బిగ్ షాక్ ; బుచ్చిబాబుపై SC/ST అట్రాసిటీ కేసు
మెగా పవర్ స్టార్ రామ్ చరణ్ కెరీర్లో అత్యంత ప్రతిష్టాత్మకంగా తెరకెక్కిన చిత్రం 'పెద్ది'. ప్రస్తుతం బాక్సాఫీస్ వద్ద సంచలన విజయాన్ని నమోదు చేస్తోంది. 'ఉప్పెన' ఫేమ్ బుచ్చిబాబు సాన దర్శకత్వంలో రూపొందిన ఈ చిత్రం విడుదలకు ముందే భారీ అంచనాలను సృష్టించగా, విడుదల అనంతరం ప్రేక్షకుల నుంచి అద్భుతమైన స్పందనను అందుకుంది. గ్రామీణ నేపథ్యంలో ఆత్మగౌరవ పోరాటాన్ని స్పోర్ట్స్ డ్రామాతో మేళవించి తెరకెక్కించిన ఈ చిత్రం అన్ని వర్గాల ప్రేక్షకులను ఆకట్టుకుంటోంది.
ఈ చిత్రంలో రామ్ చరణ్ సరసన బాలీవుడ్ నటి జాన్వీ కపూర్ కథానాయికగా నటించింది. కీలక పాత్రల్లో జగపతిబాబు, శివరాజ్కుమార్, దివ్యేందు శర్మ కనిపించారు. ఆస్కార్ విజేత ఏఆర్ రెహమాన్ సంగీతం అందించగా, ప్రముఖ సినిమాటోగ్రాఫర్ రత్నవేలు అద్భుతమైన విజువల్స్తో సినిమాకు ప్రత్యేక ఆకర్షణ తీసుకొచ్చారు. మైత్రీ మూవీ మేకర్స్, సుకుమార్ రైటింగ్స్ సమర్పణలో వృద్ధి సినిమాస్ పతాకంపై నిర్మాత వెంకట సతీష్ కిలారు భారీ బడ్జెట్తో ఈ చిత్రాన్ని నిర్మించారు.
కాగా 'గేమ్ ఛేంజర్' ఆశించిన ఫలితాన్ని అందుకోకపోవడంతో రామ్ చరణ్ అభిమానులు నిరాశ చెందారు. అయితే 'పెద్ది' ఆ లోటును పూర్తిగా భర్తీ చేస్తూ మెగా అభిమానులకు పండగ వాతావరణాన్ని తీసుకొచ్చింది. సినిమా విడుదలైన తొలి ఆట నుంచే బ్లాక్బస్టర్ టాక్ సొంతం చేసుకుని అన్ని ప్రాంతాల్లో భారీ వసూళ్లు సాధిస్తోంది. బాక్సాఫీస్ వద్ద 'పెద్ది' కలెక్షన్ల వర్షం కురిపిస్తోంది. ట్రేడ్ వర్గాల అంచనాల ప్రకారం విడుదలైన కేవలం ఐదు రోజుల్లోనే ఈ చిత్రం ప్రపంచవ్యాప్తంగా రూ.315 కోట్లకు పైగా గ్రాస్ వసూళ్లు సాధించింది. ముఖ్యంగా తెలుగు రాష్ట్రాలు, కర్ణాటక, తమిళనాడు, ఉత్తర భారతదేశంతో పాటు ఓవర్సీస్ మార్కెట్లో కూడా సినిమా మంచి వసూళ్లు నమోదు చేస్తోంది. వీకెండ్లో రికార్డు స్థాయి ఆక్యుపెన్సీ నమోదైనట్లు ట్రేడ్ విశ్లేషకులు చెబుతున్నారు.
సినీ ప్రముఖుల ప్రశంసలు..
