బాబాయ్ కోసం వెనక్కి తగ్గిన అబ్బాయ్.. ‘పెద్ది’ రిలీజ్ డేట్ ఫిక్స్!
మెగా ఫ్యామిలీలో బాబాయ్ పవన్ కళ్యాణ్, అబ్బాయ్ రామ్చరణ్ మధ్య ఉన్న అనుబంధం గురించి ప్రత్యేకంగా చెప్పాల్సిన అవసరం లేదు. తాజాగా తన బాబాయ్ సినిమా కోసం రామ్చరణ్ తన సినిమా విడుదల తేదీని మార్చుకుని పెద్ద మనసు చాటుకున్నారు. ఉప్పెన ఫేమ్ బుచ్చిబాబు దర్శకత్వంలో రామ్చరణ్ నటిస్తున్న భారీ బడ్జెట్ సినిమా 'పెద్ది' రిలీజ్ తేదీని చిత్ర బృందం అధికారికంగా ప్రకటించింది.
మార్చి నుంచి ఏప్రిల్కు..
నిజానికి 'పెద్ది' సినిమాను గ్లోబల్ స్టార్ రామ్చరణ్ పుట్టినరోజు కానుకగా మార్చి 27న విడుదల చేయాలని చిత్ర బృందం ముందుగా ప్లాన్ చేసింది. అయితే సరిగ్గా ఒకరోజు ముందు అంటే మార్చి 26న పవర్ స్టార్ పవన్ కళ్యాణ్ మోస్ట్ అవేటెడ్ మూవీ 'ఉస్తాద్ భగత్ సింగ్' విడుదల కానుంది. బాబాయ్ సినిమాతో పోటీ పడటం ఇష్టం లేక.. అలాగే రెండు పెద్ద సినిమాలు ఒకేసారి వస్తే వసూళ్లపై ప్రభావం పడుతుందనే ఉద్దేశంతో రామ్ చరణ్ తన సినిమాను వాయిదా వేసుకున్నారు.
ఏప్రిల్ 30న 'పెద్ది' సందడి
డైరెక్టర్ బుచ్చిబాబు సానా అధికారికంగా ప్రకటించిన సమాచారం ప్రకారం.. 'పెద్ది' సినిమా ఏప్రిల్ 30న ప్రపంచవ్యాప్తంగా థియేటర్లలోకి రానుంది. మార్చిలో బాబాయ్, ఏప్రిల్లో అబ్బాయ్ బాక్సాఫీస్ వద్ద సందడి చేయబోతుండటంతో మెగా అభిమానుల ఆనందానికి అవధులు లేవు.
మెగా ఫ్యాన్స్కు నెల రోజుల పండుగ
మార్చి 26న పవన్ కళ్యాణ్ సినిమా, ఏప్రిల్ 30న రామ్ చరణ్ సినిమా.. ఇలా రెండు సినిమాలకు సరిగ్గా నెల రోజుల గ్యాప్ ఉండటం మెగా ఫ్యాన్స్కు పెద్ద ఊరటనిచ్చింది. ఈ గ్యాప్ వల్ల రెండు సినిమాలకు భారీ వసూళ్లు రాబట్టే అవకాశం ఉందని ట్రేడ్ విశ్లేషకులు భావిస్తున్నారు. బాబాయ్ కోసం చరణ్ తీసుకున్న ఈ నిర్ణయంపై సోషల్ మీడియాలో ప్రశంసలు వెల్లువెత్తుతున్నాయి.
మెగా సినిమాల విడుదల తేదీలు సంక్షిప్తంగా..
*ఉస్తాద్ భగత్ సింగ్- మార్చి 26, 2026
*పెద్ది - ఏప్రిల్ 30, 2026
Click it and Unblock the Notifications
Sign in with Google