'భర్త మహాశయులకు విజ్ఞప్తి' రివ్యూ..రవితేజ హిట్ కొట్టాడా..?

సంక్రాంతి సందడి మొదలైన వేళ, బాక్సాఫీస్ వద్ద 'మాస్ మహారాజ్' రవితేజ తన మార్కు కామెడీతో పలకరించారు. కిశోర్ తిరుమల దర్శకత్వంలో తెరకెక్కిన 'భర్త మహాశయులకు విజ్ఞప్తి' నేడు ప్రేక్షకుల ముందుకు వచ్చింది. మరి ఈ సినిమా ప్రేక్షకులను ఏ మేరకు నవ్వించింది? రవితేజ మళ్ళీ ఫామ్ లోకి వచ్చారా? రివ్యూలో చూద్దాం.

కథ
రామ సత్యనారాయణ అలియాస్ రామ్ (రవితేజ) ఒక సక్సెస్‌ఫుల్ ఆల్కహాల్ కంపెనీ ఓనర్. తను కొత్తగా కనిపెట్టిన 'అనార్కలి' అనే వైన్ బ్రాండ్‌ను అంతర్జాతీయ స్థాయికి తీసుకెళ్లాలని స్పెయిన్ వెళ్తాడు. అక్కడ ఆ కంపెనీ ఎండీ మానస (ఆషికా రంగనాథ్) పరిచయం అవుతుంది. వ్యాపార పనుల కోసం వెళ్ళిన రామ్, మానసకు దగ్గరవుతాడు. అయితే, రామ్‌కు అప్పటికే హైదరాబాద్‌లో బాలామణి (డింపుల్ హయతి)తో పెళ్లయి ఉంటుంది. ఈ విషయం మానసకు చెప్పకుండానే ఇండియా వచ్చేస్తాడు. కానీ, ట్విస్ట్ ఏంటంటే.. మానస అనుకోకుండా హైదరాబాద్ వచ్చి రామ్‌ను కలుస్తుంది. అటు భార్య, ఇటు ప్రియురాలు.. ఇద్దరి మధ్య రామ్ పడే పాట్లు, చేసే అబద్ధాల ప్రయాణమే ఈ సినిమా.

ఎలా ఉందంటే?
భార్య-ప్రియురాలి మధ్య నలిగిపోయే హీరో అనే పాయింట్ టాలీవుడ్‌కు కొత్తేమీ కాదు. గతంలో 'మొగుడు పెళ్ళాం ఓ ఇద్దరు భామలు' వంటి సినిమాలు చాలానే వచ్చాయి. కానీ, కిశోర్ తిరుమల ఈ పాత సీసాలో రవితేజ అనే కొత్త వైన్ (కామెడీ) పోసి అందించే ప్రయత్నం చేశారు.

ఫస్టాఫ్: స్పెయిన్ అందాలు, రామ్-మానస లవ్ ట్రాక్, సత్య కామెడీతో సరదాగా సాగిపోతుంది. ఇంటర్వెల్ సమయానికి మానస హైదరాబాద్ ఎంట్రీ ఇవ్వడంతో కథలో వేగం పెరుగుతుంది. సెకండాఫ్: అసలు వినోదం ఇక్కడే మొదలవుతుంది. ఇద్దరు భామలకు దొరక్కుండా రామ్ పడే తిప్పలు, అతనికి సాయం చేసే వెన్నెల కిషోర్, సునీల్ కలిసి థియేటర్లో నవ్వులు పూయించారు. అయితే, అక్కడక్కడ వచ్చే అనవసరపు ఫైట్స్, సాగదీత సీన్లు సినిమా వేగాన్ని తగ్గించాయి. క్లైమాక్స్ మాత్రం రొటీన్‌గా కాకుండా కాస్త కొత్తగా ఎండ్ చేయడం బాగుంది.

నటీనటుల పనితీరు
రవితేజ: తన ఎనర్జిటిక్ యాక్టింగ్‌తో సినిమాను భుజాలపై మోశారు. ముఖ్యంగా కన్ఫ్యూజన్ కామెడీలో ఆయన టైమింగ్ అద్భుతం. అయితే లుక్స్ విషయంలో ఇంకాస్త కేర్ తీసుకుంటే బాగుండేది. ఆషికా రంగనాథ్ గ్లామర్ పరంగా మెరిశారు. పర్ఫార్మెన్స్ పరంగానూ ఓకే అనిపించుకున్నారు.డింపుల్ హయతి గృహిణి పాత్రలో ఒదిగిపోయే ప్రయత్నం చేశారు. వెన్నెల కిషోర్, సత్య, సునీల్ ముగ్గురూ సినిమాకు ప్రధాన బలం. సత్య అక్కడక్కడ తన వాయిస్ మిమిక్రీతో భలే నవ్వించాడు.

సాంకేతిక వర్గం
సినిమాటోగ్రఫీ విజువల్స్ చాలా కలర్‌ఫుల్‌గా ఉన్నాయి. స్పెయిన్ లొకేషన్స్ కంటికి ఇంపుగా అనిపిస్తాయి. నిర్మాణ విలువల విషయంలో సుధాకర్ చెరుకూరి ఎక్కడా రాజీ పడలేదని అర్థమవుతోంది. బ్యాక్ గ్రౌండ్ స్కోర్ పర్వాలేదు, కానీ పాటలు మాత్రం సోసోగానే ఉన్నాయి.

ప్లస్ పాయింట్స్:
రవితేజ మార్కు కామెడీ

వెన్నెల కిషోర్, సత్య టైమింగ్

కలర్‌ఫుల్ విజువల్స్

సెకండాఫ్‌లో వచ్చే కొన్ని వినోదాత్మక సన్నివేశాలు

మైనస్ పాయింట్స్:
రొటీన్ కథాంశం

అక్కడక్కడ సాగదీత సీన్లు

అనవసరపు ఫైట్ సీక్వెన్స్

ఫైనల్‌గా..
సంక్రాంతి పండక్కి కుటుంబంతో కలిసి హాయిగా నవ్వుకోవడానికి 'భర్త మహాశయులకు విజ్ఞప్తి' ఒక మంచి ఆప్షన్. కథలో కొత్తదనం వెతక్కుండా, కేవలం ఎంటర్టైన్మెంట్ కోరుకునే వారికి రవితేజ ఈసారి మంచి విందు ఇచ్చారు.

రేటింగ్: 3 / 5

English summary

Check out the Bhartha Mahasayulaku Wignyapthi movie review. Is Ravi Teja back with his vintage comedy? Read the story, performance analysis, and rating of this Sankranti release.