భర్త మహాశయులకు విజ్ఞప్తి టీజర్ రివ్యూ: రవితేజ కామెడీ టైమింగ్ మాములుగా లేదుగా!
మాస్ మహారాజా రవితేజ సినిమాల్లో కామెడీ టైమింగ్ అంటే ప్రేక్షకులకు ఒక ప్రత్యేకమైన క్రేజ్. చాలా కాలం తర్వాత రవితేజ మళ్లీ ఒక ఫుల్ లెంగ్త్ ఫ్యామిలీ అండ్ కామెడీ ఎంటర్టైనర్తో మన ముందుకు వస్తున్నారు. 'నేను శైలజ', 'ఉన్నది ఒకటే జిందగీ' వంటి ఫీల్ గుడ్ చిత్రాల దర్శకుడు కిషోర్ తిరుమల తెరకెక్కిస్తున్న "భర్త మహాశయులకు విజ్ఞప్తి" టీజర్ ఇప్పుడు అందరినీ ఆకట్టుకుంటోంది.
టీజర్ ఎలా ఉందంటే?
టీజర్ ప్రారంభం నుంచే కిషోర్ తిరుమల సినిమాల్లో ఉండే ఒక కలర్ఫుల్ ఫ్యామిలీ వాతావరణం కనిపిస్తోంది. రవితేజ తనదైన వింటేజ్ ఎనర్జీతో కనిపించారు. ముఖ్యంగా ఆయన చెప్పే డైలాగ్స్ టీజర్కు హైలైట్గా నిలిచాయి. "వదిన వాళ్ల చెల్లి అంటే నా వైఫేగా.. అదే మా అమ్మమ్మ వాళ్ల పద్ధతి" అంటూ రవితేజ చెప్పే ఫన్నీ లాజిక్ థియేటర్లలో నవ్వులు పూయించడం ఖాయంగా కనిపిస్తోంది.
హీరోయిన్ల సందడి
ఈ చిత్రంలో ఆషికా రంగనాథ్ మరియు డింపుల్ హయాతిలు హీరోయిన్లుగా నటిస్తున్నారు. టీజర్లో వీరిద్దరూ చాలా అందంగా కనిపించడమే కాకుండా, రవితేజతో వారి కెమిస్ట్రీ కూడా బాగా కుదిరినట్టు అనిపిస్తోంది. ఒకవైపు గ్లామర్, మరోవైపు పెళ్లి సందడి, ఇంకోవైపు రవితేజ పంచ్లతో టీజర్ ఆద్యంతం వినోదాత్మకంగా సాగింది.
దర్శకుడి మార్క్ మేకింగ్
దర్శకుడు కిషోర్ తిరుమల ఎప్పుడూ సున్నితమైన భావోద్వేగాలను, వినోదాన్ని బ్యాలెన్స్ చేస్తూ సినిమాలు తీస్తారు. ఈసారి రవితేజ వంటి మాస్ హీరోతో ఆయన చేస్తున్న ఈ ప్రయోగం ఆసక్తికరంగా ఉంది. టైటిల్ను బట్టే ఇది భర్తలు ఎదుర్కొనే సమస్యలు లేదా వారి జీవనశైలి చుట్టూ తిరిగే ఒక ఫన్నీ డ్రామా అని అర్థమవుతోంది.
టెక్నికల్ వ్యాల్యూస్
టీజర్లో బ్యాక్గ్రౌండ్ మ్యూజిక్ చాలా ఫ్రెష్గా ఉంది.ఈ చిత్రానికి భీమ్స్ సిసిరోలియో సంగీతం అందించాడు. అంతకుముందు రవితేజ నటించిన బెంగాల్ టైగర్, ధమాకా, మాస్ జాతర సినిమాలకు కూడా భీమ్స్ మ్యూజిక్ అందించాడు. విజువల్స్ అన్నీ చాలా రిచ్గా, గ్రాండ్గా కనిపిస్తున్నాయి. ముఖ్యంగా సంభాషణలు చాలా సహజంగా, నేటి కాలానికి తగ్గట్టుగా ఉన్నాయి. రవితేజ మాస్ ఇమేజ్ పక్కన పెట్టి, ఒక సామాన్య మధ్యతరగతి కుర్రాడిలా కనిపిస్తూనే తన బాడీ లాంగ్వేజ్తో మేజిక్ చేశారు.
మొత్తానికి "భర్త మహాశయులకు విజ్ఞప్తి" టీజర్ సినిమాపై అంచనాలను భారీగా పెంచేసింది. యాక్షన్ సినిమాల మధ్యలో ఒక మంచి రిలేషన్స్ అండ్ కామెడీతో కూడిన సినిమా కోసం చూస్తున్న ప్రేక్షకులకు ఇది కచ్చితంగా ఐ ఫీస్ట్ అని చెప్పవచ్చు. సంక్రాంతి కానుకగా 2026 జనవరి 13న విడుదల కానున్న ఈ సినిమాతో రవితేజ మరో హిట్ కొట్టడానికి సిద్ధమైపోయినట్లే కనిపిస్తోంది.
Click it and Unblock the Notifications
Sign in with Google