తెలంగాణ గ్రూప్ 1 మెయిన్స్ పరీక్ష షెడ్యూల్ విడుదల

Published: Wednesday, June 12, 2024, 21:06 [IST]

తెలంగాణ గ్రూప్ -1 మెయిన్స్ ప‌రీక్ష‌ల‌కు సంబంధించిన షెడ్యూల్‌ను తెలంగాణ పబ్లిక్ సర్వీస్ కమిషన్(TGPSC) బుధవారం విడుద‌ల చేసింది. అక్టోబర్‌ 21వ తేదీ నుంచి 27 వరకు మెయిన్స్ పరీక్షలు జరగనున్నాయి. తెలుగు, ఉర్దూ, ఇంగ్లీష్ లాంగ్వేజ్లలో ప‌రీక్ష‌లు నిర్వ‌హించ‌నున్నారు. డిస్క్రిప్టివ్ విధానంలో ఈ పరీక్ష ఉంటుందని, అభ్యర్థులు తాము ఎంపిక చేసుకున్న భాషలోనే పరీక్ష రాసే వీలు కల్పిస్తున్నట్లు సంబంధిత అధికారులు తెలిపారు.

ప్ర‌తి పేప‌ర్ మ‌ధ్యాహ్నం 2.30 గంట‌ల నుంచి సాయంత్రం 5.30 గంట‌ల వ‌ర‌కు జరగనుంది. కాగా, తెలంగాణ రాష్ట్రంలో 563 గ్రూప్ 1 పోస్టుల భర్తీకి ఇటీవల ప్రిలిమినరీ పరీక్ష నిర్వహించిన విషయం తెలిసిందే. జూన్ 9న రాష్ట్ర వ్యాప్తంగా 895 పరీక్ష కేంద్రాల్లో గ్రూప్ 1 ప్రిలిమ్స్ పరీక్ష ఓఎంఆర్ పద్ధతిలో నిర్వహించారు. ఈ పరీక్షకు 4.03 లక్షల మందికిపైగా దరఖాస్తు చేసుకోగా.. 3.02 లక్షల మంది అభ్యర్థులు హాజరయ్యారు. త్వరలోనే ప్రిలిమ్స్ కీ, ఫలితాలు విడుదల చేయనున్నారు.