. మైక్ రెడీ చేయండి సార్!
మహిళల వన్డే వరల్డ్ కప్ 2025 గెలుచుకున్న ఆనందంలో ఉన్న జెమీమా.. తన ఇన్స్టాగ్రామ్ ద్వారా సునీల్ గవాస్కర్కు ఒక సందేశాన్ని పంపారు. "నమస్తే సునీల్ గవాస్కర్ సార్.. ఇండియా ప్రపంచ కప్ను గెలిస్తే, మనమిద్దరం కలిసి ఒక పాట పాడుతామని మీరు వాగ్దానం చేశారు. నేను నా గిటార్తో సిద్ధంగా ఉన్నాను, మీరు కూడా మీ మైక్తో సిద్ధంగా ఉంటారని ఆశిస్తున్నాను." అని జెమీమా పేర్కొన్నారు. గవాస్కర్ ఆ వాగ్దానం చేయడానికి కారణం.. 2024లో జరిగిన బీసీసీఐ అవార్డుల కార్యక్రమంలోనూ, జెమిమా గిటార్ వాయించగా, గావస్కర్ ప్రముఖ పాట **'క్యా హువా తేరా వాదా'**ను ఆలపించారు. ఇప్పుడు వరల్డ్ కప్ విజయం తర్వాత అభిమానులు వారిద్దరి 'వరల్డ్ కప్ డ్యుయెట్' కోసం ఉత్కంఠగా ఎదురుచూస్తున్నారు.
గర్వంగా ఉందన్న లిటిల్ మాస్టర్!
జెమీమా చేసిన ఈ సరదా అభ్యర్థనపై సునీల్ గవాస్కర్ వెంటనే ప్రత్యక్షంగా స్పందించకపోయినా.. భారత జట్టు చారిత్రక విజయంపై ఆయన తన ఆనందాన్ని పంచుకున్నారు. "హర్మన్ప్రీత్ కౌర్ (కెప్టెన్) క్యాచ్ పట్టి ICC మహిళల ప్రపంచ కప్ను గెలిచినప్పుడు DY పాటిల్ స్టేడియంలో ఎంత అద్భుతమైన క్షణం అది. అమ్మాయిలు పోరాడిన తీరు అద్భుతం. కెప్టెన్ గొప్ప పోరాట పటిమను చూపించి ప్రపంచ కప్ను గెలుచుకుంది. ఇది ఎప్పటికీ గుర్తుంచుకోవలసిన క్షణం" అని గవాస్కర్ వీడియో సందేశంలో పేర్కొన్నారు. "భారత క్రికెట్ చరిత్రలో ఇది అద్భుతమైన క్షణం. మాకు ఎంతో సంతోషాన్ని, ఆనందాన్ని ఇచ్చినందుకు హర్మన్ప్రీత్ కౌర్కు, ఆమె జట్టుకు శుభాకాంక్షలు. మొత్తం క్రికెట్ కమ్యూనిటీ మీ పట్ల గర్వంగా ఉంది," అంటూ ఆయన అభినందించారు. తన పాత వాగ్దానాన్ని గుర్తు చేసిన జెమీమా అభ్యర్థనను కూడా గవాస్కర్ త్వరలోనే స్వీకరిస్తారని అభిమానులు ఆశిస్తున్నారు.
Click it and Unblock the Notifications
Sign in with Google