తండ్రయిన విరాట్: జూనియర్ కోహ్లీ వచ్చేశాడు

Virat Kohli and Anushka Sharma: టీమిండియా బ్యాటింగ్ మెషీన్ విరాట్ కోహ్లీ తండ్రయ్యాడు. ఆయన భార్య, బాలీవుడ్ నటి అనూష్క శర్మ పండంటి బాబుకు జన్మనిచ్చారు. ఈ విషయాన్ని కోహ్లీ వెల్లడించాడు. ఈ మేరకు దీనికి సంబంధించిన సమాచారాన్ని కొద్దిసేపటి కిందటే తన అధికారిక ఇన్‌స్టాగ్రామ్‌లో పోస్ట్ చేశారు కోహ్లీ- అనూష్క.

ప్రస్తుతం కోహ్లీ.. భారత జట్టుతో లేడు. వరల్డ్ టెస్ట్ ఛాంపియన్‌షిప్‌లో భాగంగా ఇంగ్లాండ్‌తో జరుగుతున్న అయిదు టెస్ట్ మ్యాచ్‌ల సిరీస్‌లో ఆడట్లేదు. ఈ మ్యాచ్‌లన్నింటికీ దూరంగా ఉంటోన్నాడు. వ్యక్తిగత కారణాల వల్లే ఈ సిరీస్‌కు దూరమైనట్లు కోహ్లీ స్వయంగా వెల్లడించాడు. ప్రసవ సమయంలో భార్యకు దగ్గరగా ఉండాలనే కారణంతో సిరీస్ నుంచి తప్పుకొన్నాడు.

ముంబైలోని ఓ టాప్ కార్పొరేట్ ఆసుపత్రిలో అనూష్క శర్మ ఈ నెల 15వ తేదీన ప్రసవించారు. పండంటి బాబు జన్మనిచ్చారు. ఈ బాబు.. కోహ్లీ దంపతులకు రెండో సంతానం. ప్రస్తుతం వారికి ఓ కుమార్తె ఉంది. పేరు వామిక. కిందటి నెలతో వామిక మూడో సంవత్సరంలో అడుగు పెట్టింది.

ఇప్పుడు వామికకు తమ్ముడు వచ్చాడని కోహ్లీ వెల్లడించాడు. బాబుకు అకాయ్ అని పేరు పెట్టినట్లు చెప్పాడు. విరాట్ కోహ్లీ- అనూష్క శర్మ ఓ ఇంటి వాళ్లై ఇప్పటికి ఆరు సంవత్సరాలయింది. 2017 డిసెంబర్ 11వ తేదీన ఇటలీలోని టస్కనీలో వారిద్దరూ పెళ్లిపీటలు ఎక్కిన విషయం తెలిసిందే.

English summary

India's batter Virat Kohli announced that the they welcomed Vamika's little brother Akaay into the new world.