సినిమాపై ప్రేక్షకులే కాకుండా సినీ పరిశ్రమ ప్రముఖులు కూడా ప్రశంసలు కురిపిస్తున్నారు. రామ్ చరణ్ నటన, బుచ్చిబాబు కథనం, ఏఆర్ రెహమాన్ సంగీతం, క్లైమాక్స్ ఎమోషన్స్ సినిమాకు ప్రధాన బలంగా నిలిచాయని పలువురు ప్రశంసిస్తున్నారు. సోషల్ మీడియాలో కూడా 'పెద్ది' హ్యాష్ట్యాగ్ ట్రెండింగ్లో కొనసాగుతోంది. అయితే సినిమా విజయవంతంగా దూసుకుపోతున్న సమయంలో కొన్ని వివాదాలు కూడా వెంటాడుతున్నాయి. విడుదలైన తొలి రోజుల్లో సినిమాలోని కొన్ని లవ్ ట్రాక్ సన్నివేశాలపై ప్రేక్షకుల నుంచి విమర్శలు వచ్చాయి. దీంతో దర్శకుడు బుచ్చిబాబు స్పందించి, ఆ అభ్యంతరకరంగా భావించిన సన్నివేశాలను ట్రిమ్ చేస్తూ క్షమాపణలు తెలిపారు. ఆ వివాదం సద్దుమణిగిందనుకునేలోపే ఇప్పుడు మరో పెద్ద వివాదం తెరపైకి వచ్చింది.
గిరిజన సంఘాల తీవ్ర అభ్యంతరం
ప్రస్తుతం 'పెద్ది' సినిమా గిరిజన సంఘాల ఆగ్రహానికి గురైంది. సినిమాలో గిరిజన సమాజాన్ని, వారి సంస్కృతిని కించపరిచే విధంగా కొన్ని డైలాగులు ఉన్నాయని గిరిజన నాయకులు ఆరోపిస్తున్నారు. ముఖ్యంగా కొన్ని సందర్భాల్లో ఉపయోగించిన పదజాలం తమ మనోభావాలను తీవ్రంగా దెబ్బతీసిందని వారు ఆవేదన వ్యక్తం చేస్తున్నారు. ఈ అంశంపై ఇప్పటికే ఆంధ్రప్రదేశ్లోని మన్యం, విజయనగరం జిల్లాలకు చెందిన గిరిజన సంఘాల ప్రతినిధులు ఉన్నతాధికారులకు, పోలీసులకు ఫిర్యాదులు సమర్పించినట్లు సమాచారం. సినిమాలో ఉపయోగించిన కొన్ని సంభాషణలు షెడ్యూల్డ్ ట్రైబ్స్ సమాజాన్ని అవమానించేలా ఉన్నాయని వారు పేర్కొంటున్నారు.
ఎస్సీ/ఎస్టీ అట్రాసిటీ కేసు నమోదు చేయాలంటూ డిమాండ్
ఈ వివాదాన్ని మరింత తీవ్రతరం చేస్తూ, దర్శకుడు బుచ్చిబాబు సానా, నిర్మాతలు, నిర్మాణ సంస్థలతో పాటు సినిమా సర్టిఫికేషన్ ప్రక్రియలో పాల్గొన్న సంబంధిత అధికారులపై కూడా ఎస్సీ/ఎస్టీ అట్రాసిటీ చట్టం కింద కేసులు నమోదు చేయాలని గిరిజన సంఘాలు డిమాండ్ చేస్తున్నాయి. సమాజంలో ఒక వర్గాన్ని అవమానించేలా ఉన్న డైలాగులకు అనుమతి ఎలా ఇచ్చారని ప్రశ్నిస్తున్నాయి. ఈ వివాదం ప్రస్తుతం సినీ పరిశ్రమతో పాటు రాజకీయ వర్గాల్లో కూడా చర్చనీయాంశంగా మారింది. ఒకవైపు సినిమా భారీ విజయాన్ని ఆస్వాదిస్తుండగా, మరోవైపు గిరిజన సంఘాల నిరసనలు మేకర్స్కు కొత్త తలనొప్పిగా మారాయి. ఈ అంశంపై చిత్రబృందం ఎలా స్పందిస్తుందనే ఆసక్తి నెలకొంది.
Click it and Unblock the Notifications
Sign in with Google