తెలంగాణ ఏఈ, జేటీవో హాల్ టికెట్లు అందుబాటులోకి, పరీక్ష తేదీలివే

హైదరాబాద్: తెలంగాణ రాష్ట్రంలోని వివిధ ఇంజినీరింగ్ విభాగాల్లో అసిస్టెంట్ ఇంజినీర్, మున్సిపల్ అసిస్టెంట్ ఇంజినీర్, టెక్నికల్ ఆఫీసర్, జూనియర్ టెక్నికల్ ఆఫీసర్ పోస్టుల భర్తీకి నోటిఫికేషన్ విడుదలైన విషయం తెలిసిందే. దరఖాస్తుల ప్రక్రియ కూడా పూర్తయింది. ఈ క్రమంలో కంప్యూటర్ ఆధారిత రాత పరీక్షకు హాల్ టికెట్లు మరో రెండు రోజుల్లో అందుబాటులో ఉండనున్నాయి.

హాల్ టికెట్లను అక్టోబర్ 14, 15 తేదీల్లో అందుబాటులో ఉంచనున్నట్లు తెలంగాణ రాష్ట్ర పబ్లిక్ సర్వీస్ కమిషన్ (TSPSC) ఓ ప్రకటనలో వెల్లడించింది. ఈ పరీక్షలు అక్టోబర్ 18, 19, 20వ తేదీల్లో రెండు సెషన్లలో ఆన్‌లైన్ విధానంలో జరగనున్నాయి.

Group-2: తెలంగాణ గ్రూప్-2 మరోసారి వాయిదా, కొత్త తేదీలివే

తెలంగాణ గ్రూప్-2 (Group-2) పరీక్ష మరోసారి వాయిదా పడింది. ముందుగా నిర్ణయించిన ప్రకారం నవంబర్ 2, 3న గ్రూప్-2 పరీక్ష నిర్వహించాల్సి ఉండగా.. తెలంగాణ అసెంబ్లీ ఎన్నికల నేపథ్యంలో ఈ పరీక్షను రీషెడ్యూల్ చేశారు. గ్రూప్-2 పరీక్షను వచ్చే ఏడాది(2024) జనవరి 6,7 తేదీల్లో నిర్వహించనున్నట్లు తెలంగాణ రాష్ట్ర పబ్లిక్ సర్వీస్ కమిషన్ (TSPSC) ఓ ప్రకటనలో వెల్లడించింది. టీఎస్‌పీఎస్సీ ఛైర్మన్ జనార్ధన్ రెడ్డి అధ్యక్షతన మంగళవారం జరిగిన సమావేశంలో గ్రూప్-2 పరీక్ష వాయిదా, కొత్త తేదీల ఖరారుకు సంబంధించిన కీలక నిర్ణయాలు తీసుకున్నారు. గ్రూప్-2 పరీక్ష వాయిదా పడటం ఇది రెండోసారి కావడం గమనార్హం. మొత్తం 783 గ్రూప్-2 పోస్టులకు రాష్ట్ర వ్యాప్తంగా దాదాపు 5.51 లక్షల మంది అభ్యర్థులు దరఖాస్తులు చేసుకున్నారు.

మొదట విడుదల చేసిన షెడ్యూల్ ప్రకారం.. ఆగస్టు 29, 30 తేదీల్లో ఈ పరీక్ష జరగాల్సి ఉన్నప్పటికీ.. అప్పుడు వరుసగా ఇతర పోటీ పరీక్షలు ఉండటంతో గ్రూప్-2 పరీక్ష వాయిదా వేయాలంటూ అభ్యర్థులు, రాజకీయ పార్టీల నేతలు ఆందోళనలకు దిగారు. దీంతో ప్రభుత్వం గ్రూప్ 2 పరీక్షను వాయిదా వేసింది. అప్పుడు నవంబర్ 2,3 తేదీల్లో గ్రూప్-2 పరీక్ష నిర్వహించేందుకు ఏర్పాటు చేశారు. అయితే, తాజాగా, తెలంగాణ అసెంబ్లీ ఎన్నికల షెడ్యూల్ విడుదల కావడంతో పరీక్ష నిర్వహణ క్లిష్టతరమయ్యే అవకాశం ఉండటంతో మరోసారి వాయిదా వేయాలని నిర్ణయించారు అధికారులు. దీంతో గ్రూప్-2 అభ్యర్థులు పరీక్ష రాసేందుకు వచ్చే ఏడాది జనవరి 6,7 వరకు ఎదురుచూడక తప్పదు. అయితే, పరీక్షకు చాలా సమయం ఉండటంతో అభ్యర్థులు పరీక్షకు పూర్తిస్థాయిలో సిద్ధమయ్యేందుకు సమయం దొరుతుందని అంటున్నారు.

English summary

tspsc released ae and jto 2023 re exam hall ticket.