వైయస్ జగన్ సీక్రెట్ సర్వేలు

రాష్ట్రవ్యాప్తంగా వైయస్ జగన్ రహస్య సర్వేలు నిర్వహిస్తున్నట్లు సమాచారం. పార్టీ పెట్టడానికి ముందే ఈ సర్వేలను పూర్తి చేయాలని ఆయన భావిస్తున్నారట. ప్రజల నాడిని పట్టుకోవడానికి ఆయన ఈ సర్వేలు చేయిస్తున్నట్లు తెలుస్తోంది. సాక్షి మీడియాతో పాటు మరో జాతీయ సంస్థ కలిసి ఈ సర్వేలు చేస్తున్నట్లు సమాచారం. ఈ సర్వేల ఫలితాలను బట్టి పార్టీ విధివిధానాలను ఖరారు చేసుకోవాలని ఆయన అనుకుంటున్నారు. అంతేకాకుండా ఆయన భవిష్యత్తు కార్యక్రమం కూడా సర్వేల ఫలితాలను బట్టి ఉంటుందని అంటున్నారు.

వెంటనే పార్టీ పెడితే బలమైన శక్తిగా అవతరిస్తుందని ప్రజాభిప్రాయంగా వెల్లడైతే ముఖ్యమంత్రి కిరణ్ కుమార్ రెడ్డి ప్రభుత్వాన్ని కూల్చడానికి అవసరమైన వ్యూహరచన చేసుకోవాలని, కిరణ్ కుమార్ రెడ్డిపై గానీ కాంగ్రెసు పార్టీపై గానీ అంతగా వ్యతిరేకత లేదనుకుంటే మరింత కాలం ఆగాలని ఆయన అనుకుంటున్నారట. కిరణ్ కుమార్ రెడ్డిపై పెద్దగా వ్యతిరేకత లేకపోతే ఆయనను బలహీనపరిచే కార్యక్రమాలు తీసుకుంటారని చెబుతున్నారు. ప్రభుత్వాన్ని కావల్సినంత నష్టపరిచి, ప్రజల్లో వ్యతిరేకత వచ్చేలా చేయడం పనిగా పెట్టుకుంటారని సమాచారం.

జాతీయ స్థాయి నాయకత్వంపై ఆయన ఇప్పటికే యుద్ధాన్ని ప్రకటించారు. కాంగ్రెసు అధ్యక్షురాలు సోనియా గాంధీపై, రాహుల్ గాంధీపై సాక్షి మీడియా ద్వారా వ్యతిరేక ప్రచారాన్ని ముమ్మరం చేశారు. కిరణ్ కుమార్ రెడ్డి ప్రభుత్వంపై కూడా అదే విధమైన ప్రచారం మొదలు పెడతారనడంలో సందేహం లేదు. వైయస్ జగన్ ను అణచేయడానికే కాంగ్రెసు అధిష్టానం పదవుల పందేరాన్ని సాగిస్తోందని వైయస్ జగన్ వర్గం ఇప్పటికే ప్రచారం మొదలు పెట్టింది.