ప్రపంచంలో ఇంటర్నెట్ స్పీడ్ వేగంగా ఉండే దేశం ఏదో తెలుసా..?

ప్రపంచవ్యాప్తంగా ఇంటర్నెట్ వినియోగం భారీ స్థాయిలో పెరిగిపోయింది. మారుతున్న జీవనశైలి, సాంకేతికత, ఆర్టిఫిషియల్ ఇంటెలిజెన్స్ , డిజిటల్ విధానం.. తదితర మార్పుల కారణంగా చిన్నా పెద్దా అని తేడా లేకుండా ప్రతి ఒక్కరూ ఆండ్రాయిడ్ ఫోన్ వాడుతున్నారు. అందులో నెట్ లేదా వైఫై తో ఇంటర్నెట్ వినియోగిస్తున్నారు. ప్రపంచవ్యాప్తంగా ఇంటర్నెట్ వినియోగదారుల సంఖ్య క్రమంగా పెరుగుతున్నట్లు అధ్యయనాలు వెల్లడిస్తున్నాయి.

ఓ అధ్యయనం ప్రకారం ప్రస్తుతం ప్రపంచవ్యాప్తంగా 5.52 బిలియన్ల మంది ఇంటర్నెట్ వినియోగదారులు ఉన్నారు. అంటే ప్రపంచ జనాభాలో ఇది 67 శాతంతో సమానం. ఇక వీరిలో 95.9 శాతం మంది స్మార్ట్‌ ఫోన్‌ ల ద్వారా ఇంటర్నెట్‌ ను వినియోగిస్తున్నారు. అలాగే ఓ వ్యక్తి సగటున రోజుకు 6 గంటల 30 నిమిషాల పాటు ఇంటర్నెట్ వినియోగిస్తున్నట్లు అధ్యయనంలో తేలింది. అయితే ప్రపంచంలో ఇంటర్నెట్ స్పీడ్ వేగంగా ఉండే దేశం ఏదో తెలుసా..?

అయితే తాజా అంచనాల ప్రకారం.. ప్రపంచంలోనే ఫాస్టెస్ట్ ఇంటర్నెట్ స్పీడ్ ఉండే దేశంగా యునైటెడ్ అరబ్ ఎమిరేట్స్(UAE) నిలిచింది. మొబైల్ ఇంటర్నెట్ స్పీడ్‌ లో ప్రపంచంలో మొదటి స్థానంలో ప్రస్తుతం UAE ఉంది. ఇక్కడ యావరేజ్‌ గా సెకన్ కు మెగా బైట్ 546 నుంచి 600 వరకు ఇంటర్నెట్ వేగం ఉంటుందని తెలుస్తోంది. ఇక ఈ లిస్టులో ఇక రెండో స్థానంలో ఖతార్ ఉంది. ఖతార్ లో మొబైల్ ఇంటర్నెట్ వేగం 500 నుంచి 517 Mbps వరకు ఉంటందని సమాచారం. అలాగే కువైట్ మూడో స్థానంలో.. బ్రెజిల్ నాలుగు, బహ్రెయిన్ ఐదో స్థానంలో ఉన్నాయి.

ఇక భారత్ లో ఇంటర్నెట్‌ వినియోగం రోజురోజుకూ పెరుగుతోంది. దేశంలోకి 5జీ ఎంటర్ అయిన తర్వాత ఇంటర్నెట్ వినియోగంలో భారత్ దూసుకెళ్తోంది. కొన్నేళ్ల క్రితం కేవలం నగరాలు, పట్టణాలకే పరిమితమైన ఇంటర్నెట్‌ ఇటీవలి కాలంలో గ్రామీణ ప్రాంతాల్లోనూ అందుబాటులోకి వచ్చింది. ఓ నివేదిక ప్రకారం.. ప్రస్తుతం దేశంలో 75.9 కోట్ల మంది ఇంటర్నెట్‌ వాడుతున్నట్లు సమాచారం.

ఇక ప్రపంచ వ్యాప్తంగా ఇంటర్నెట్ స్పీడ్ ర్యాంకింగ్స్ పరంగా చూస్తే భారత్ చాలా వెనుకబడి ఉండటం ఆందోళన కలిగిస్తోంది. భారత్ లో మొబైల్ ఇంటర్నెట్ స్పీడ్ చాలా తక్కువగా ఉన్నట్లు అధ్యయనం పేర్కొంది. కేవలం 131 నుంచి 133 ఎంబీపీఎస్ వేగంతో ఈ జాబితాలో 26వ స్థానంలో ఉంది. భవిష్యత్తులో 6జీ కూడా భారత్ లోకి రానున్న క్రమంలో ఇంటర్నెట్ స్పీడ్ పెరిగే అవకాశం ఉన్నట్లు తెలుస్తోంది.